Read De Bibel JHF 1. Samuel 21 Bible Online

1. Samuel 21 - De Bibel JHF bible

1. Samuel 21

¹Un David muak sikj opp un jinkj wajch; oba Jonatan kaum trigj enne Staut.

²Un David kaum no Nob, no Ahimelech, däm Priesta. Un Ahimelech kaum David enjstlich entjäajen un säd to am: Wuarom best du auleen, un kjeena es bie die?

³Un David säd toom Priesta Ahimelech: De Kjennich haft mie eene Sach befoolen; un hee säd to mie: Kjeena saul om de Sach weeten, en dee ekj die schekj un dee ekj die befoolen ha! Un de Junges ha ekj aun däm un däm Uat jeloten.

⁴Un nu, waut es en diene Haunt? Jeff mie 5 Brood enne Haunt, ooda waut du hast.

⁵Un de Priesta auntwuad David un säd: Daut es kjeen jeweenlichet Broot en miene Haunt, sonda blooss heiljet Broot es doa; wan sikj blooss de Junges vonne Frues enthoolen ha!

⁶Un David auntwuad däm Priesta un säd to am: Jo, dan ons sent kjeene Frues bejäajent aul jistren un eeajistren, aus ekj utjinkj, un de Jefässa de Junges sent heilich. Un doch es daut een jeweenlichet Broot, un daut om soo mea, aus vondoag nieet enne Jefässa jeheilicht woat.

⁷Doa jeef de Priesta am heiljet Broot; dan doa wia kjeen aundret Broot, aus blooss daut Aunsechtsbroot, daut ver däm Harn wajchjenomen wia, om woamet (freschet) Broot nopptolajen aun däm Dach, doa maun dee wajchneem.

⁸(Oba doa wia een Maun von Saul siene Kjnajchts, dee sikj ver däm Harn trigjjetrocken opphild, sien Nomen wia Doeg, de Edomieta; een Oppsechta unja Saul siene Hoads.)

⁹Un David säd to Ahimelech: Es hia nich irjent een Spies ooda een Schwieet? Dan noch mien Schwieet noch mien Jewäa ha ekj met mie jenomen, wiels de Kjennichssach drinjent wia.

¹⁰Un de Priesta säd: Daut Schwieet von Goliat, dän Filista, däm du enne Terebinten Läacht jeschloagen hast, kjikj, daut es en een Bowakjleet jewekjelt unja däm Efod; wan du die daut nämen west, soo nemm daut, dan daut es hia kjeen aundret buta disem. Un David säd: Siensjlikjen jeft daut nich; jeff mie daut!

¹¹Un David muak sikj opp un rand aun janem Dach ver Saul, un hee kaum no Achisch, däm Kjennich von Gat.

¹²Un Achisch siene Kjnajchts säden to am: Es daut nich David, de Laundeskjennich? Ha see nich von disem enne Reijen jesungen un jesajcht: «Saul haft 1000 jeschloagen, un David siene 10 000»?

¹³Un David neem sikj dise Wieed too Hoaten un enjst sikj sea ver Achisch, däm Kjennich von Gat.

¹⁴Un hee vestald sien Vestaunt ver äare Uagen un deed onsennich unja äare Henj, un hee kjritseld aune Dooa Däaren un leet sien Kjwiel opp sienen Boat raufranen.

¹⁵Doa kaum Achisch no siene Kjnajchts: Kjikjt, jie seenen eenen wonsennjen Maun; wuarom brinj jie am no mie?

¹⁶Fält mie daut aun Wonsennje, daut jie disem häajebrocht ha, om sikj bie mie wonsennich too vehoolen? Sull hee en mien Hus komen?