Read De Bibel JHF 1. Samuel 16 Bible Online

1. Samuel 16 - De Bibel JHF bible

1. Samuel 16

¹Un de Har räd too Samuel: Woo lang west du om Saul truaren, doa ekj am doch veschmäten ha, daut hee nich mea Kjennich äwa Israel es? Fell dien Huarn met Eelj un go han, ekj well die no Isai, dän Betlehemita, schekjen; dan ekj ha mie unja siene Säns eenen Kjennich erseenen.

²Un Samuel säd: Woo kaun ekj hangonen? Wan Saul daut hieet, soo brinjt hee mie om. Un de Har säd: Nemm eene junge Koo met die un saj: Ekj sie jekomen, om däm Harn too opfren.

³Un lod Isai toom Opfre en, un ekj woa die sajen, waut du doonen saust; un du saust mie saulwen, däm ekj die sajen woa.

⁴Un Samuel deed, waut de Har jesajcht haud, un kaum no Betlehem. Doa kaumen de Eltestasch de Staut am enjstlich entjäajen un säden: Bediet dien komen Fräd?

⁵Un hee säd: Fräd! Ekj sie jekomen, om däm Harn too opfren. Heilicht junt un komt met mie toom Schlachtopfa. Un hee heilijd Isai un siene Säns un lod an toom Opfa en.

⁶Un daut passieed, aus see kaumen, doa sach hee Eliab un säd: Jewess, ver däm Harn es sien Jesaulwda!

⁷Oba de Har säd to Samuel: Kjikj nich opp daut Utseenen un opp siene groote Jestault, dan ekj ha am veschmäten; dan de Har kjikjt nich opp daut, opp waut de Mensch kjikjt; dan de Mensch kjikjt oppe Jestault; oba de Har sitt daut Hoat.

⁸Doa roopt Isai Abinadab un leet am ver Samuel komen. Un hee säd: Uk disem haft de Har nich erwält.

⁹Doa leet Isai Schamma komen. Un hee säd: Uk disem haft de Har nich erwält.

¹⁰Un Isai leet siene säwen Säns ver Samuel komen; oba Samuel säd to Isai: De Har haft dise nich erwält.

¹¹Un Samuel säd to Isai: Sent dit aule Jinjlinje? Un hee säd: Noch es de Jinjsta äwa, un kjikj, hee es Hoad biem Kjlienvee. Un Samuel säd to Isai: Schekj han un lot am holen; dan wie woaren ons nich aum Desch saten, bat hee hiahäa jekomen es.

¹²Un hee schekjt han un leet am komen; un hee wia rootlich, met scheene Uagen un gooden Utseenen. Un de Har säd: Opp, saulw am! Dan disa es et.

¹³Doa neem Samuel daut Eelj Huarn un saulwd am enne Medd von siene Breeda. Un de Jeist Gottes kaum äwa David [de Jeleewda] von däm Dach aun un wiedahan. Un Samuel muak sikj opp un jinkj no Rama.

¹⁴Oba de Jeist Gottes jinkj von Saul wajch, un een beesa Jeist von däm Harn enjst am.

¹⁵Un de Kjnajchts von Saul säden to am: Kjikj doch, een beesa Jeist von Gott enjst die.

¹⁶Daut befäl doch ons Har diene Kjnajchts, dee ver die sent, daut see eenen Maun sieekjen, dee oppe Hoap goot spälen kaun, wan de beesa Jeist von Gott äwa die kjemt, soo woat hee met siene Haunt spälen, un daut woat met die bäta woaren.

¹⁷Un Saul säd to siene Kjnajchts: Kjikjt junt no eenem Maun om, dee goot spälen kaun, un brinjt am no mie.

¹⁸Un eena von de Deena auntwuad un säd: Kjikj, ekj ha eenen Sän von Isai, däm Betlehemita, jeseenen, dee kaun spälen, un hee es een browa Maun un een Kjrichsmaun un vestendich en sienem Räden un een scheena Maun, un de Har es met am.

¹⁹Doa schekjt Saul Booten no Isai un säd: Schekj dienen Sän David no mie, dee biem Kjlienvee es.

²⁰Un Isai neem eenen Äsel met Broot un een Schlauch Wien un een Kosenbockje, un hee schekjt daut derch sienen Sän David aun Saul.

²¹Un David kaum no Saul un deend am; un hee leewd am sea, un hee wort sien Jewäadroaga.

²²Un Saul schekjt no Isai un säd: Lot David doch bie mie bliewen, dan hee haft Jnod en miene Uagen jefungen.

²³Un daut passieed, wan de Jeist von Gott äwa Saul kaum, soo naum David de Hoap un späld met siene Haunt; un Saul jinkj daut leichta, un am jinkj daut bäta, un de beesa Jeist jinkj von am.