Read De Bibel JHF 1. Samuel 12 Bible Online

1. Samuel 12 - De Bibel JHF bible

1. Samuel 12

¹Un Samuel räd too gaunz Israel: Kjikj, ekj ha en aulem opp june Stemm jehieet, waut jie to mie jesajcht ha un ha eenen Kjennich äwa junt jesat.

²Un nu kjikjt, de Kjennich jeit ver junt häa; oba ekj sie oolt un grau jeworden, un miene Säns, kjikj, see sent bie junt; un ekj ha ver junt jewaundelt von miene Jugent aun bat opp disem Dach.

³Hia sie ekj, zeicht jäajen mie ver däm Harn un ver sienem Jesaulwden! Wäm sien Rind ha ekj jenomen? Ooda wäm sien Äsel ha ekj jenomen? Ooda wäm ha ekj väajetrocken? Wäm ha ekj Jewault aunjedonen? Ooda ut wäm siene Haunt ha ekj Leesjelt jenomen, daut ekj doaderch miene Uagen vestoaken haud? Soo well ekj daut junt wadajäwen.

⁴Un see säden: Du hast ons nich väajetrocken un ons kjeene Jewault aunjedonen, un hast ut kjeenem siene Haunt waut jenomen.

⁵Un hee säd to an: De Har es Zeij jäajen junt, un Zeij sien Jesaulwda aun disem Dach, daut jie nuscht en miene Haunt jefungen ha! Un see säden: Hee es Zeij!

⁶Un Samuel räd toom Volkj: De Har es daut, dee Moses un Aaron enjesat haft un dee june Vodasch ut däm Ägiptenlaunt noppjefieet haft!

⁷Un nu komt häa, daut ekj ver däm Harn met junt recht äwa aule jerajchte Doten Gottes, dee hee aun junt un aun june Vodasch jedonen haft.

⁸Aus Jakob no Ägipten jekomen wia, doa schrieejen june Vodasch to däm Harn; un de Har schekjt Moses un Aaron, un see fieeden june Vodasch ut Ägipten rut un leeten an aun disen Uat wonen.

⁹Oba see vegauten von däm Harn, äarem Gott; un hee vekoft an enne Haunt Sisera, däm Häa Bowaschten von Hazor, un enne Haunt de Filista un de Haunt vom Kjennich von Moab, un see kjamften jäajen an.

¹⁰Doa schrieejen see to däm Harn un säden: Wie ha jesindicht, daut wie däm Harn veloten un däm Baalim un de Astarot jedeent ha; un nu rad ons ut de Haunt onse Fiend, soo well wie die deenen!

¹¹Un de Har schekjt Jerub-Baal un Bedan [Barak] un Jefta un Samuel, un hee rad junt runtom von june Fiend; un jie wonden en Sechaheit.

¹²Oba aus jie sagen, daut Nahas, de Kjennich äwa de Kjinja Amon, jäajen junt kaum, säd jie to mie: Ne, sonda een Kjennich saul äwa ons rejieren! Doa doch de Har, jun Gott, jun Kjennich wia.

¹³Un nu kjikj, doa es de Kjennich, däm jie erwält, däm jie haben wullen; un kjikj, de Har haft eenen Kjennich äwa junt jesat.

¹⁴Wan jie nu däm Harn ferchten un am deenen un opp siene Stemm hieren un jäajen däm Befäl Gottes nich wadaspanstich sent, un soo aus jie aus uk de Kjennich, dee äwa junt rejieet, däm Harn, junem Gott, nofolje!

¹⁵Oba wan jie nich opp de Stemm Gottes hieren un jäajen däm Befäl Gottes wadaspanstich sent, soo woat de Haunt Gottes jäajen junt sennen, aus jäajen june Vodasch.

¹⁶Uk nu komt noda un kjikjt dise groote Sach, dee de Har ver june Uagen doonen woat.

¹⁷Es nich nu de Weitarnt? Ekj well to däm Harn roopen, un hee woat Donna un Räajen jäwen; un jie sellen erkjanen un seenen, daut jun Beeset, daut jie jedonen ha, groot enne Uagen Gottes es, eenen Kjennich fa [äwa] junt to haben.

¹⁸Un Samuel roopt to däm Harn, un de Har jeef Donna un Räajen aun janem Dach. Doa haud daut gaunze Volkj ver däm Harn un ver Samuel sea Angst.

¹⁹Un daut gaunze Volkj säd to Samuel: Bedd däm Harn, dienem Gott, fa diene Kjnajchts, daut wie nich stoawen! Dan too aul onse Sinden ha wie daut Beese doatoo jedonen, eenen Kjennich fa ons too wenschen.

²⁰Un Samuel säd toom Volkj: Enjst junt nich! Jie ha zwoa aul dit Beese jedonen; blooss got nich auf vonne Nofoljen Gottes un deent däm Harn met junem gaunzem Hoaten;

²¹un got nich auf, dan jie wudden däm Nuschtjen nogonen, dee nuscht nuzt un nich rad, dan see sent nuscht.

²²Dan de Har woat om sienen groote Nomen wellen sien Volkj nich veloten; dan daut haft däm Harn jefollen, junt fa sikj toom Volkj too moaken.

²³Uk ekj - wiet saul daut von mie sennen, jäajen däm Harn too sindjen un opptohieren fa junt too bedden; sonda ekj woa junt däm gooden un rechtjen Wajch lieren.

²⁴Blooss enjst junt fa däm Harn, un deent am en Woarheit met junem gaunzen Hoaten; dan kjikjt, waut fa groote Dinj hee aun junt jedonen haft!

²⁵Oba wan jie nodäm iebel doonen, soo woa jie aus uk jun Kjennich wajchjeropt woaren.