Read De Bibel JHF Rut 2 Bible Online

Rut 2 - De Bibel JHF bible

Rut 2

¹Un Noomi haud eenen Vewaundten von äarem Maun, eenen rikjen Maun, ut däm Jeschlajcht Elimelech, un sien Nomen wia Boas.

²Un Rut, de Moabitin, säd to Noomi: Lot mie doch oppem Flekj gonen un Oaren hinja däm häa läsen, en däm siene Uagen ekj Jnod finjen woa. Un see säd to ar: Go han, miene Dochta.

³Un see jinkj han un kaum un laus oppem Flekj hinja de Oareschnieda häa; un see troff tofalich daut Feldstekj von Boas, dee ut däm Jeschlajcht Elimelech wia.

⁴Un kjikj, Boas kaum von Betlehem un säd to de Oareschnieda: De Har es met junt! Un see säden to am: De Har säajent die!

⁵Un Boas säd to sienem Kjnajcht, dee äwa de Oareschnieda jestalt wia: Wäm jehieet dise Mejal?

⁶Un de Kjnajcht, dee äwa de Oareschnieda jestalt wia, auntwuad un säd: Daut es eene moabitische Mejal, dee met Noomi ut de Felda Moab trigjjekomen es;

⁷un see säd: Lot mie doch oppläsen un hinja de Goawen läsen, hinja de Oareschnieda häa! Un soo es see jekomen un jebläwen von Zemorjes bat nu; waut see em Hus jesäten haft, es weinich.

⁸Un Boas säd to Rut: Heascht du, miene Dochta? Go nich, om opp eenem aundren Flekj opptoläsen, un go uk nich von hia wajch, sonda hool die hia aun miene Deenstmejales.

⁹Diene Uagen sent oppem Flekj jerecht, daut maun schnit, un go hinja an häa; ha ekj nich däm Kjnajcht befoolen, die nich auntotausten? Un wan die darscht, soo go no de Jefässa un drinkj von däm, waut de Kjnajchts schapen.

¹⁰Doa foll see opp äa Aunjesecht un venäjd sikj bat oppe Ieed un säd to am: Wuarom ha ekj Jnod jefungen en diene Uagen, daut du mie beachst, doa ekj doch eene Framde sie?

¹¹Un Boas auntwuad un säd to ar: Daut es mie aules berecht worden, waut du aun diene Schwiamutta jedonen hast no dienem Maun sienem Doot, endäm du dienen Voda un diene Mutta un dien Jeburtslaunt veloten hast un no eenem Volkj jegonen best, daut du verhäa nich kjansd.

¹²De Har vejelt die dien Doonen, un dien Loon es ver däm Harn voll, däm Gott Israels, unja däm siene Flichten du jekomen best Tooflucht too sieekjen!

¹³Un see säd: Mucht ekj en diene Uagen Jnod finjen, mien Har! Dan du hast mie jetreest un hast to mienem Hoaten von diene Deenstmejal jerät, un doch sie ekj nich aus eene diene Deenstmejales.

¹⁴Un Boas räd to ar too Tiet aus see auten: Komm hiahäa, un at von däm Broot un duck dien Stekj un däm Ädikj. Doa sad see sikj aune Sied de Oareschnieda; un hee rieekjt ar jereeschte Kjieena, un see aut un wort saut un leet äwa.

¹⁵Un see stunt opp, om opptoläsen; un Boas befool sienem Kjnajcht un säd: Uk tweschen de Goawen doaf see oppläsen, un jie sellen ar nich beleidjen;

¹⁶un uk sell jie selfst ut de Goawen Oaren fa ar ruttrakjen un dee ligjen loten, doamet see dee opplest, un sellen ar nich schellen.

¹⁷Un see laus opp däm Flekj bat Oppenowent opp, un see schluach daut ut, waut see oppjelest haud, un daut wia bie eenem Efa Joascht.

¹⁸Un see naum daut un kaum enne Staut, un äare Schwiamutta sach, waut see oppjelest haud; un see trock rut un jeef ar, waut see äwajeloten haud, nodäm see sikj saut jejäten haud.

¹⁹Doa säd äare Schwiamutta to ar: Woa hast du vondoag oppjelest, un woa hast du jeoabeit? Jesäajent es, dee die beacht haft! Un see säd to äare Schwiamutta, bie wäm see jeoabeit haud, un säd: Däm Maun sien Nomen, bie däm ekj vondoag jeoabeit ha, es Boas.

²⁰Doa säd Noomi too äare Schwiadochta: Jesäajent es hee von däm Harn, dee siene Jnod nich haft trigjjehoolen von de Läwendje un von de Doodje! Un Noomi säd to ar: De Maun es ons dicht vewaunt, hee es eena von onse Blootvewaunte.

²¹Un Rut, de Moabitin, säd: Hee haft uk to mie jesajcht: Du saust die aun miene Lied hoolen, bat see miene gaunze Arnt enjebrocht ha.

²²Un Noomi säd to Rut, äare Schwiadochta: Daut es goot, miene Dochta, daut du met siene Deenstmejales utjeist daut maun die nich opp eenem aundren Flekj auntraft.

²³Un soo hilt see sikj aun Boas siene Deenstmejales, om opptoläsen, bat de Joascht- un Weitarnt too enj wieren. Un see wond bie äare Schwiamutta.