Read De Bibel JHF 1. Samuel 18 Bible Online

1. Samuel 18 - De Bibel JHF bible

1. Samuel 18

¹Un daut passieed, aus hee oppjehieet haud, met Saul to räden, doa vebung sikj Jonatan siene Seel met David siene Seel; un Jonatan leewd am aus siene Seel.

²Un Saul naum am aun janem Dach no sikj un leet am nich no sienem Vodahus trigjgonen.

³Un Jonatan un David schlooten eenen Bunt, wiels hee am leewd aus siene Seel.

⁴Un Jonatan trock daut Bowakjleet ut, daut hee aunhaud, un jeef daut David, un sien Rock un sien Schwieet un sien Boagen un sienen Jirtel.

⁵Un David jinkj ut, wuahan emma Saul am schekjt, un hee haud Jelinje; un Saul sad am äwa de Kjrichslied; un hee wia, enne Uagen vom gaunzen Volkj un uk enne Uagen von Saul siene Kjnajchts, aunjenäm jeleeft.

⁶Un daut passieed, aus see nohus kaumen, aus David vonne Filista Schlacht trigjkaum, doa jinjen de Frues ut aule Städa Israels met Jesank un Reijen däm Kjennich Saul entjäajen, met Tamburin, met Jubel un met Spälen.

⁷Un de Frues, dee doa spälden, sungen un säden: Saul haft 1000 jeschloagen, un David siene 10 000.

⁸Doa wort Saul sea oajalich, un dit Wuat wia iebel en siene Uagen, un hee säd: See ha David 10 000 jejäft, un mie ha see 1000 jejäft; daut fält am blooss noch daut Kjennichtum.

⁹Un Saul kjikjt scheef opp David von janem Dach aun un uk wiedahan.

¹⁰Un daut passieed aum aundren Dach, doa kaum een beesa Jeist von Gott äwa Saul, un hee profezeid bennen em Hus; oba David späld met siene Haunt, jieda Dach, un de Spies wia en Saul siene Haunt.

¹¹Un Saul schmeet däm Spies un docht: Ekj well David aune Waunt spekje! Oba David dreid sikj twee Mol von am auf.

¹²Un Saul enjst sikj fa David; dan de Har wia met am, un von Saul wia hee wajchjerant.

¹³Un Saul deed am von sikj wajch un sad am aus Bowaschta äwa 1 000; un hee jinkj ver däm Volkj ut un en.

¹⁴Un David haud Jelinje opp aul siene Wäaj, un de Har wia met am.

¹⁵Un aus Saul sach, daut hee Jelinjen haud, enjst hee sikj fa am.

¹⁶Oba gaunz Israel un Juda leewden David, dan hee jinkj ver an ut un en.

¹⁷Un Saul säd to David: Kjikj, miene elste Dochta Merab, dee well ekj die to Fru jäwen; blooss sie mie een browa Maun un fia de Kjamf Gottes! Oba Saul docht: Miene Haunt saul nich jäajen am sennen, sonda de Haunt de Filista saul jäajen am sennen.

¹⁸Un David säd to Saul: Wäa sie ekj, un waut es mien Läwen un mien Voda sien Jeschlajcht en Israel, daut ekj de Schwiasän vom Kjennich woaren saul?

¹⁹Un to de Tiet passieed daut, aus Merab, Saul siene Dochta, däm David sull jejäft woaren, doa wort see Adriel, däm Meholatita, to Fru jejäft.

²⁰Un Michal, Saul siene Dochta, leewd David; un maun berecht daut däm Saul, un de Sach wia rajcht en siene Uagen.

²¹Un Saul säd: Ekj well ar am jäwen, daut see am toom Faul woat un de Filista Haunt jäajen am es. Un Saul säd to David: Toom tweeden Mol saust du vondoag mien Schwiasän woaren.

²²Un Saul befool siene Kjnajchts: Räd em Jeheemen too David un sajcht: Kjikj, de Kjennich haft jefaulen aun die, un aul siene Kjnajchts leewen die; soo woa nu de Schwiasän vom Kjennich.

²³Un Saul siene Kjnajchts räden dise Wieed ver David siene Uaren. Un David säd: Es daut leicht en june Uagen, däm Kjennich sien Schwiasän to woaren? Ekj sie doch een oama un jerinja Maun.

²⁴Un Saul siene Kjnajchts berechten am daut un säden: Dise Wieed haft David jerät.

²⁵Doa säd Saul: Soo sell jie too David sajen: De Kjennich haft kjeen Jefaulen aun een Brutpries, sonda no 100 Väahute de Filista, om sikj aune Kjennichsfiend too rajche. Oba Saul docht David derch de Haunt de Filista toom Faul to brinjen.

²⁶Un siene Kjnajchts berechten David dise Wieed, un de Sach wia rajcht en David siene Uagen, de Schwiasän vom Kjennich to woaren. Un de Doag wieren noch nich voll,

²⁷doa muak David sikj opp un jinkj han, hee un siene Mana, un schluach unja de Filista 200 Mana; un David brocht äare Väahut, un maun brocht de aula däm Kjennich, doamet hee däm Kjennich sien Schwiasän wort. Un Saul jeef am siene Dochta Michal to Fru.

²⁸Un Saul sach un erkjand, daut de Har met David wia; un Michal, Saul siene Dochta, leewd am.

²⁹Un Saul enjst sikj noch mea fa David; un Saul wort aule Doag David sien Fiend.

³⁰Un de Ferschten de Filista jinjen ut; un daut passieed, soo foaken see utjinjen, haud David mea Jelinje aus Saul siene aule Kjnajchts, un sien Nomen wort sea jeacht.