Read De Bibel JHF 1. Samuel 19 Bible Online

1. Samuel 19 - De Bibel JHF bible

1. Samuel 19

¹Un Saul räd too sienem Sän Jonatan un to aul siene Kjnajchts, daut hee David ombrinjen well. Oba Jonatan, Saul sien Sän, haud grootet Jefaulen aun David.

²Un Jonatan berecht daut David un säd: Mien Voda Saul sieekjt die omtobrinjen; un nu hool die doch Morjen en Acht un hool die veborje un vestäakj die.

³Oba ekj well rutgonen un aune Sied von mienem Voda oppem Flekj stonen, woa du best, un ekj well to mienem Voda von die räden un seenen, woo daut es, un die daut berechten.

⁴Un Jonatan räd goodet too sienem Voda Saul von David un säd to am: De Kjennich vesindij sikj nich aun sienem Kjnajcht, aun David; dan hee haft nich jäajen die jesindicht, un siene Doten sent die sea toom nutzen.

⁵Un hee haft sien Läwen opp Späl jesat un de Filista jeschloagen, un de Har haft däm gaunzen Israel eene groote Radinj jeschauft. Du hast daut jeseenen un die jefreit; un wuarom west du die aun onschuldjen Bloot vesindje, endäm du David onen Uasoak ombrinjst?

⁶Un Saul hieed opp Jonatan siene Stemm, un Saul schwua: Soo woa de Har läft, hee saul nich stoawen!

⁷Doa roopt Jonatan David, un Jonatan berecht am aul dise Wieed. Un Jonatan brocht David no Saul, un hee wia ver am aus verhäa.

⁸Un daut bruak wada een Kjrich ut; un David jinkj ut un kjamft jäajen de Filista un recht eene groote Schlacht unja an aun, un see randen fa am.

⁹Un een beesa Jeist von Gott kaum äwa Saul; un hee saut en sienem Hus, sien Spies wia en siene Haunt, un David späld oppem Seidespäl met siene Haunt.

¹⁰Un Saul socht David met däm Spies aune Waunt too spekje; oba hee sprunk tosied, un hee stad däm Spies enne Waunt. Un David rand un entkaum aun jane Nacht.

¹¹Doa schekjt Saul Booten en David sien Hus, om am to bewoaken un om Zemorjes am omtobrinjen. Oba Michal, siene Fru, säd David daut, un säd: Wan du dise Nacht nich diene Seel radst, soo woascht du morjen stoawen.

¹²Un Michal leet David derch daut Fensta rauf; un hee jinkj wajch un rand un kaum doavon.

¹³Un Michal naum däm Terafim un läd am em Bad un läd de jeflochtne Kosenhoa aun sienem Haupt un dakjt am met de Dakj too.

¹⁴Un Saul schekjt Booten, om David to holen; un see säd: Hee es krank.

¹⁵Doa schekjt Saul de Booten, om David to seenen, un säd: Brinjt am em Bad no mie häa, daut ekj am doot moak!

¹⁶Un Booten kaumen, un kjikj, de Terafim wia em Bad, un de jeflochtne Kosenhoa aun sienem Haupt.

¹⁷Doa säd Saul too Michal: Wuarom hast du mie soo bedrieecht un hast mienen Fiend gonen loten, daut hee wajchjerant es? Un Michal säd to Saul: Hee säd to mie: Lot mie gonen! Wuarom sull ekj die ombrinjen?

¹⁸Oba David wia entkomen un wajchjerant; un hee kaum no Samuel no Rama un berecht am aules, waut Saul am jedonen haud. Un hee un Samuel jinjen han un wonden en Najot.

¹⁹Un daut wort Saul berecht un jesajcht: Kjikj, David es en Najot en Rama.

²⁰Doa schekjt Saul Booten, om David to holen. Oba aus see de Vesaumlunk de Profeeten sagen, dee doa profezeide, un Samuel aus Väastona äwa an doabie stonen, doa kaum de Jeist Gottes äwa Saul siene Booten, un uk see profezeide.

²¹Un maun säd daut Saul, un hee schekjt aundre Booten, un uk dee profezeide; un Saul schekjt wada dredde Booten, un uk dee profezeide.

²²Doa jinkj uk hee no Rama un kaum nom groote Borm, dee en Seku es; un hee fruach un säd: Woa sent Samuel un David? Un maun säd am: Kjikj, en Najot en Rama.

²³Un hee jinkj doa han, no Najot en Rama; un uk äwa am kaum de Jeist Gottes, un hee jinkj, un profezeid emma wada, bat hee en Najot en Rama aunkaum.

²⁴Un uk hee trock siene Bowakjleeda ut, un uk hee profezeid ver Samuel, un hee lach doa däm gaunzen Dach un de gaunze Nacht noaktich. Doahäa sajcht maun: Es uk Saul unja de Profeeten?