Read De Bibel JHF 1. Samuel 28 Bible Online

1. Samuel 28 - De Bibel JHF bible

1. Samuel 28

¹Un daut passieed aun jane Doag, doa vesaumelden de Filista äa Häa toom Kjrich, om jäajen Israel too kjamfen. Un Achisch säd to David: Du saust weeten, daut du met mie em Kjrichsloaga utgonen saust, du un diene Mana.

²Un David säd to Achisch: Soo saust du erfoaren, waut dien Kjnajcht doonen woat. Un Achisch säd to David: Soo well ekj die toom Wajchta äwa mien Haupt fa aule Doag saten.

³Oba Samuel wia jestorwen, un gaunz Israel haud om am jekloacht un am en Rama, en siene Staut, begroft. Un Saul haud de Jeistabefroaga un de Woasaja ut däm Launt vejoacht.

⁴Un de Filista vesaumelden sikj, un see kaumen un loagaden sikj en Schunem. Un Saul vesaumeld gaunz Israel, un see loagaden sikj opp Gilboa.

⁵Un aus Saul daut Filista Häa sach, enjst hee sikj, un sien Hoat zettad sea.

⁶Un Saul befruach däm Harn; oba de Har auntwuad am nich, noch derch Dreem, noch derch de Urim [Licht], noch derch de Profeeten.

⁷Doa säd Saul to siene Kjnajchts: Sieekjt mie eene Fru, daut een Doodesbeschwiera Jeist haft, doamet ekj no ar go un ar befroag. Un siene Kjnajchts säden to am: Kjikj, en En-Dor es eene Fru, dee een Doodesbeschwiera Jeist haft.

⁸Un Saul vestald sikj un trock aundre Kjleeda aun, un jinkj han, hee un 2 Mana met am, un see kaumen de Nacht no de Fru; un hee säd: Woasaj mie doch derch däm Doodesbeschwiera Jeist un brinj mie nopp, wäm ekj die sajen woa.

⁹Oba de Fru säd to am: Kjikj, du weetst doch, waut Saul jedonen haft, daut hee de Doodesbeschwiera un de Woasaja ut däm Launt utjerot haft; un wuarom lajst du miene Seel eene Schlenj, om mie omtobrinjen?

¹⁰Un Saul schwua ar bie däm Harn un säd: Soo woa de Har läft, daut saul die doawäajen kjeene Schult trafen!

¹¹Doa säd de Fru: Wäm saul ekj die nopp brinjen? Un hee säd: Brinj mie Samuel nopp.

¹²Un aus de Fru Samuel sach, doa schrieech see met ne lude Stemm; un de Fru räd too Saul un säd: Wuarom hast du mie beloagen? Jo, du best Saul!

¹³Un de Kjennich säd to ar: Enjst die nich! Doch waut sitst du? Un de Fru säd to Saul: Ekj see eenen Gott ut de Ieed noppgonen.

¹⁴Un hee säd to ar: Woo es siene Jestault? Un see säd: Een oola Maun jeit nopp, un hee es met eenem Bowakjleet jekjleet. Doa erkjand Saul, daut et Samuel wia, un hee bekjt sikj, met sienem Aunjesecht bat oppe Ieed, un schmeet sikj dol.

¹⁵Un Samuel säd to Saul: Wuarom hast du mie beorruicht, mie noppkomen loten? Un Saul säd: Ekj sie en groote Noot; dan de Filista strieden jäajen mie, un Gott es von mie jegonen un auntwuat mie nich mea, noch derch de Profeeten, noch derch de Dreem; doa leet ekj die roopen, doamet du mie sajchst, waut ekj doonen saul.

¹⁶Un Samuel säd: Wuarom frajchst du mie, doa de Har von die jegonen un dien Fiend jeworden es?

¹⁷Un de Har haft jedonen, soo aus hee derch mie jerät haft; un de Har haft daut Kjennichtum ut diene Haunt jeräten un daut dienem Näakjsten, däm David, jejäft.

¹⁸Wiels du de Stemm Gottes nich jehorcht un siene Zorngloot nich utjefieet hast aun Amalek, doarom haft de Har die dit vondoag jedonen.

¹⁹Un de Har woat uk Israel met die enne Filista Haunt jäwen; un morjen woascht du met diene Säns bie mie sennen; uk daut Häaloaga Israels woat de Har enne Filista Haunt jäwen.

²⁰Doa foll Saul plazlich soo lang aus hee wäa oppe Ieed, un hee enjst sikj sea fa Samuel siene Wieed; soo daut kjeene Krauft mea en am bleef, dan hee haud däm gaunzen Dach un de gaunze Nacht nuscht jejäten.

²¹Un de Fru kaum no Saul un sach, daut hee sea enjstlich wia; un see säd to am: Kjikj, diene Deenstmejal haft opp diene Stemm jehieet, un ekj ha mien Läwen opp Späl jesat un diene Wieed jehorcht, dee du to mie jerät hast;

²²un nu hia doch uk du opp de Stemm von diene Deenstmejal, un lot mie die een Haups Broot veasaten, un at, daut du too Krauft kjeemst, wan du dienem Wajch jeist.

²³Oba hee wull nich un säd: Ekj well nich äten. Doa drunge siene Kjnajchts un uk de Fru en am; un hee hieed opp äare Stemm un stunt vonne Ieed opp un sad sikj oppem Bad.

²⁴Un de Fru haud een jemastet Kaulf em Hus; un see spood sikj un schlacht daut; un see neem Mäl un kjnäd daut un backt doavon onjesuade Kuaken.

²⁵Un see brocht daut ver Saul un ver siene Kjnajchts, un see auten. Un see muaken sikj opp un jinjen wajch en dee selje Nacht.