Read De Bibel JHF 1. Samuel 20 Bible Online

1. Samuel 20 - De Bibel JHF bible

1. Samuel 20

¹Un David rand von Najot bie Rama wajch; un hee kaum un säd to Jonatan: Waut ha ekj jedonen? Waut es miene Schult, un waut es miene Sind ver dienem Voda, daut hee no mienem Läwen tracht?

²Un hee säd to am: Daut saul nich sennen! Du woascht nich stoawen. Kjikj, mien Voda deit kjeene groote noch kjliene Sach, onen daut hee dee miene Uaren openboat; un wuarom sull mien Voda dise Sach fa mie veheimlichen? Daut es nich soo.

³Un David schwua doatoo un säd: Dien Voda weet daut, daut ekj Jnod en diene Uagen jefungen ha, un hee haft jedocht: Jonatan saul dit nich weeten, doamet hee nich truarich es. Oba doch, soo woa de Har läft un diene Seel läft, blooss een Schrett es tweschen mie un däm Doot!

⁴Un Jonatan säd to David: Waut diene Seel sajcht, daut well ekj fa die doonen.

⁵Un David säd to Jonatan: Kjikj, morjen es Niemon, doa ekj met däm Kjennich biem Äten setten sull; soo lot mie gonen, un ekj well mie oppe Stap vestoppen, bat däm dredden Dach oppenowent.

⁶Wan dien Voda no mie froagen sull, soo saj: David bedd mie sea, no Betlehem, siene Staut, too ranen; dan doa es daut Joa Opfa fa de gaunze Famielje.

⁷Wan hee soo sajcht: Daut es goot, soo es et goot om dienen Kjnajcht; oba woat hee oajalich, soo weet, daut dit Beese bie am beschloten es.

⁸Bewies doch Goodet aun dienem Kjnajcht, dan du hast dienem Kjnajcht en eenen Bunt Gottes met die gonen loten! Oba wan eene Ojjerajchtichkjeit aun mie es, soo brinj du mie om; dan wuarom wust du mie no dienem Voda brinjen?

⁹Un Jonatan säd: Daut es wiet von die! Dan wan ekj secha weet, daut et von mienem Voda beschloten es, daut et Beese äwa die kjemt, sull ekj die daut nich berechten?

¹⁰Un David säd to Jonatan: Wäa sull mie daut berechten, wan dien Voda die groff auntwuat?

¹¹Un Jonatan säd to David: Komm un lot ons rut oppe Stap gonen. Un see jinjen beid oppe Stap.

¹²Un Jonatan säd to David: De Har, Gott Israels! Wan ekj mienem Voda morjen om dise Tiet ooda äwamorje utforsch, un kjikj, daut steit goot om David, un ekj nich no die schekj un daut diene Uaren openboa,

¹³soo doo de Har däm Jonatan, un soo doo doatoo! Wan mien Voda Beeset jäajen die väahaft, soo woa ekj daut dienem Ua openboaren un die gonen loten, daut du en Fräd wajchjeist, un de Har saul met die sennen, soo aus hee met mienem Voda jewast es.

¹⁴Un nich blooss soo lang ekj läw, un nich blooss aun mie saust du daut Goode Gottes bewiesen, daut ekj nich stoaw;

¹⁵uk mienem Hus saust du nich eewichlich diene Jnod wajchnäme, uk nich, wan de Har David siene Fiend utroden woat, eenem jiedren vom Ieedboddem wajchnemt!

¹⁶Un Jonatan muak eenen Bunt met David sienem Hus un säd: Soo foddat daut de Har vonne Haunt David siene Fiend!

¹⁷Un Jonatan leet David nochmol bie siene Leew to am schwieren; dan hee leewd am, aus hee siene ieejne Seel leeft.

¹⁸Un Jonatan säd to am: Morjen es Niemon; un maun woat no die froagen, dan diene Sett woat ladich bliewen.

¹⁹Oba aum dredden Dach komm rauf un komm aun däm Uat, woa du die aum Dach de Dot vestoaken haudst, un bliew biem Steen Asel.

²⁰Un ekj, ekj woa 3 Feilasch aun siene Sied vebie scheeten, aus wan ekj fa mie no eenem Ziel scheet.

²¹Un kjikj, ekj woa däm Jung schekjen: Go han, sieekj de Feilasch! Wan ekj toom Jung saj: Kjikj, de Feilasch sent von die dichta hiahäa, nemm dee! Soo komm; dan daut steit goot om die, un doa es nuscht, soo woa de Har läft!

²²Oba wan ekj aulsoo toom Jung saj: Kjikj, de Feilasch sent von die wieda auf! Soo go, dan de Har schekjt die wajch.

²³Oba waut de Sach betraft, dee wie beräd ha, ekj un du, kjikj, de Har es tweschen mie un die eewichlich.

²⁴Un David vestuak sikj oppe Stap. Un daut wort Niemon, un de Kjennich sad sikj too Moltiet, om to äten.

²⁵Un de Kjennich sad sikj opp sienem Plauz, aus emma, opp siene Sett aune Waunt; un Jonatan stunt opp, un Abner sad sikj aun Saul siene Sied; un David sien Plauz bleef ladich.

²⁶Oba Saul säd aun däm Dach nuscht, dan hee docht: Daut es am waut passieet; hee es nich rein, jewess, hee es nich rein.

²⁷Un aum aundren Niemon Dach passieed daut, däm tweeden, aus David sien Plauz ladich bleef, doa säd Saul too sienem Sän Jonatan: Wuarom es de Sän von Isai nich jistren noch vondoag too Moltiet jekomen?

²⁸Un Jonatan auntwuad, sienem Voda, Saul: David haft mie drinjent jebedd, no Betlehem too gonen, un hee säd:

²⁹Lot mie doch gonen, dan wie ha een Famielje Opfa enne Staut; un mien Brooda haft mie selfst enjeloden; un nu, wan ekj Jnod en diene Uagen jefungen ha, soo lot mie doch gonen, daut ekj miene Breeda seenen kaun! Doarom es hee nich toom Kjennichsdesch jekomen.

³⁰Doa flaumd de Oaja en Saul opp jäajen Jonatan, un hee säd to am: Du, Sän von eene Wadaspanstje! Weet ekj daut nich, daut du däm Sän von Isai too diene Schaund utjewält hast, die un diene Mutta too Schaund?

³¹Dan aul de Doag, dee de Sän von Isai oppe Ieed läft, woascht du nich faust stonen, noch du noch dien Kjennichtum; un nu schekj han un lot am no mie brinjen, dan hee es een Kjint toom Doot!

³²Un Jonatan auntwuad sienem Voda Saul un säd to am: Wuarom saul hee stoawen? Waut haft hee jedonen?

³³Doa schmeet Saul sien Spies no am, om am to trafen; un Jonatan erkjand, daut et von sienem Voda beschloten wia, David omtobrinjen.

³⁴Un Jonatan stunt vom Desch em jläjendem Oaja opp, un hee aut aum tweeden Niemon Dach nuscht; dan hee wia bedrekjt om David, wiels sien Voda am jeloamt haud.

³⁵Un Zemorjes passieed daut, doa jinkj Jonatan rut oppe Stap, aun däm Uat, däm hee un David beräd hauden, un een kjliena Jung wia met am.

³⁶Un hee säd to sienem Jung: Ran, sieekj de Feilasch, dee ekj scheet! De Jung rand, un hee schoot däm Feila äwa am wajch.

³⁷Un aus de Jung aun de Städ kaum, woa de Feila wia, däm Jonatan jeschote haud, doa roopt Jonatan däm Jung no un säd: De Feila es von die wieda auf!

³⁸Un Jonatan roopt däm Jung no: Spood die, sto nich stell! Un Jonatan sien Jung laus däm Feila opp un kaum no sienem Harn.

³⁹Oba de Jung wist nuscht; blooss Jonatan un David wisten om de Sach.

⁴⁰Un Jonatan jeef sien Jewäa sienem Jung un säd to am: Go, brinj dee enne Staut.

⁴¹De Jung jinkj, un David muak sikj opp vonne siedliche Sied häa un foll opp sien Aunjesecht oppe Ieed un venäjd sikj dree Mol ; un see kusten sikj un hielden metenaunda, bat David äwa aules sea hield.

⁴²Un Jonatan säd to David: Go han en Fräd! Daut es, aus wie beid em Nomen Gottes jeschwuaren ha, aus wie säden: De Har es tweschen mie un die un tweschen mienem Somen un dienem Somen opp eewich!