Read De Bibel JHF Openboarunk 8 Bible Online

Openboarunk 8 - De Bibel JHF bible

Openboarunk 8

¹Un aus hee daut säwende Säajel opmuak, wort daut gaunz stell em Himmel onjefäa eene haulwe Stund.

²Un ekj sach de säwen Enjel, dee ver Gott stonen; un an worden säwen Posaunen jejäft.

³Un een aundra Enjel kjeem un stald sikj aun däm Aultoa, un hee haud eene goldne Rieekjapaun; un daut wort am väl Rieekjastoff (Weiruak) jejäft, doamet hee Krauft jeef de Jebäda aula Heilje opp däm goldnen Aultoa, dee ver däm Troon es.

⁴Un de Ruak vom Rieekjastoff (Weiruak) stieech met de Jebäda de Heilje opp ut de Haunt von däm Enjel ver Gott.

⁵Un de Enjel neem de Rieekjapaun un feld dee met daut Fia vom Aultoa un schmeet daut oppe Ieed; un daut kjeemen Stemmen un Donna un Blitz un een Ieedbäben.

⁶Un de säwen Enjel, dee de säwen Posaunen hauden, muaken sikj reed, doamet see posaunen blosen.

⁷Un de ieeschta posaund (blosd); un doa kjeem Hoagel un Fia, met Bloot vemischt, un wort oppe Ieed jeschmäten. Un daut dredde Deel (Poat) vonne Ieed vebrend, un daut dredde Deel (Poat) vonne Beem vebrend, un aulet jreene Grauss vebrend.

⁸Un de tweeda Enjel posaund; un soo aus een groota, met Fia brennenda Boajch wort em Mäa jeschmäten; un daut dredde Deel vom Mäa wort to Bloot.

⁹Un daut storf daut dredde Deel de Erschaufunk, dee em Mäa wieren, dee Läwen (Seelen, opp griechisch: Psyche) hauden, un daut dredde Deel de Schäp wort venicht.

¹⁰Un de dredda Enjel posaund (blosd); un daut foll vom Himmel een groota Stiern, brennent aus een Fiastock, un dee foll opp daut dredde Deel de Wotastreem un opp de Wotakjwalen.

¹¹Un de Nomen von daut Stiern heet Wäamoot (Bettanis,Wermut); un daut dredde Deel (Poat) von daut Wota wort to Wäamoot, un väle de Menschen storwen von daut Wota, wiels dee betta jeworden wieren.

¹²Un de vieede Enjel posaund; un daut wort daut dredde Deel (Poat) von de Sonn jeschloagen un daut dredde Deel von de Mon un daut dredde Deel de Stierns, soo daut von an de dredde Deel diesta wort, un de Dach nich scheen, sien dreddet Deel (Dreddel) un de Nacht krakjt soo.

¹³Un ekj sach; un ekj hieed eenen Odla flieejen enne medd vom Himmel un met ne lude Stemm sajen: Wee, wee, wee dän, dee oppe Ieed wonen, Stemmen de Trompeeten dee dree Enjel, dee posaunen blosen woaren!