Read De Bibel JHF 1. Samuel 13 Bible Online

1. Samuel 13 - De Bibel JHF bible

1. Samuel 13

¹Saul wia ... Joa oolt (em hebr. Takjst fält daut Ella), aus hee Kjennich wort; un hee rejieed twee Joa äwa Israel.

²Un Saul wäld sikj 3000 ut Israel; 2000 wieren bie Saul en Mikmas un enne Boaj von Betel, un 1000 wieren bie Jonatan en Gibea-Benjamin. Oba daut äwaje Volkj leet hee gonen, eenen jiedren no sienem Zelt.

³Un Jonatan schluach de Filista Oppstallinj, dee bie Geba wia, un de Filista hieeden daut. Un Saul leet em gaunzen Launt enne Posaun blosen un säd: De Hebräa sellen daut hieren!

⁴Un aus gaunz Israel sajen hieed: Saul haft de Oppstallinj de Filista jeschloagen, un Israel haud sikj uk bie de Filista stinkjent jemoakt, doa vesaumeld sikj daut Volkj hinja Saul häa no Gilgal.

⁵Un de Filista vesaumelden sikj toom Kaumf met Israel: 30 000 Woages un 6000 Rittasch, un Footvolkj, aus de Saunt, dee aum Mäaeewa es, aun Menj; un see jinjen nopp un loagaden sikj en Mikmas, oostlich von Bat-Awen.

⁶Un de Mana von Israel sagen, daut see en Noot wieren, dan daut Volkj wia enjstlich; un daut Volkj vestuak sikj enne Heelen un enne Hachelbescha un enne Boajklufte un enne Lajcha un enne Kule.

⁷Un de Hebräa jinjen äwa däm Jordan en daut Launt Gad un Gilead. Oba Saul wia noch en Gilgal, un daut gaunze Volkj wia enjstlich hinja am häa.

⁸Un hee luad säwen Doag, bat de von Samuel bestemde Tiet; oba Samuel kaum nich no Gilgal. Un daut Volkj vestreid sikj von am wajch.

⁹Doa säd Saul: Brinjt mie daut Brauntopfa un Dankopfa häa! Un hee opfad daut Brauntopfa.

¹⁰Un daut passieed, aus hee daut Brauntopfa jeopfat haud, kjikj, doa kaum Samuel; un Saul jinkj rut, am entjäajen, am to bejreessen.

¹¹Un Samuel säd: Waut hast du jedonen! Un Saul säd: Wiels ekj sach, daut et Volkj sikj von mie trant, un du to bestemde Tiet nich kaumst, un de Filista en Mikmas vesaumelt wieren, soo säd ekj:

¹²Nu woaren de Filista no mie no Gilgal raufkomen, un ekj ha daut Aunjesecht Gottes noch nich aunjeroopt! Un ekj äwastund mie un opfad daut Brauntopfa.

¹³Un Samuel säd to Saul: Du hast onweise jehaundelt, du hast daut Jeboot Gottes nich beoobacht, dienem Gott, daut hee die befoolen haft; dan nu haud de Har dien Kjennichtum äwa Israel opp eewich bestädicht;

¹⁴oba nu woat dien Kjennichtum nich bestonen. De Har haft sikj eenen Maun jesocht no sienem Hoaten, un de Har haft am toom Ferscht äwa sien Volkj bestalt; dan du hast nich beoobacht, waut de Har die befoolen haud.

¹⁵Un Samuel muak sikj opp un jinkj von Gilgal nopp no Gibea-Benjamin. Un Saul mostad daut Volkj, daut bie am wia, bie 600 Maun.

¹⁶Un Saul un Jonatan, sien Sän, un daut Volkj, daut noch bie am wia, loagaden en Geba-Benjamin; oba de Filista hauden sikj bie Mikmas jeloagat.

¹⁷Un de Venichta jinjen ut von däm Loaga de Filista en dree Gruppen; eene Grupp jinkj oppem Wajch no Ofra, nom Launt Schual han,

¹⁸un eene Grupp jinkj oppem Wajch no Bat-Horon, un eene Grupp jinkj oppem Wajch no de Jrens, de noppjeit äwa daut Tol Zeboim no de Wieste han.

¹⁹Un daut wia en gaunz Israel kjeen Schmett tofinjen; dan de Filista hauden jesajcht: Daut de Hebräa sikj nich Schwieet ooda Spies moaken!

²⁰Un gaunz Israel jinkj rauf no de Filista, een jiedra om sien Pluachschoa un sien Spodem un sien Biel un sien Siechel too schoape,

²¹wan de Schnied aune Siechel un aum Spodem un aune Fortj un aum Biel stomp wieren, un om däm Stachel too schoape.

²²Un daut passieed aum Kaumfdach, doa worden kjeen Schwieet noch Spies enne Haunt vom gaunzen Volkj jefungen, daut met Saul un met Jonatan wia; doch Saul un sien Sän Jonatan hauden dee.

²³Un eene Oppstallinj de Filista jinkj ut nom enjen Wajch von Mikmas.