Read De Bibel JHF 1. Samuel 22 Bible Online

1. Samuel 22 - De Bibel JHF bible

1. Samuel 22

¹Un David jinkj von doa wajch un rand enne Heel Adullam. Un aus siene Breeda un sien gaunzet Vodahus daut hieeden, kaumen see rauf no am.

²Un daut vesaumelden sikj no am maunchalei Mana, un jiedra, dee en Noot un Schulde hauden, un jiedra, dee von Hoaten betriept wia, un hee wort äa Bowaschta, un daut wieren bie am bie 400 Maun.

³Un David jinkj von doa no Mizpe-Moab; un hee säd toom Kjennich von Moab: Lot doch mienem Voda un miene Mutta bie junt sennen, bat ekj weet, Waut Gott mie doonen woat.

⁴Un hee fieed an ver däm Kjennich von Moab, un see wonden bie am aule Doag, dee David oppe Boajch Fastinj wia.

⁵Un Gad, de Profeet, säd to David: Bliew nich oppe Boajch Fastinj; sonda go en daut Launt Juda. Un David jinkj han un kaum en däm Woolt Heret.

⁶Un aus Saul hieed, daut David un de Mana, dee bie am wieren, entdakjt wieren, - oba Saul saut en Gibea, unja de Tamariske oppem Aunboajch, met sienem Spies enne Haunt, un aul siene Kjnajchts stunden bie am,

⁷doa säd Saul to siene Kjnajchts, dee bie am stunden: Hieet doch, jie Benjaminita! Woat uk de Sän Isai junt aulem Felda un Wienboaj jäwen, junt aule too Bowaschte äwa 1000 un to Bowaschte äwa 100 moaken,

⁸daut jie junt aula jäajen mie vebungen ha, un kjeena dee daut miene Uaren openboat, wan mien Sän eenen Bunt met däm Sän Isai jemoakt haft, un kjeena von junt kjrenkjt sikj mienthaulwen un dee daut miene Uaren openboat, daut mien Sän miene Kjnajchts jäajen mie oppjehetzt haft, aus et aun disem Dach es?

⁹Doa auntwuad Doeg, de Edomieta, dee bie Saul siene Kjnajchts stunt, un säd: Ekj sach däm Sän Isai no Nob komen no Ahimelech, däm Sän von Ahitub.

¹⁰Un hee befruach däm Harn fa am un jeef am Broot, un daut Schwieet von Goliat, vom Filista, jeef hee am.

¹¹Doa schekjt de Kjennich han, Ahimelech, Ahitub sien Sän, däm Priesta, to roopen, soo aus sien gaunzet Vodahus, de Priesta, dee en Nob wieren; un see kaumen aula nom Kjennich.

¹²Un Saul säd: Hea doch, Ahitub sien Sän! Un hee säd: Hia sie ekj, mien Har!

¹³Un Saul säd to am: Wuarom ha jie junt jäajen mie veschwuaren, du un de Sän Isai, endäm du am Broot un een Schwieet jeefst un Gott fa am befroagt hast, doamet hee aus Jäajna jäajen mie oppsteit, aus daut aun disem Dach es?

¹⁴Un Ahimelech auntwuad däm Kjennich un säd: Un wäa unja aul diene Kjnajchts es aus David, tru, un däm Kjennich sien Schwiasän, un dee Toogank haft too dienem jeheimen Rot un en dienem Hus jeieet es?

¹⁵Ha ekj vondoag aunjefongen, Gott fa am to befroagen? Daut es wiet von mie! De Kjennich laj soowaut sienem Kjnajcht nich too Laust, noch mienem gaunzen Vodahus; dan dien Kjnajcht haft von aul disem nich jewist, noch Kjlienet noch Grootet.

¹⁶Oba de Kjennich säd: Du motst stoawen, Ahimelech, du un dien gaunzet Vodahus!

¹⁷Un de Kjennich säd to siene perseenliche Wajchta, dee bie am stunden: Dreit junt un brinjt de Priesta Gottes om, wiels uk äare Haunt met David es, un wiels see wisten, daut hee oppe Flucht wia un miene Uaren daut nich openboat ha. Oba dee Kjennichskjnajchts wullen äare Haunt nich utstrakjen, om de Priesta Gottes omtobrinjen.

¹⁸Doa säd de Kjennich too Doeg: Drei du die un brinj de Priesta om! Un Doeg, de Edomieta, dreid sikj un foll äwa de Priesta häa, un hee brocht aun däm seljen Dach 85 Maun om, dee daut leiwend Efod druagen.

¹⁹Un Nob, de Priesta Staut, schluach hee met däm schoapen Schwieet, von Maun bat to Fru, vom Kjint bat toom Suenden, un Rind un Äsel un Kjlienvee, met däm schoapen Schwieet.

²⁰Oba een Sän von Ahimelech rand wajch, Ahitub sien Sän, sien Nomen wia Abjatar; un hee rand no David.

²¹Un Abjatar berecht David, daut Saul de Priesta Gottes omjebrocht haud.

²²Doa säd David too Abjatar: Ekj wist aun janem Dach, wiels Doeg, de Edomieta, doa wia, daut hee daut Saul jewess sajen wudd. Ekj sie schuldich aun aule Seelen von dienem Vodahus.

²³Bliew bie mie, enjst die nich; dan wäa no miene Seel tracht, tracht no diene Seel; dan bie mie woascht du bewoat sennen.