Read De Bibel JHF Openboarunk 6 Bible Online

Openboarunk 6 - De Bibel JHF bible

Openboarunk 6

¹Un ekj sach, aus daut Laum eent von de säwen Säajel opmuak, un ekj hieed eent von de vea läwendje Wäsent aus eene Donnastemm sajen: Komm!

²Un ekj sach; un kjikj, een wittet Pieet, un dee doa bowen saut (sett) haud een Boagen; un am wort eene Kroon jejäft, un hee trock (reet) ut, jewennent un doamet hee jewent.

³Un aus et daut tweede Säajel opmuak, hieed ekj daut tweede läwendje Wäsent sajen: Komm!

⁴Un daut trock ut een aundret, een fiaroodet Pieet; un däm, dee doabowen saut (sett), am wort jejäft, dän Fräd von de Ieed to nämen, un daut see eenaunda schlachten sullen; un een grootet Schwieet wort am jejäft.

⁵Un aus et daut dredde Säajel opmuak, hieed ekj daut dredde läwendje Wäsent sajen: Komm! Un ekj sach; un kjikj, een schwoatet Pieet, un dee doabowen saut (sett), haud eene Wichtschol en siene Haunt.

⁶Un ekj hieed aus eene Stemm enne Medd dee vea läwendje Wäsent, dee säd: Een Mot Weit fa eenen Dinoa, un dree Mot Joascht fa eenen Dinoa; un daut Eelj un dän Wien beschädich nich.

⁷Un aus et daut vieede Säajel opmuak, hieed ekj [de Stemm] von daut vieede läwendje Wäsent sajen: Komm!

⁸Un ekj sach; un kjikj, een blausset Pieet, un dee doabowen saut (sett), sien Nomen wia Doot; un daut Doodenrikj (griechisch: Hades) kjeem met am. Un am wort Macht jejäft äwa daut vieede Deel (Poat) de Ieed, doot to moaken met daut Schwieet un met Hunga un met Doot {Hes.14,21} un derch de wille Tieren de Ieed.

⁹Un aus et daut fefte Säajel opmuak, sach ekj unja däm Aultoa de Seelen von dän, dee jeschlacht jeworden wieren om daut Wuat Gottes un om daut Zeichnis haulwen, daut see hauden.

¹⁰Un see schrieejen met lude Stemm un säden: Woo lang (bat wan), oo Har (Harscha), dee du heilich un woarhauftich best, rechst un strofst du nich ons Bloot aun dän, dee oppe Ieed wonen?

¹¹Un daut wort an eenem jiedren een wittet Kjleet jejäft; un daut wort an jesajcht, daut see noch eene kjliene Tiet ruen sellen, bot uk äare Metkjnajchts un äare Breeda vollbrocht (omjebrocht) sennen woaren, dee uk soo aus see wudden doot jemoakt woaren.

¹²Un ekj sach, aus et daut saste Säajel opmuak; un daut passieed een grootet Ieedbäben; un de Sonn wort schwoat aus een Sak von Hoa (Sakzeich), un de gaunze Mon wort aus Bloot,

¹³un de Stierns vom Himmel follen opp de Ieed, aus een Fiejenboom, jescheddat von eenen stoakjen Wint, siene jreene Fiejen rauf schmitt.

¹⁴Un de Himmel veschwunk aus eene Buakroll, de oppjerolt woat, un jiedra Boajch un jiedre Insel wort ut (von) äare Städ bewäacht (jesat).

¹⁵Un de Kjennichs de Ieed un de Groote un de Bowaschte un de Rikje un de Stoakje un jiedra Sklow un Friee vestuaken sikj en de Heelen un en de Steena enne Boaj;

¹⁶un see sajen to de Boaj un de Steena: Fault opp ons un vestäakjt ons ver daut Aunjesecht, dee opp dän Troon sett, un ver daut Laum sien Oaja;

¹⁷dan jekomen es de groota Dach von sienen Oaja, un wäa kaun bestonen (faust stonen bliewen)?