Read De Bibel JHF Openboarunk 9 Bible Online

Openboarunk 9 - De Bibel JHF bible

Openboarunk 9

¹Un de fefta Enjel posaund (blosd); un ekj sach eenen Stiern, dee vom Himmel oppe Ieed jefollen wia; un daut wort am de Schlätel toom Loch vom Aufgrunt jejäft.

²Un hee muak daut Loch toom Aufgrunt op; un een Ruak kjeem enopp ut daut Loch aus de Ruak ut eenen grooten Owen, un de Sonn un de Loft worden von dän Ruak utem Loch vedunkelt.

³Un ut dän Ruak kjeemen Heischrakjen väa oppe Ieed, un daut wort an Macht jejäft, aus de Skorpionen oppe Ieed Macht ha.

⁴Un daut wort an jesajcht, daut see nich beschädjen sullen daut Grauss oppe Ieed, noch jiedret Jreens, noch jiedrem Boom, sonda de Menschen, dee nich Gott sien Säajel aum Stiern ha.

⁵Un daut wort an oppjejäft, daut see an nich doot muaken, sonda daut see fief Moonat jekjwält worden; un äare Kwol wia aus de Kwol von eenen Skorpion, wan hee eenen Mensch stakjt.

⁶Un en jane Doag woaren de Menschen dän Doot sieekjen un woaren am nich finjen, un woaren stoawen wellen, un de Doot rant von an.

⁷Un de Jestault (daut Jeschekj) de Heischrakjen sent aus Pieed reed jemoakt toom Kjrich, un opp äare Kjap wieren Kroonen aus von Golt, un äare Jesechta aus Menschen Jesechta;

⁸un see hauden Hoa aus Frueshoa, un äare Tänen wieren aus dee vom Leiw.

⁹Un see hauden Brostschilda aus iesane Brostschilda, un daut Jeruzh äare Flichten wia aus daut Jeruzh von Woages met väl Pieed, dee en dän Kaumf ranen;

¹⁰un see haben Zäajel aus von Skorpionen, un Stachels, un äare Macht es en äare Zäajel, de Menschen fief Moonat to schädjen.

¹¹See ha äwa sikj eenen Kjennich, dän Enjel vom Aufgrunt; sien Nomen es opp hebräisch Abadon, {Ps.88,12; Hiob.26,6; 28,22} un en Griechisch haft hee dän Nomen Apolion (Vedoawa).

¹²Daut eene Wee es vebie, kjikj, daut komen noch twee Wee doano.

¹³Un de sasta Enjel posaund (blosd); un ekj hieed eene Stemm ut de vea Hieena aum goldnen Aultoa, dee ver Gott es,

¹⁴to däm sasten Enjel, dee de Posaun haud, sajen: Binj loos de vea Enjel, dee aun däm groote Stroom (Riefa) Eufrat jebungen sent.

¹⁵Un de vea Enjel worden loosjebungen, dee reed wieren opp Stund un Dach un Moonat un Joa, om daut see een Dreddel de Menschen doot muaken.

¹⁶Un de Zol de Ritta Soldoten (Soldoten met Pieed, Rittahäa) wia twee mol 10 000 mol 10 000; ekj hieed äare Zol.

¹⁷Un soo sach ekj de Pieed en daut Jesecht (dee Vision) un dee opp an sauten (setten): Un see hauden fiaroode un bleiwelje un schwäweljäle (schwäwelblitt jäle) Brostschilda; un de Kjap vonne Pieed wieren aus Leiwskjap, un ut äare Miela jeit Fia un Ruak un Schwäwel rut.

¹⁸Von (Derch) dise dree Ploagen wort daut dredde Deel (Poat) de Menschen doot jemoakt, von daut Fia un daut Ruak un daut Schwäwel, dee ut äare Miela väakomen.

¹⁹Dan de Macht de Pieed es en äarem Mul un en äare Zäajel; dan äare Zäajel sent aus Schlangen un ha Kjap, un met an beschädjen see.

²⁰Un de äwaje de Menschen, dee derch dise Ploagen nich doot jemoakt worden, deeden nich omdenkjen (Busse) von de Woakjen äara Henj, daut see nich aunbäden de Dämonen un de goldne un de selwane un de koppane un de steenane un de heltane Jetzenbilda, dee nich seenen, nich hieren, nich gonen kjennen.

²¹Un see deeden nich omdenkjen von äa morden, noch von äare Zaubarieen, noch von äare Onzucht, noch von stälen.