Read De Bibel JHF 1. Samuel 3 Bible Online

1. Samuel 3 - De Bibel JHF bible

1. Samuel 3

¹Un de Jung Samuel deend däm Harn ver Eli. Un daut Wuat Gottes wia selden aun jane Doag, Openboarungen wieren nich foaken.

²Un eenes Doages passieed daut, aus Eli aun sienem Uat lach, — siene Uagen hauden aunjefongen dunkel to woaren, daut hee nich mea seenen kunn,

³un de Laump Gottes wia noch nich utjegonen, un Samuel lach em Tempel Gottes, woa de Lod Gottes wia,

⁴doa roopt de Har däm Samuel. Un hee säd: Hia sie ekj!

⁵Un hee rand no Eli un säd: Hia sie ekj, dan du hast mie jeroopen. Oba hee säd: Ekj ha die nich jeroopen, go wada han un laj die schlopen. Un hee jinkj han un läd sikj dol.

⁶Un de Har roopt wada: Samuel! Un Samuel stunt opp un jinkj no Eli un säd: Hia sie ekj, dan du hast mie jeroopen. Un hee säd: Ekj ha die nich jeroopen, mien Sän, laj die wada.

⁷Oba Samuel kjand däm Harn noch nich, un daut Wuat Gottes wia am noch nich jeopenboat.

⁸Un de Har roopt wada toom dredden Mol: Samuel! Un hee stunt opp un jinkj no Eli un säd: Hia sie ekj, dan du hast mie jeroopen. Doa erkjand Eli, daut de Har däm Jung roopt.

⁹Un Eli säd to Samuel: Go han, laj die; un soo doo, wan hee die roopt, soo saj: Räd, Harn, dan dien Kjnajcht hieet. Un Samuel jinkj han un läd sikj dol aun sienem Uat.

¹⁰Un de Har kaum doahan un roopt aus verhäa: Samuel, Samuel! Un Samuel säd: Räd, dan dien Kjnajcht hieet.

¹¹Doa säd de Har too Samuel: Kjikj, ekj well eene Sach en Israel doonen, daut jiedrem, dee daut hieet, siene beid Uaren piepen woaren.

¹²Aun däm seljen Dach woa ekj jäajen Eli aules utfieren, waut ekj äwa sien Hus jerät ha; ekj woa aunfangen un vollbrinjen.

¹³Dan ekj ha am jesajcht, daut ekj sien Hus eewichlich rechten woa, om de Onjerajchtichkjeits wellen, dee hee jewist haft, daut siene Säns sikj däm Fluch holden, un hee an nich jewäat haft.

¹⁴Un doarom ha ekj Eli sienem Hus jeschwuaren: Wan de Ojjerajchtichkjeit von Eli sienem Hus jestroft woaren saul derch Schlachtopfa un derch Speisopfa en Eewichkjeit!

¹⁵Un Samuel lach bat Zemorjes; doa deed hee de Däa vom Hus Gottes op. Un Samuel haud Angst, Eli daut Jesecht to sajen.

¹⁶Doa roopt Eli dän Samuel un säd: Samuel, mien Sän! Un hee säd: Hia sie ekj!

¹⁷Un hee säd: Waut es daut Wuat, daut hee to die jerät haft? Vestäakj daut doch fa mie nich. Gott deit die soo un daut, wan du mie nich aules sajchst, waut hee to die jerät haft!

¹⁸Doa säd Samuel am aul de Wieed un hild nuscht fa sikj. Un hee säd: Hee es de Har, hee deit, waut en siene Uagen goot es.

¹⁹Un Samuel wort groot; un de Har wia met am un leet kjeent von aul siene Wieed oppe Ieed faulen.

²⁰Un gaunz Israel, von Dan bat Beerscheba, erkjanen, daut Samuel aus Profeet Gottes bestädicht wia.

²¹Un de Har erschien wiedahan en Silo; dan de Har openboad sikj däm Samuel en Silo derch daut Wuat Gottes.