Read De Bibel JHF 1. Samuel 4 Bible Online

1. Samuel 4 - De Bibel JHF bible

1. Samuel 4

¹Un daut Wuat von Samuel jinkj aun gaunz Israel. Un Israel jinkj ut, de Filista entjäajen toom Kaumf; un see loagaden sikj bie Eben-Eser, un de Filista loagaden bie Afek.

²Un de Filista stalden sikj opp, Israel jäajenäwa; un de Kaumf breed sikj ut, un Israel wort von de Filista jeschloagen; un schluagen enne Schlachtordninj oppem Flekj bie 4 000 Maun.

³Un aus daut Volkj nom Loaga trigj kaum, doa säden de Eltestasch von Israel: Wuarom haft de Har ons vondoag ver de Filista jeschloagen? Lot ons von Silo de Bundeslod Gottes no ons holen, daut see en onse Medd kjemt un ons ut de Haunt onse Fiend rad.

⁴Un daut Volkj schekjt no Silo, un maun brocht von doa de Bundeslod Gottes de Häaschoa, dee tweschen de Cherubim troont; un de beid Säns von Eli, Hofni un Pinehas, wieren doa selfst bie de Bundeslod Gottes.

⁵Un daut passieed, aus de Bundeslod Gottes em Loaga kaum, doa jubeld gaunz Israel met grootem Jubel, daut de Ieed bäbd.

⁶Un de Filista hieeden daut Jublen un säden: Waut bediet daut Jeschrecht dit groote Jublen em Loaga de Hebräa? Un see erfuaren, daut de Lod Gottes em Loaga jekomen wia.

⁷Doa hauden de Filista Angst, dan see säden: Gott es em Loaga jekomen! Un see säden: Wee ons! Dan soowaut es noch niemols jewast.

⁸Wee ons! Wäa woat ons ut de Haunt von dise majchtje Jetta raden? Daut sent de Jetta, dee de Ägipta schluagen met aulalei Ploagen enne Wieste.

⁹Fot Moot un siet Mana, jie Filista, daut jie nich de Hebräa deenen motten, aus see ons jedeent ha; soo siet doch Mana un kjamft!

¹⁰Un de Filista kjampften, un Israel wort jeschloagen, un see randen een jiedra no sienem Zelt; un de Schlag (Schlach) wia sea groot, un daut follen von Israel 30 000 Maun Footvolkj.

¹¹Un de Lod Gottes wort jenomen, un de beid Säns Eli, Hofni un Pinehas, storwen.

¹²Un daut rand een Maun von Benjamin ut de Schlachtordninj un kaum no Silo aun däm seljen Dach, siene Kjleeda wieren veräten, un Ieed wia opp sienem Haupt.

¹³Un aus hee kaum, doa saut Eli opp eenem Stool, un kjikjt oppem Wajch; dan sien Hoat wia enjstlich wäajen de Lod Gottes. Un aus de Maun kaum, om daut enne Staut too berechten, doa schrieech de gaunze Staut.

¹⁴Un Eli hieed daut Jeschrecht un säd: Waut bediet daut lude Jeschrecht? Un de Maun spood sikj un kaum un berecht daut Eli.

¹⁵Oba Eli wia 98 Joa oolt, un siene Uagen wieren dunkel, un hee kunn nich seenen.

¹⁶Un de Maun säd to Eli: Ekj sie dee, dee ut de Schlachtordninj jekomen es, un ekj sie vondoag ut de Schlachtordninj jerant. Un hee säd: Woo steit de Sach, mien Sän?

¹⁷Un de Boote auntwuad un säd: Israel es fa de Filista jerant, un eene groote Schacht unja däm Volkj passieet, un uk diene beid Säns, Hofni un Pinehas, sent doot, un de Lod Gottes es jenomen.

¹⁸Un daut passieed, aus hee de Lod Gottes erwänd, doa foll Eli oppem Rigjen vom Stool, aune Sied vom Dooa, un bruak sikj daut Jenekj un storf; dan de Maun wia oolt un schwoa. Un hee haud Israel 40 Joa jerecht.

¹⁹Un siene Schwiadochta, de Fru von Pinehas, wia schwanga toom jebäaren; un aus see de Norecht hieed, daut de Lod Gottes jenomen, un daut äa Schwiavoda un äa Maun doot wieren, doa sunk see dol un jebua, dan daut äwafollen ar de Wee.

²⁰Oba aus see em Stoawen lach, doa säden de Frues, dee bie ar stunden: Ha nich Angst, dan eenen Sän hast du jebuaren! Oba see auntwuad nich un naum daut nich too Hoaten.

²¹Un see nanden däm Jung Ikabod, endäm see säden: De Harlichkjeit es von Israel jenomen! Wiels de Lod Gottes von Israel jenomen wia, un wäajen äarem Schwiavoda un äarem Maun.

²²Un see säd: De Harlichkjeit es von Israel jenomen, dan de Lod Gottes es jenomen!