Read De Bibel JHF Rut 3 Bible Online

Rut 3 - De Bibel JHF bible

Rut 3

¹Un Noomi, äare Schwiamutta, säd to ar: Miene Dochta, sull ekj die nich Ru sieekjen, daut et die goot jeit?

²Un nu, es nich Boas, bie däm siene Deenstmejales du jewast best, ons Vewaunta? Kjikj, hee drascht dise Nacht Joascht opp de Draschdäl.

³Soo bod die un saulw die un laj diene Kjleeda aun un go rauf no de Draschdäl; lot die nich von däm Maun seenen, bat hee met däm Äten un Drinkjen foadich es.

⁴Wan hee sikj dan schlopen lajcht, soo moakj die däm Uat, wua hee sikj hanlajcht, un go un dakj op aun siene Feet un laj die han; oba hee woat die sajen, waut du doonen saust.

⁵Un see säd to ar: Aules, waut du sajchst, well ekj doonen.

⁶Un see jinkj rauf no de Draschdäl un deed aules, waut äare Schwiamutta ar befoolen haud.

⁷Un Boas aut un drunk, un sien Hoat wort froo; un hee kaum, om sikj aum Enj vom Jeträajde Hupe doltolajen. Doa kaum see leis un dakjt siene Feet op un läd sikj han.

⁸Un medden enne Nacht passieed daut, doa vefieed de Maun sikj un buag sikj han; un kjikj, eene Fru lach aun siene Feet.

⁹Un hee säd: Wäa best du? Un see säd: Ekj sie Rut, diene Deenstmejal; soo breed diene Flichten äwa diene Deenstmejal ut, dan du best een Blootvewaunta.

¹⁰Un hee säd: Jesäajent best du von däm Harn, miene Dochta! Du hast diene latste Dot noch bäta bewäsen aus de Ieeschte, endäm du nich de Jinjlinje nojegonen best, noch oame ooda rikjen.

¹¹Un nu, enjst die nich! Aules, waut du sajchst, woa ekj die doonen; dan daut gaunze Dooa von mienem Volkj weet, daut du eene pienje Fru best.

¹²Un nu, woarhauft, ekj sie een Blootvewaunta; oba doa es noch een dichtra Blootvewaunta aus ekj.

¹³Bliew dise Nacht; un daut saul Morjen passieren, wan hee die leesen well, goot, soo mucht hee leesen; oba wan hee kjeene Lost haft, die too leesen, soo woa ekj die leesen, soo woa de Har läft! Ligj bat Zemorjes.

¹⁴Un see lach aun siene Feet bat Zemorjes; un see stunt opp, ea eena däm aundren erkjanen kunnen; dan hee säd: Daut saul nich ludboa woaren, daut eene Fru oppe Draschdäl jekomen es!

¹⁵Un hee säd: Jeff däm Mauntel häa, däm du aunhast, un hool am. Un see hilt däm opp, un hee maut 6 Mot Joascht un läd dee opp ar; un hee jinkj enne Staut.

¹⁶Un see kaum no äare Schwiamutta; un see säd: Woo es et met die, miene Dochta? Un see säd ar aules, waut de Maun ar jedonen haud,

¹⁷un säd: Dise 6 Mot Joascht jeef hee mie, dan hee säd: Du saust nich ladich no diene Schwiamutta komen.

¹⁸Un see säd: Bliew, miene Dochta, bat du weetst, woo de Sach utfelt; dan de Maun woat nich ruen, bat hee vondoag, de Sach toenj jebrocht haft.