Read De Bibel JHF 1. Samuel 15 Bible Online

1. Samuel 15 - De Bibel JHF bible

1. Samuel 15

¹Un Samuel räd too Saul: De Har haft mie jeschekjt, om die toom Kjennich too saulwen äwa sien Volkj, äwa Israel. Soo hia nu oppe Stemm de Wieed Gottes.

²Soo sajcht de Gott de Häaschoa: Ekj ha jeseenen, waut Amalek aun Israel deed, woo hee sikj am en däm Wajch jestalt haft, aus hee ut Ägipten rutjinkj.

³Nu go han un schlo Amalek, un vebaunt aules, waut hee haft, un schoon am nich; un brinj om Maun un Fru, vom Kjint bat toom Suenden, vom Rind bat toom Kjlienvee, vom Kameel bat toom Äsel.

⁴Doa roopt Saul daut Volkj opp un mostad an en Telaim, 200 000 Maun Footvolkj un 10 000 Maun von Juda.

⁵Un Saul kaum bat no de Staut de Amalekita, un hee läd eenen Hinjahault enne Läacht.

⁶Un Saul räd to de Kenita: Got han, got rut, got ut de Medd de Amalekita, daut ekj die nich met an venicht! Dan du, du hast Goodet bewäsen aun aule Kjinja Israel, aus see ut Ägipten rutjinjen. Un de Kenita jinjen ut de Medd de Amalekita.

⁷Un Saul schluach de Amalekita von Hawila bat no Sur han, daut ver Ägipten licht.

⁸Un hee jreep Agag, däm Kjennich äwa de Amalekita, läwendich; un daut gaunze Volkj vebaunt hee met däm schoapen Schwieet.

⁹Un Saul un daut Volkj veschoonde Agag un daut baste vom Kjlien- un Rindvee un de Tieren von de tweede Jeburt un de Mastschop un aules, waut goot wia, un see wullen daut nich vebaunen; oba aulet Vee, daut moaga un schwak wia, daut vebaunde see.

¹⁰Doa wia daut Wuat Gottes too Samuel aulsoo:

¹¹Daut deit mie leet, daut ekj Saul toom Kjennich jemoakt ha; dan hee haft sikj von mie aufjedreit un haft miene Wieed nich erfelt. Un Samuel wort truarich [oajalich] un schrieech to däm Harn de gaunze Nacht.

¹²Un Zemorjes muak Samuel sikj tiedich opp, Saul entjäajen. Un daut wort Samuel berecht un jesajcht: Saul es no Karmel jekomen; un kjikj, hee haft sikj een Denkjmol oppjestalt, un hee haft sikj jedreit un es wieda jegonen un no Gilgal raufjegonen.

¹³Un Samuel kaum no Saul; un Saul säd to am: Jesäajent best du von däm Harn! Ekj ha daut Wuat Gottes erfelt.

¹⁴Un Samuel säd: Waut es daut fa een Mekjre von Kjlienvee en miene Uaren, un een Brelle von Rinda, daut ekj hia?

¹⁵Un Saul säd: See ha dee von de Amalekita jebrocht, wiels daut Volkj daut Baste vom Kjlien- un Rindvee veschoont haft, om däm Harn, dienem Gott, too opfren; oba daut Äwaje ha wie vebaunt.

¹⁶Doa säd Samuel too Saul: Wacht, daut ekj die daut saj, waut de Har dise Nacht to mie jerät haft. Un hee säd to am: Räd!

¹⁷Un Samuel räd: Es daut nich aulsoo, aus du kjlien en diene Uagen wieescht, daut Haupt de Stam Israels? Un de Har saulwd die toom Kjennich äwa Israel.

¹⁸Un de Har haft die oppem Wajch jeschekjt un jesajcht: Go han un vebaunn de Sinda, de Amalekita, un kjamf jäajen an, bat du am venicht hast.

¹⁹Wuarom hast du dan de Stemm Gottes nich jehorcht, un best äwa däm Raup häajefollen un hast jedonen, waut bees enne Uagen Gottes es?

²⁰Un Saul säd to Samuel: Ekj ha de Stemm Gottes jehorcht un sie oppem Wajch jegonen, opp däm de Har mie jeschekjt haft; un ekj ha Agag, däm Kjennich äwa de Amalekita, häajebrocht, un de Amalekita ha ekj vebaunt.

²¹Oba daut Volkj haft von däm Raup jenomen: Kjlien- un Rindvee, daut Baste vom Vebaunte, om däm Harn, dienem Gott, en Gilgal too opfren.

²²Un Samuel säd to Saul: Haft de Har aun Brauntopfa un Schlachtopfa Lost, aus doaraun, daut maun de Stemm Gottes jehorcht? Kjikj, Jehorchen es bäta aus Opfa, oppmoakjsom sennen es bäta aus Fat von Bakj.

²³Dan aus de Sind de Woasaja es Wadaspanstichkjeit, un de Ieejenwellen aus Aufjettisch un Jetzendeenst. Wiels du daut Wuat Gottes veschmäten hast, soo haft hee die veschmäten, daut du nich mea Kjennich best.

²⁴Un Saul säd to Samuel: Ekj ha jesindicht, daut ekj däm Befäl Gottes un diene Wieed äwaträden ha; dan ekj haud fa daut Volkj Angst un opp siene Stemm jehieet.

²⁵Un nu, vezei doch miene Sinden, un drei met mie om, daut ekj ver däm Harn aunbäd.

²⁶Oba Samuel säd to Saul: Ekj drei nich met die om; dan du hast daut Wuat Gottes veschmäten, daut du nich mea Kjennich äwa Israel best.

²⁷Un aus Samuel sikj omdreid un gonen wull, doa pakt hee de Soom von sienem Bowakjleet, un dee reet auf.

²⁸Doa säd Samuel to am: De Har haft vondoag daut Kjennichtum Israels von die jeräten un daut dienem Näakjsten jejäft, dee bäta es aus du.

²⁹Un uk lieejen deit daut Vetruen [Bestendje] Israels nich, un hee endat uk nich; dan hee es nich een Mensch, om leet to doonen.

³⁰Un hee säd: Ekj ha jesindicht! Nu iea mie doch ver de Eltestasch von mienem Volkj un ver Israel, un drei met mie om, daut ekj ver däm Harn, dienem Gott, aunbäd.

³¹Un Samuel dreid om, Saul no, un Saul bäd ver däm Harn aun.

³²Un Samuel säd: Brinjt Agag, däm Kjennich äwa de Amalekita, no mie häa. Un Agag kaum lostich no am; un Agag säd: Woarhauft, de Doodes Bettanis es veschwungen!

³³Oba Samuel säd: Aus dien Schwieet Frues kjinjaloos jemoakt haft, soo saul diene Mutta unja de Frues kjinjaloos sennen! Un Samuel hakt Agag en Stekja ver däm Harn en Gilgal.

³⁴Un Samuel jinkj no Rama; un Saul jinkj nopp en sien Hus no Gibea-Saul.

³⁵Un Samuel sach Saul nich mea bat sienem Doodesdach; dan Samuel truad om Saul, daut et däm Harn leet deed, daut hee Saul toom Kjennich äwa Israel jemoakt haud.