Read De Bibel JHF Openboarunk 4 Bible Online

Openboarunk 4 - De Bibel JHF bible

Openboarunk 4

¹No dit sach ekj; un kjikj, eene Däa wia opjemoakt em Himmel, un dee ieeschte Stemm, dee ekj jehieet haud, aus von eene Posaun met mie räden, un säd: Komm hia enopp, un ekj woa die wiesen, waut no dit passieren mott.

²Plazlich wia ekj em Jeist; un kjikj, een Troon stunt em Himmel, un opp dän Troon saut Eena.

³Un dee doa saut, wia von Aunseenen soo aus een Jaspiessteen un eenen Sardis (Sarder), un een Räajenboagen wia rom däm Troon, dän daut soo sach aus een Smaracht.

⁴Un runt om dän Troon wieren (sach ekj) 24 Troons, un opp de Troons sauten 24 Eltestasch, bekjleet met witte Kjleeda, un opp äare Kjap goldne Kroonen.

⁵Un von (ut) däm Troon jinjen Blitzen (Blitzstrolen) un Stemm un Donna väa; un säwen Fiastakja brenden ver däm Troon, dee de säwen Jeista Gottes sent.

⁶Un ver däm Troon aus een glausnet Mäa, aus Kristal; un enne Medd vom Troon un runt om dän Troon vea läwendje Wäsent, voll Uagen väaren un hinjen.

⁷Un daut ieeschte läwendje Wäsent wia aus een Leiw, un daut tweede läwendje Wäsent wia aus een Kaulf, un daut dredde läwendje Wäsent haud daut Aunjesecht aus een Mensch, un daut vieede läwendje Wäsent wia aus een flieejenda Odla.

⁸Un dee vea läwendje Wäsent hauden, een jiedret von an fa sikj, jiedret sas Flichten; runt om un von bennen sent see voll Uagen, un see hieren Dach un Nacht nich opp (onen Ru) to sajen: Heilich, heilich, heilich, Har, Gott, Aulmajchtja, dee doa wia un dee doa es un dee doa kjemt!

⁹Un wan dee läwendje Wäsent Iea (Harlichkjeit) un Dank jäwen woaren däm, dee opp däm Troon sett, dee doa läft von Eewichkjeit to Eewichkjeit,

¹⁰soo woaren dee 24 Eltestasch dolfaulen ver däm, dee opp däm Troon sett, un däm aunbäden, dee doa läft von Eewichkjeit to Eewichkjeit, un woaren äare Kroonen hanschmieten ver däm Troon un sajen:

¹¹Du best wieet, oo, ons Har un Gott, to nämen de Harlichkjeit un de Iea un de Macht; dan du hast aule Dinj (aules, soo aus daut Weltaul) erschaufen, un wäajen (derch) dienen Wellen wieren see un sent see erschaufen worden.