Read De Bibel JHF 1. Samuel 27 Bible Online

1. Samuel 27 - De Bibel JHF bible

1. Samuel 27

¹Un David säd en sienem Hoaten: Nu woa ekj eenen Doages derch Saul siene Haunt omkomen; doa es fa mie nuscht bäta, aus daut ekj schwind en daut Filistalaunt ran, un Saul woat von mie aufloten, mie wiedahan en aule Jrensen Israels too sieekjen; un ekj woa ut siene Haunt wajchranen.

²Un David muak sikj opp un jinkj äwa, hee un 600 Maun, dee bie am wieren, no Achisch, däm Sän Maok, däm Kjennich von Gat.

³Un David bleef bie Achisch, en Gat, hee un siene Mana, een jiedra met sienem Hus: David un siene beid Frues, Achinoam, de Jisreelitin, un Abigajil, de Fru von Nabal, de Karmelitin.

⁴Un daut wort Saul berecht, daut David no Gat jerant wia; un hee socht am wiedahan nich mea.

⁵Un David säd to Achisch: Wan ekj Jnod en diene Uagen jefungen ha, soo jeef mie eenen Plauz en eenem diene Städa oppem Launt, daut ekj doa selfst won; dan wuarom sull dien Kjnajcht bie die enne Kjennichsstaut wonen?

⁶Un Achisch jeef am aun däm seljen Dach Ziklag; doawäajen jehieet Ziklag de Kjennichs Juda bat opp disem Dach.

⁷Un de Tiet, dee David em Launt de Filista wond, wia een Joa un 4 Moonat.

⁸Un David jinkj met siene Mana nopp, un see follen en bie de Gesurita un de Girsita un de Amalekita; dan dise wieren de Laundesbewona von de oole Tieden häa, bat no Sur han bat nom Ägiptenlaunt.

⁹Un David schluach daut Launt un leet noch Maun noch Fru aum Läwen; un hee neem Kjlienvee un Rinda un Äsel un Kameelen un Kjleeda, un kaum trigj un kaum no Achisch.

¹⁰Un wan Achisch säd: Ha jie vondoag kjeenem äwafollen? Soo säd David: Em Sieden von Juda, ooda: Em Sieden de Jerachmeelita, ooda: Em Sieden de Kenita.

¹¹Un David leet noch Maun noch Fru aum Läwen, om an no Gat to brinjen, endäm hee säd: Daut see nich äwa ons berechten un sajen: Soo haft David jedonen. Un soo wia siene Oat un Wies aul de Doag, dee hee em Filistalaunt wond.

¹²Un Achisch jleewd David un säd: Hee haft sikj bie sienem Volkj, bie Israel, gaunz stinkjent jemoakt, un hee woat emma mien Kjnajcht sennen.