Read De Bibel JHF 1. Samuel 17 Bible Online

1. Samuel 17 - De Bibel JHF bible

1. Samuel 17

¹Un de Filista saumelden äa Häa toom Kaumf un vesaumelden sikj bie Soko, daut Juda jehieet, un loagaden sikj bie Efes-Dammim, tweschen Soko un Aseka.

²Un Saul un de Mana von Israel vesaumelden un loagaden sikj enne Terebinten Läacht, un see stalden sikj en Schlachtordninj opp, de Filista jäajenäwa.

³Un de Filista stunden aun jane Sied aum Boajch, un Israel stunt aun dise Sied aum Boajch, un de Läacht wia tweschen an.

⁴Un een Kjamfa kaum ut däm Loaga de Filista väa, sien Nomen wia Goliat, ut Gat; sas Ellen un een Spaun huach.

⁵Un hee haud eenen koppanen Helm opp sienem Haupt, un hee wia met eenem Scheepenbrostschilt bekjleet, un daut Jewicht vom Brostschilt wia 5 000 Schekel Koppa.

⁶Un hee haud koppane Schajchten aun siene Been un eenen koppanen Spies tweschen siene Schulren;

⁷un de Stäl von sienem Spies wia aus een Wäwboom, un de Spetz von sienem Spies wia 600 Schekel Iesa. Un de Schilddroaga jinkj ver am häa.

⁸Un hee kaum un roopt de Schlachträaje Israels too un säd to an: Wuarom go jie ut, junt en Schlachtordninj opptostalen? Sie ekj nich een Filista, un jie Saul siene Kjnajchts? Wält junt eenen Maun, daut hee no mie raufkjemt!

⁹Wan hee met mie kjamfen kaun un mie schleit, soo well wie june Kjnajchts sennen; oba wan ekj am schlo un am ombrinj, soo sell jie onse Kjnajchts sennen un ons deenen.

¹⁰Un de Filista säd: Ekj ha de Schlachträaje Israels vespott aun disem Dach! Jeft mie eenen Maun, daut wie metenaunda kjamfen!

¹¹Un Saul un gaunz Israel hieeden dise Wieed vom Filista, un see hauden Angst un enjsten sikj sea.

¹²Oba David wia de Sän von janem Efratita von Betlehem-Juda, däm sien Nomen Isai wia un dee 8 Säns haud; un de Maun wia en de Doag von Saul oolt, oolt unja de Mana.

¹³Un de dree elste Säns von Isai wieren hanjegonen, see wieren met Saul toom Kaumf jegonen; un de Nomes von siene 3 Säns, dee toom Kaumf jegonen wieren Eliab, de Ieeschtjebuarna, un sien tweeda, Abinadab, un de dredda, Schamma.

¹⁴Un David wia de Jinjsta, un dee 3 Elste wieren met Saul jegonen.

¹⁵Oba David jinkj han un kaum wada trigj von Saul, om daut Kjlienvee von sienem Voda bie Betlehem too heeden.

¹⁶Un de Filista kaum zemorjes un oppenowent un stald sikj han, 40 Doag lank.

¹⁷Un Isai säd to sienem Sän David: Nemm doch fa diene Breeda dit Efa jereeschte Kjieena un dise 10 Brood, un brinj dee schwind en daut Loaga no diene Breeda;

¹⁸un dise 10 Schnäd Malkjkjees brinj däm Bowaschten äwa 1 000 un besäkj diene Breeda, om no äarem Gootgonen too froagen, un nemm eene Norecht von an met.

¹⁹Saul un see [de Breeda] un aule Mana von Israel wieren enne Terebinteläacht, un streeden met de Filista.

²⁰Doa muak David sikj tiedich Zemorjes opp un äwaleet daut Kjlienvee eenem Hoad; un hee naum un jinkj han, aus Isai am befoolen haud; un hee kaum oppem Loagaplauz, aus daut Häa, daut enne Schlachtrieej utjinkj, daut Kaumfjeschrecht opphoof.

²¹Un Israel un de Filista stalden sikj opp, Schlachtrieej jäajen Schlachtrieej.

²²Un David äwaleet daut Jereetschoft, daut hee druach, de Haunt de Wajchta vom Jereetschoft un rand enne Schlachtrieejen; un hee kaum un fruach siene Breeda no äarem Gootgonen.

²³Un aus hee met an räd, kjikj, doa kaum de Kjamfa rut, Goliat, sien Nomen, de Filista, ut Gat, ut de Schlachtrieejen de Filista un räd aus verhäa; un David hieed daut.

²⁴Un aule Mana von Israel, aus see däm Maun sagen, randen von am un enjsten sikj sea.

²⁵Un de Mana von Israel säden: Ha jie disem Maun jeseenen, dee noppkjemt? Dan om Israel too veachten, kjemt hee nopp. Un daut saul passieren, dee Maun, dee am schleit, däm well de Kjennich met grootem Rikj rikjmoaken, un hee well am siene Dochta jäwen, un daut Hus von sienem Voda well hee en Israel frie moaken.

²⁶Doa räd David to de Mana, dee bie am stunden, un säd: Waut saul met däm Maun passieren, dee disem Filista schleit un de Schaund von Israel wajchnemt? Dan wäa es dis Filista, dis Onbeschnädna, daut hee de Schlachtrieejen vom läwendjen Gott vespott?

²⁷Un daut Volkj räd to am de Wieed aus verhäa un säden: Soo saul däm Maun passieren, dee am ombrinjt.

²⁸Un Eliab, sien elsta Brooda, hieed too, aus hee to de Mana räd; un de Oaja flaumd jäajen David opp, un hee säd: Wuarom best du raufjekomen, un wäm hast du jane weinje Schop enne Wieste äwaloten? Ekj kjan goot - dien Äwamoot un de Boosheit en dienem Hoaten; dan om däm Kaumf to seenen, best du raufjekomen.

²⁹Un David säd: Waut ha ekj nu jedonen? Es et nich de Mieej wieet?

³⁰Un hee dreid sikj von am auf, no eenem aundren han, un räd dee selje Wieed; un daut Volkj jeef am Auntwuat aus verhäa.

³¹Un de Wieed, dee David jerät haud, worden jehieet un maun vetald dee däm Saul; un hee leet am holen.

³²Un David säd to Saul: Daut saul kjeen Menschenhoat wäajen am mootloos woaren! Dien Kjnajcht well gonen un met disem Filista kjamfen.

³³Oba Saul säd to David: Du kaust nich jäajen disem Filista gonen, om met am to kjamfen; dan du best een Jinjlinkj, oba hee es een Kjrichsmaun von siene Jugent aun.

³⁴Doa säd David too Saul: Dien Kjnajcht heed daut Kjlienvee von sienem Voda; doa kaum een Leiw ooda een Boa un druach een Schop vonne Häad wajch,

³⁵soo rand ekj am no un schluach am un reet daut ut siene Frät; un hoof hee sikj jäajen mie, soo pakt ekj am aum Boat un schluach am un muak am doot.

³⁶Soo aus däm Leiw soo uk däm Boa haft dien Kjnajcht jeschloagen; un dis Filista, dis Onbeschnädna, saul aus eena von an sennen, wiels hee de Schlachtrieejen vom läwendjen Gott vespott haft!

³⁷Un David säd: De Har, dee mie ut de Klaue vom Leiw un Boa jerat haft, hee woat mie ut disem Filista siene Haunt raden. Un Saul säd to David: Go han, un de Har es met die!

³⁸Un Saul trock David sienem Rock aun un sad eenen koppanen Helm opp sien Haupt un trock am een Brostschilt aun.

³⁹Un David bung sien Schwieet äwa sienen Rock om un wull gonen, dan hee haud daut noch niemols vesocht. Doa säd David too Saul: Ekj kaun nich doamet gonen, dan ekj ha daut niemols vesocht. Un David läd daut von sikj auf.

⁴⁰Un hee naum sienen Stock en siene Haunt un socht sikj 5 glaute Steena ut däm Bach un deed dee en siene Hoadstausch, dee hee haud, enne Tausch, un siene Schliesa haud hee en siene Haunt; un hee jinkj nom Filista.

⁴¹Un de Filista jinkj un kaum emma noda no David, un de Maun, dee sien Schilt druach, ver am häa.

⁴²Un aus de Filista hankjikjt un David sach, veacht hee am; dan hee wia een Jinjlinkj un rootlich, doatoo scheen vom Utseenen.

⁴³Un de Filista säd to David: Sie ekj een Hund, daut du met eenem Stock no mie kjeemst? Un de Filista flucht äwa David bie siene Jetta.

⁴⁴Un de Filista säd to David: Komm no mie, daut ekj dien Fleesch de Himmelsväajel un de Tieren de Stap jäw!

⁴⁵Un David säd toom Filista: Du kjeemst no mie met Schwieet un Spies un Schmietspiess; oba ekj kom no die em Nomen Gottes de Häaschoa, däm Gott de Schlachtrieejen Israels, dee du vespott hast.

⁴⁶Aun disem Dach woat de Har die en miene Haunt jäwen, un ekj woa die schlonen un dien Haupt von die nämen; un dienen Kjarpa un de Doodeskjarpa vom Häa de Filista woa ekj aun disem Dach de Himmelsväajel un däm Wilt de Ieed jäwen; un de gaunze Ieed saul erkjanen, daut Israel eenen Gott haft.

⁴⁷Un dise gaunze Vesaumlunk saul erkjanen, daut de Har nich derch Schwieet un Spies rad; dan de Kaumf es däm Harn siena, un hee woat junt en onse Haunt jäwen!

⁴⁸Un daut passieed, aus de Filista sikj oppmuak un noda kaum, David entjäajen, doa spood David sikj un rand no de Schlachtrieej, däm Filista entjäajen.

⁴⁹Un David strakj siene Haunt enne Tausch un naum eenen Steen rut, un hee schliesad un troff däm Filista aun sienem Stiern; un de Steen schluach sien Stiern en, un hee foll opp sien Aunjesecht, oppe Ieed.

⁵⁰Soo wia David, met de Schliesa un met däm Steen, stoakja aus de Filista, un hee schluach däm Filista un brocht am om; un David haud kjeen Schwieet enne Haunt.

⁵¹Un David rand un klunjd opp däm Filista, un hee neem sien Schwieet un trock daut ut sienem Schuwsel un muak am doot, un hakt am däm Kopp auf. Oba aus de Filista sagen, daut äa Held doot wia, doa randen see.

⁵²Un de Mana von Israel un Juda muaken sikj opp un hoowen een Jeschrecht un vefoljde de Filista bat nom Engank enne Läacht un bat de Dooasch von Ekron; un de Jeschloagne de Filista follen oppem Wajch no Schaaraim un bat Gat un bat Ekron.

⁵³Un de Kjinja Israel jinjen trigj von de Vefoljunk de Filista un plindaden äa Loaga.

⁵⁴Un David naum daut Haupt vom Filista un brocht daut no Jerusalem; oba sien Jewäa läd hee en sien Zelt.

⁵⁵Un aus Saul David utgonen sach, däm Filista entjäajen, säd hee too Abner, däm Häa Bowaschten: Wäm sien Sän es dis Jinjlinkj, Abner? Un Abner säd: Soo woa diene Seel läft, oo Kjennich, ekj weet daut nich!

⁵⁶Un de Kjennich säd: Froag du, wäm sien Sän de junge Maun es.

⁵⁷Un aus David vonne Filista Schlacht trigjkaum, doa naum am Abner un brocht am no Saul; un daut Haupt vom Filista wia en siene Haunt.

⁵⁸Un Saul säd to am: Wäm sien Sän best du, Jinjlinkj? Un David säd: De Sän von dienem Kjnajcht Isai, däm Betlehemita.