Read De Bibel JHF Rut 4 Bible Online

Rut 4 - De Bibel JHF bible

Rut 4

¹Un Boas jinkj nopp nom Dooa un sad sikj doa han. Un kjikj, de Blootvewaunta jinkj vebie, von däm Boas jerät haud. Doa säd hee: Komm häa, sat die hiahäa, du, jana un jana. Un hee kaum un sad sikj.

²Un Boas naum 10 Mana von de Eltestasch de Staut un säd: Sat junt hiahäa; un see saden sikj.

³Un hee säd toom Blootvewaunten: Noomi, dee ut de Felda Moab trigjjekomen es, vekjaft daut Feldstekj, daut onsem Brooda Elimelech jehieet;

⁴soo ha ekj jedocht, ekj well daut dienem Ua toweeten loten un die sajen: Kjeep daut ver de Enwona un ver de Eltestasch von mienem Volkj. Wan du daut leesen west, lees, un wan du daut nich leesen west, soo saj mie daut, daut ekj daut weet; dan doa es kjeena buta die toom Leese, un ekj kom no die. Un hee säd: Ekj well leesen.

⁵Doa säd Boas: Aun däm Dach, doa du daut Flekj ut de Haunt Noomi kjafst, hast du daut uk von Rut, de Moabitin, de Fru von däm Vestorwnen, jekoft, om däm Nomen de Vestorwne opp sienem Oawdeel too erwakjen.

⁶Doa säd de Blootvewaunta: Ekj kaun daut nich fa mie leesen, daut ekj mien Oawdeel nich vedoaw. Lees du fa die, waut ekj leesen sull, dan ekj kaun nich leesen.

⁷Oba daut wia soo ver oole Tieden en Israel biem leesen un biem tuschen, om jiedre Sach too bestädjen: Dee eena trock sien Schoo ut un jeef am däm aundren; un daut wia de Oat de Bestädjunk en Israel.

⁸Un de Blootvewaunta säd to Boas: Kjeep du daut fa die! Un hee trock sien Schoo ut.

⁹Doa säd Boas to de Eltestasch un to aulem Volkj: Jie sent vondoag Zeijen, daut ekj ut de Haunt Noomi aules jekoft ha, waut Elimelech, un aules, waut Kiljon un Machlon jehieet;

¹⁰un uk Rut, de Moabitin, Machlon siene Fru, ha ekj mie to Fru jekoft, om däm Nomen vom Vestorwnen opp sienem Oawdeel too erwakjen, daut nich de Nomen de Vestorwne unja siene Breeda utjerot woat un ut däm Dooa von sienem Uat. Jie sent vondoag Zeijen!

¹¹Un aulet Volkj, daut em Dooa wia, un de Eltestasch säden: Wie sent Zeijen! De Har moakt de Fru, daut en dienem Hus kjemt, aus Rahel un aus Lea, dee daut Hus Israel jebut ha; un woaren majchtich en Efrata un moaken eenen Nomen en Betlehem!

¹²Un von däm Somen, däm de Har die von dise junge Fru jäwen woat, woat dien Hus aus daut Hus von Perez, dee Tamar däm Juda jebuaren haud!

¹³Un Boas naum Rut, un see wort siene Fru, un hee jinkj no ar en; un de Har jeef ar daut see schwanga wort un see jebua eenen Sän.

¹⁴Un de Frues säden to Noomi: Jeloft es de Har, dee daut die vondoag nich haft väle loten aun eenem Leesa! Un sien Nomen wort beriemt en Israel!

¹⁵Un hee woat diene Seel nie beläwen un een Vesorja en dienem Ella sennen! Dan diene Schwiadochta, dee die goot es, haft am jebuaren, see, dee die bäta aus säwen Säns es.

¹⁶Un Noomi naum daut Kjint un läd daut opp äare Schoot un wort siene Fläajmutta.

¹⁷Un de Nobasch jeewen am eenen Nomen, endäm see säden: Een Sän es de Noomi jebuaren! Un see jeewen am däm Nomen Obed [Deena]. Hee es de Voda von Isai, von David sienem Voda.

¹⁸Un dit sent de Jeschlajchta von Perez: Perez jebua Hezron,

¹⁹un Hezron jebua Ram, un Ram jebua Amminadab,

²⁰un Amminadab jebua Nachschon, un Nachschon jebua Salma,

²¹un Salma jebua Boas, un Boas jebua Obed,

²²un Obed jebua Isai, un Isai jebua David.