Read De Bibel JHF 1. Samuel 23 Bible Online

1. Samuel 23 - De Bibel JHF bible

1. Samuel 23

¹Un daut wort David jesajcht: Kjikj, de Filista kjamfen jäajen Keila, un see plindre de Draschdäle.

²Un David befruach däm Harn un säd: Saul ekj hangonen un dise Filista schlonen? Un de Har räd too David: Go han, un schlo de Filista un rad Keila.

³Oba David siene Mana säden to am: Kjikj, wie enjsten ons hia en Juda, un woo sell wie doa - no Keila jäajen de Schlachtrieejen de Filista gonen?

⁴Doa befruach David nochmol däm Harn, un de Har auntwuad am un säd: Moak die opp, go rauf no Keila; un ekj woa de Filista en diene Haunt jäwen.

⁵Un David jinkj met siene Mana no Keila un kjamft jäajen de Filista, un hee juach äa Vee wajch un recht eene groote Schlacht unja an aun. Un soo rad David de Bewona von Keila.

⁶Oba daut passieed, aus Abjatar, Ahimelech sien Sän, no David en Keila rand, doa kaum hee rauf met eenem Efod en siene Haunt.

⁷Un daut wort Saul berecht, daut David no Keila jekomen wia. Doa säd Saul: Gott haft am veschmäten un en miene Haunt jejäft; dan hee haft sikj enjeschloten, endäm hee en eene Staut met Dooasch un Rijel jekomen es.

⁸Un Saul roopt aulet Volkj, toom Kaumf opp, om no Keila rauf too gonen, David un siene Mana too beloagren.

⁹Un aus David daut hieed, daut Saul Beeset jäajen am plond, doa säd hee too Abjatar, däm Priesta: Brinj daut Efod häa!

¹⁰Un David säd: Oo, Har, Gott Israels! Dien Kjnajcht haft jehieet, daut Saul doano tracht, no Keila too komen, om de Staut mienthaulwen too vedoawen.

¹¹Woaren de Birja von Keila mie en siene Haunt jäwen? Woat Saul raufgonen, aus dien Kjnajcht jehieet haft? Oo Har, Gott Israels, saj daut doch dienem Kjnajcht! Un de Har säd: Hee woat raufkomen.

¹²Un David säd: Woaren de Birja von Keila mie un miene Mana en Saul siene Haunt jäwen? Un de Har säd: See woaren die en siene Haunt jäwen.

¹³Doa muaken David un siene Mana sikj opp, bie 600 Maun, un see jinjen von Keila wajch un jinjen, wuahan see gonen kunnen. Un daut wort Saul berecht, daut David ut Keila wajchjegonen wia; doa leet hee daut Utgonen no Keila sennen.

¹⁴Un David bleef enne Wiltnis oppe Boaj Fastinj, un hee bleef oppe Boaj enne Wieste Sif. Un Saul socht am aule Doag, oba Gott jeef am nich en siene Haunt.

¹⁵Un David sach, daut Saul utjegonen wia, om no sienem Läwen too trachten; un David wia enne Wiltnis Sif, em Woolt.

¹⁶Doa muak sikj Jonatan, Saul sien Sän, opp un jinkj no David en däm Woolt un stoakjt siene Haunt en Gott.

¹⁷Un hee säd to am: Enjst die nich! Dan de Haunt von mienem Voda woat die nich finjen; un du woascht Kjennich äwa Israel woaren, un ekj woa de tweeda no die sennen; un soo weet daut uk mien Voda Saul.

¹⁸Un see schlooten eenen Bunt ver däm Harn. Un David bleef em Woolt, un Jonatan jinkj no sienem Hus.

¹⁹Doa jinjen de Sifita nopp no Saul, no Gibea, un säden: Helt David sikj nich bie ons em Woolt oppe Boaj Fastinj em Vestäakj, oppem Aunboaj Hakila, dee aune rajchte Sied vonne Wiltnis es?

²⁰Un nu, oo Kjennich, wan diene Seel daut well, rauftokomen, soo komm rauf; un aun ons es et, am enne Kjennichshaunt to jäwen.

²¹Un Saul säd: Jesäajent sent jie ver däm Harn, daut jie junt mie erboarmt ha!

²²Got doch han, vejewessat junt noch mea, un finjt ut un kjikjt no siem Uat, woa sien Foot es, un wäa am doa selfst jeseenen haft; dan maun haft mie jesajcht, hee es sea lestich.

²³Un kjikjt un forscht aule Vestäakjen ut, wua hee sikj vestäakjen kaun, un komt wada no mie, wan jie junt secha sent; un ekj woa met junt gonen. Un daut saul passieren, wan hee em Launt es, soo well ekj am finjen unja aule 1000 Juda!

²⁴Un see muaken sikj opp un jinjen no Sif, ver Saul häa. Oba David un siene Mana wieren enne Wieste Maon, enne Läacht, aune rajchte Sied vonne Wiltnis.

²⁵Un Saul un siene Mana jinjen han, om am to sieekjen; un maun berecht daut David, un hee jinkj rauf vonne Boajch un bleef enne Wieste Maon. Un aus Saul daut hieed, juach hee David enne Wieste Maon no.

²⁶Un Saul jinkj aun dise Sied vom Boajch, oba David un siene Mana aun jane Sied vom Boajch. Un daut passieed, aus David sikj spood [angstlich wia], Saul too entkomen, un Saul un siene Mana David un siene Mana omrinjden, om an too jriepen,

²⁷doa kaum een Boote no Saul un säd: Spood die un komm, dan de Filista sent em Launt ennjedrungen!

²⁸Doa dreid Saul om von de Vefoljunk, hinja David häa, un jinkj de Filista entjäajen. Doahäa nand maun däm Uat; Sela-Hammachlekot.