Read De Bibel JHF 1. Samuel 29 Bible Online

1. Samuel 29 - De Bibel JHF bible

1. Samuel 29

¹Un de Filista vesaumelden äa gaunzet Häa no Afek; un Israel wia aune Kjwal jeloagat, dee bie Jesreel es.

²Un de Ferschten de Filista jinjen omhäa met 100 un met 1000, un David un siene Mana jinjen too latst met Achisch vebie.

³Doa säden de Ferschten de Filista: Waut sellen dise Hebräa? Un Achisch säd to de Filista Ferschten: Es daut nich David, Saul sien Kjnajcht, däm Kjennich von Israel, dee aul een Joa un Doag bie mie jewast es? Un ekj ha nuscht aun am jefungen von däm Dach aun, doa hee aufjefollen es, bat opp disem Dach.

⁴Oba de Ferschten de Filista worden oajalich äwa am, un de Ferschten de Filista säden to am: Schekj däm Maun trigj, daut hee aun sienem Uat trigj jeit, wuahan du am bestalt hast, un daut hee nich met ons rauf em Kaumf jeit un ons nich toom Jäajna em Kaumf woat; dan met waut kunn hee sikj bie sienem Harn aunjenäm moaken? Nich met de Kjap dise Mana?

⁵Es daut nich David, von däm see en de Reijen sungen un säden: Saul haft 1000 jeschloagen, un David siene 10 000?

⁶Un Achisch roopt David un säd to am: Soo woa de Har läft, du best opprechtich; un goot jefaulent en miene Uagen es dien Utgank un dien Engank bie mie em Häaloaga; dan ekj ha nuscht Beeset aun die von däm Dach aun jefungen, doa du no mie jekomen best, bat opp disem Dach; oba enne Ferschten äare Uagen best du nich goot jefaulent.

⁷Un nu go trigj un go en Fräd han, doamet du nuscht Ieblet deist enne Uagen de Ferschten de Filista.

⁸Un David säd to Achisch: Oba waut ha ekj jedonen, un waut hast du aun dienem Kjnajcht von däm Dach aun jefungen, doa ekj ver die jewast sie bat opp disem Dach, daut ekj nich komen un jäajen de Fiend von mienem Harn, däm Kjennich, strieden saul?

⁹Un Achisch auntwuad un säd to David: Ekj weet daut, du best miene Uagen goot jefaulent aus een Enjel Gottes; doch de Filista Ferschten ha jesajcht: Hee saul nich met ons en däm Kaumf noppgonen!

¹⁰Soo moak die tiedich zemorjes opp, du un dienem Harn siene Kjnajchts, dee met die jekomen sent; un moakt junt zemorjes tiedich opp! Sooboolt daut junt dach woat, got wajch.

¹¹Un David muak sikj tiedich opp, hee un siene Mana, daut see zemorjes wajchgonen, om en daut Filistalaunt trigjtokomen. Oba de Filista jinjen no Jesreel nopp.