Read De Bibel JHF Openboarunk 5 Bible Online

Openboarunk 5 - De Bibel JHF bible

Openboarunk 5

¹Un ekj sach en siene Rajchte (Haunt), dee opp däm Troon saut, een Buak, beschräwen von bennen un von buten, met säwen Säajel vesäajelt.

²Un ekj sach eenen stoakjen Enjel, dee met ne lude Stemm vekjindijd: Wäa es wieet, daut Buak optomoaken un siene Säajel to bräakjen?

³Un kjeena em Himmel, noch (ooda) oppe Ieed, noch unja de Ieed kunn daut Buak opmoaken, noch daut auntokjikjen (nentokjikjen).

⁴Un ekj hield sea, wiels kjeena wieet jefungen wort, daut Buak optomoaken, noch nentokjikjen.

⁵Un eena von de Eltestasch säd to mie: Hiel nich! Kjikj, daut haft äwastonen de Leiw, dee ut däm Staum Juda es, de Wartel von David, daut Buak optomoaken un siene 7 Säajel.

⁶Un ekj sach enne Medd vom Troon un de vea läwendje Wäsent un enne Medd de Eltestasch een Laum stonen aus jeschlacht, daut säwen Hieena haud un säwen Uagen, daut de säwen Jeista Gottes sent, dee jeschekjt sent äwa de gaunze Ieed.

⁷Un daut kjeem un neem daut Buak ut de Rajchte von däm, dee opp däm Troon saut (sett).

⁸Un aus daut Laum daut Buak neem, follen de vea läwendje Wäsent un de 24 Eltestasch han ver daut Laum, un see hauden een jiedra eene Hoap un goldne Tala (Schiewen) voll Rieekjastoff (Weiruak, seeta Ruak), daut de Jebäda de Heilje sent.

⁹Un see sinjen een nieet Leet, un sajen: Du best wieet, daut Buak to nämen un siene Säajel optomoaken; dan du best jeschlacht worden un hast [ons] fa Gott jekoft, derch dien Bloot, ut jieda Staum un Sproak un Volkj un Nazion,

¹⁰un hast ons onsem Gott to Kjennichs un Priesta jemoakt, un see woaren opp (äwa) de Ieed harschen.

¹¹Un ekj sach, un ekj hieed eene Stemm von väl Enjel om dän Troon un om de läwendje Wäsent un de Eltestasch; un äare Zol wia tieendusende mol tieendusende un dusende mol dusende,

¹²dee met lude Stemm säden: Wieet es daut Laum, daut jeschlacht jeworden es, to emfangen de Macht un Rikjtum un Weisheit un Krauft un Iea un Harlichkjeit un Säajen.

¹³Un jiedre (aule) Kjreatua (Erschaufte), daut em Himmel un opp de Ieed un unja de Ieed un opp daut Mäa es, un aules, waut en an es, hieed ekj sajen: Däm, dee opp däm Troon sett un daut Laum de Säajnunk un de Iea un Harlichkjeit un de Macht von Eewichkjeit to Eewichkjeit!

¹⁴Un dee vea läwendje Wäsent säden: Amen! Un de Eltestasch vollen dol un bäden aun.