Read De Bibel JHF 1. Samuel 1 Bible Online

1. Samuel 1 - De Bibel JHF bible

1. Samuel 1

¹Un daut wia een Maun von Ramataim-Zofim, vonne Boaj Efraim, un sien Nomen wia Elkana, de Sän von Jerocham, Elihu sien Sän, vom Sän Tochu, vom Sän Zif, een Efraimita.

²Un hee haud twee Frues; de Nomen de eene wia Hanna, un de Nomen de aundre Peninna; un Peninna haud Kjinja, oba Hanna haud kjeene Kjinja.

³Un dis Maun jinkj jieda Joa ut siene Staut nopp, om Gott de Häaschoa auntobäden un am en Silo too opfren; un doa wieren de Säns von Eli, Hofni un Pinehas, Priesta Gottes.

⁴Un aun däm Dach passieed daut, doa opfad Elkana, doa jeef hee siene Fru Peninna un aul siene Säns un Dajchta Stekja [vom Opfamol];

⁵oba Hanna jeef hee een dobbeldet Stekj, dan hee leewd Hanna; oba de Har haud äa Muttalief veschloten.

⁶Un äare Jäajnarin kjrenkjt ar met väl Kjrentjunge, om ar too oajren, wiels de Har äa Muttalief veschloten haud.

⁷Un soo aus hee daut jieda Joa deed, soo kjrenkjt see ar, soo foaken see nom Hus Gottes noppjinjen; un see hield un aut nich.

⁸Un Elkana, äa Maun, säd to ar: Hanna, wuarom hielst du? Un wuarom atst du nich? Un wuarom es dien Hoat truarich? Sie ekj die nich bäta aus 10 Säns?

⁹Un Hanna stunt nom Äten un Drinkjen en Silo opp. Eli, de Priesta, oba saut oppem Stool aun eenem de Däapast vom Tempel Gottes.

¹⁰Un see wia seelisch betriept, un see bäd to däm Harn un hield sea.

¹¹Un see deed een Vespräakjen un säd: Gott de Häaschoa! Wan du daut Älent von diene Deenstmejal aunseenen un aun mie denkjen woascht un diene Deenstmejal nich vejäten un woascht diene Deenstmejal menlichen Somen jäwen, soo well ekj am, däm Harn aule Doag von sienem Läwen jäwen; un kjeen Schäamassa saul opp sien Haupt komen.

¹²Un daut passieed, aus see lang ver däm Harn bäd, daut Eli äa Mul beoobacht.

¹³Oba Hanna räd en äarem Hoaten; blooss äare Leppen beweajden sikj, oba äare Stemm wia nich to hieren; un Eli hilt ar fa eene Bedrunkne.

¹⁴Un Eli säd to ar: Woo lang west du bedrunken sennen? Doo dienen Wien von die!

¹⁵Oba Hanna auntwuad un säd: Ne, mien Har! Ekj sie eene Fru met eenem bedrekjtem Jeist; noch Wien noch stoakjet Jedrenkj ha ekj jedrunken, sonda ekj schedd miene Seel ver däm Harn ut.

¹⁶Hool diene Deenstmejal nich aus eene Dochta Belial; dan von välem Kumma un Truarichkjeit ha ekj bat nu jerät.

¹⁷Un Eli auntwuad un säd: Go en Fräd han; un de Gott Israels jeft die no dienem Bedden, dee du ver am utjesajcht hast!

¹⁸Un see säd: Mucht diene Deenstmejal Jnod en diene Uagen finje! Un de Fru jinkj äarem Wajch un aut, un äa Aunjesecht wia nich mea daut selje.

¹⁹Un see muaken sikj tiedich Zemorjes opp un bäden däm Harn aun; un see jinjen trigj un kaumen en äa Hus no Rama. Un Elkana erkjand Hanna, siene Fru, un de Har docht aun ar.

²⁰Un daut passieed no eene Tiet, doa wort Hanna schwanga un jebua eenen Sän; un see jeef am däm Nomen Samuel; dan derch Jebäd ha ekj am von däm Harn jekjräajen.

²¹Un Elkana jinkj met sienem gaunzen Hus nopp, om däm Harn daut joares Schlachtopfa too opfren un sien Vespräakjen too erfellen.

²²Oba Hanna jinkj nich nopp; dan see säd to äarem Maun: Bat de Jung aufjewant es, dan well ekj am brinjen, daut hee ver däm Harn kjemt un doa opp emma blift.

²³Un Elkana, äa Maun, säd to ar: Doo waut en diene Uagen goot es; bliew, bat du am aufjewant hast; oba de Har bestädicht sien Wuat, waut hee jerät haft! Soo bleef de Fru un besorjd äarem Sän, bat see am aufjewant haud.

²⁴Un sooboolt see am aufjewant haud, brocht see am met sikj nopp met 3 junge Bolles un een Efa Mäl un een Schlauch Wien, un brocht am en daut Hus Gottes no Silo; un de Jung wia noch junk.

²⁵Un see schlachten däm jungen Boll un brochten däm Jung no Eli.

²⁶Un see säd: Ach, mien Har! Soo woa diene Seel läft, mien Har, ekj sie de Fru, daut hia bie die stunt, om däm Harn too bedden.

²⁷Om disem Jung ha ekj jeprachat, un de Har haft mie miene Bedd erhieet, dee ekj von am jebedd ha.

²⁸Soo ha uk ekj am däm Harn trigjjebrocht; fa aule Doag en sienem Läwen; es hee däm Harn jejäft. Un hee [see bäden] bäd doa selfst däm Harn aun.