Read De Bibel JHF 1. Samuel 24 Bible Online

1. Samuel 24 - De Bibel JHF bible

1. Samuel 24

¹Un David jinkj von doa nopp un bleef oppe Boaj Fastinj von En-Gedi.

²Un daut passieed, aus Saul von de Vefoljunk de Filista trigjjekomen wia, doa berecht maun am un säd: Kjikj, David es enne Wieste En-Gedi.

³Un Saul neem 3 000 utjeläsne Mana ut gaunz Israel un jinkj han, om David un siene Mana oppe Steenbock Boaj too sieekjen.

⁴Un hee kaum no de Kjlienvee Hoads aum Wajch, woa eene Heel wia, un Saul jinkj nenn, om siene Feet too bedakjen; oba David un siene Mana sauten aum hinjaschten Enj de Heel.

⁵Doa säden David siene Mana to am: Kjikj, daut es de Dach, von däm de Har to die jesajcht haft: Kjikj, ekj woa dienen Fiend en diene Henj jäwen, un doo am, aus et en diene Uagen goot es. Un David stunt opp un schneet heimlich eene Akj von Saul sienem Bowakjleet auf.

⁶Oba nohäa passieed daut, doa schluach däm David sien Hoat, doarom daut hee de Akj von Saul sienem Bowakjleet aufjeschnäden haud;

⁷un hee säd to siene Mana: De Har lot daut wiet von mie sennen, daut ekj soowaut aun mienem Harn, däm Jesaulwden Gottes, doonen sull, miene Haunt jäajen am uttostrakjen! Dan hee es de Jesaulwda Gottes.

⁸Un David wäad siene Mana met dise Wieed un leet an nich too, sikj jäajen Saul too erhäwen. Un Saul stunt opp ut de Heel un jinkj sienem Wajch.

⁹Un nohäa muak David sikj opp, un hee jinkj ut de Heel rut un roopt Saul hinjaraun un säd: Mien Har, Kjennich! Un Saul dreid sikj om, un David bekjt sikj met sienem Aunjesecht bat oppe Ieed.

¹⁰Un David säd to Saul: Wuarom hieescht du opp de Menschen äare Wieed, dee doa sajen: Kjikj, David sieekjt dien Onjlekj?

¹¹Kjikj, aun disem Dach ha diene Uagen jeseenen, daut de Har die vondoag enne Heel en miene Haunt jejäft haud. Un maun säd mie, ekj sull die dootmoaken; oba mien Uag schoond die, un ekj säd: Ekj well miene Haunt nich jäajen mienem Harn utstrakjen, dan hee es de Jesaulwda Gottes!

¹²Un kjikj, mien Voda, jo, kjikj de Akj von dienem Bowakjleet es en miene Haunt! Daut ekj eene Akj von dienem Bowakjleet aufjeschnäden un die nich dootjemoakt ha, doaraun erkjan un kjikj, daut nuscht Beeset en miene Haunt es, noch een Vegonen, un daut ekj nich aun die jesindicht ha; oba du steist mie nom Läwen, om daut to nämen.

¹³De Har recht tweschen mie un die, un de Har woat fa mie aun die Rach eewen; oba miene Haunt saul nich jäajen die sennen.

¹⁴Aus maun nom oolen Sprechwuat sajcht: Vom Gottloosen kjemt Gottloosichkjeit; oba miene Haunt saul nich jäajen die sennen.

¹⁵Hinja wäm jeit de Kjennich von Israel häa? Wäm jajchst du no? Eenem doodjen Hund, eene Hupsflieej!

¹⁶Soo es de Har Rechta, un recht tweschen mie un die; un hee kjikjt too un fieet miene Striedsach un veschauft mie Rajcht ut diene Haunt!

¹⁷Un daut passieed, aus David dise Wieed too Saul utjeräd haud, doa räd Saul: Es daut diene Stemm, David, mien Sän? Un Saul hoof siene Stemm un hield.

¹⁸Un hee säd to David: Du best jerajchta aus ekj. Dan du hast mie Goots bewäsen, oba ekj ha die Beeset bewäsen.

¹⁹Un du hast vondoag bewäsen, daut du Goodet aun mie jedonen hast, doa de Har mie en diene Haunt jejäft, un du mie nich omjebrocht hast.

²⁰Dan wan wäa sienen Fiend finjt, woat hee am opp eenem gooden Wajch gonen loten? Soo mucht de Har die Goodet vejelten fa daut, waut du aun disem Dach aun mie jedonen hast!

²¹Un nu kjikj, ekj weet, daut du jewess Kjennich woaren woascht, un daut en diene Haunt daut Kjennichtum Israels bestonen woat;

²²soo schwiea mie nu bie däm Harn, daut du mienem Somen no mie nich utroden un mienem Nomen nich vetiljen west ut mienem Vodahus!

²³Un David schwua däm Saul. Un Saul jinkj no sienem Hus; oba David un siene Mana jinjen oppe Boaj Fastinj.