Read De Bibel JHF Openboarunk 7 Bible Online

Openboarunk 7 - De Bibel JHF bible

Openboarunk 7

¹Un no dit sach ekj vea Enjel opp de vea Akjen de Ieed stonen, dee de vea Wind de Ieed fausthilden, doamet kjeen Wint opp de Ieed blost, noch opp daut Mäa, noch äwa irjent eenen Boom.

²Un ekj sach eenen aundren Enjel von Sonnoppgank raufkomen, dee daut Säajel vom läwendjen Gott haud; un hee roopt met ne lude Stemm de vea Enjel, dän jejäft wia, de Ieed un daut Mäa to beschädjen,

³un säd: Beschädicht de Ieed nich, noch daut Mäa, noch de Beem, bot wie de Kjnajchts von onsem Gott aum Stiern jetieekjent ha.

⁴Un ekj hieed de Zol de Vesäajelde; 144 000 Vesäajelde, ut jieda Staum de Säns von Israel.

⁵Ut däm Staum Juda 12 000 Jetieekjende, ut däm Staum Ruben 12 000, ut däm Staum Gad 12 000,

⁶ut däm Staum Aser 12 000, ut däm Staum Naftali 12 000, ut däm Staum Manasse 12 000,

⁷ut däm Staum Simon 12 000, ut däm Staum Levi 12 000, ut däm Staum Isachar 12 000,

⁸ut däm Staum Sebulon 12 000, ut däm Staum Josef 12 000, ut däm Staum Benjamin 12 000 met daut Säajel Jetieekjende.

⁹No disem sach ekj; un kjikj, ne groote Schoa, dee kjeena talen kunn, ut jiedre Nazion un Staum un Velkja un Sproaken, un dee stunden ver däm Troon un ver daut Laum, aunjekjleet met witte Kjleeda, un Palmasta en äare Henj.

¹⁰Un see roopen met ne lude Stemm un säden: Daut Heil von onsem Gott, dee opp däm Troon sett, un von daut Laum!

¹¹Un aule Enjel stunden om dän Troon erom un om de Eltestasch un dee vea läwendje Wäsent, un see follen ver däm Troon opp äare Aunjesechta un bäden Gott aun,

¹²un säden: Amen! De Säajnunk (Säajen) un de Harlichkjeit un de Weisheit un de Dank un de Iea un de Macht un Krauft jehieren onsem Gott von Eewichkjeit to Eewichkjeit! Amen.

¹³Un eena von de Eltestasch funk aun un säd to mie: Dise, dee met witte Kjleeda bekjleet sent, wäa sent dee, un von wua sent dee jekomen?

¹⁴Un ekj säd to am: Mien Har, du weetst daut. Un hee säd to mie: Dit sent dee, dee ut de groote Bedrenkjnis komen, un dee ha äare Kjleeda jewoschen un ha dee witt jemoakt en daut Bloot vom Laum.

¹⁵Doawäajen sent see ver däm Troon Gottes un deenen am Dach un Nacht en sienen Tempel; un dee opp däm Troon sett, woat sien Zelt äwa an oppspreeden (woat bie an wonen).

¹⁶See woaren nich mea hungren, woaren uk nich mea darschten, noch woat de Sonn opp an faulen, noch irjent eene Hett;

¹⁷dan (wiels) daut Laum, daut en de Medd vom Troon es, woat an weiden un an leiden no de Läwens Wotakjwalen, un Gott woat jiedre Tronen von äare Uagen aufweschen.