Read De Bibel JHF 1. Samuel 5 Bible Online

1. Samuel 5 - De Bibel JHF bible

1. Samuel 5

¹Un de Filista hauden de Lod Gottes jenomen un brochten dee von Eben-Eser no Aschdod.

²Un de Filista naumen de Lod Gottes un brochten dee en daut Hus Dagon un stalden dee bie Dagon.

³Un aus de Asdodita aum aundren Dach tiedich oppstunden, kjikj, doa lach Dagon opp sienem Aunjesecht oppe Ieed ver de Lod Gottes; un see naumen Dagon un stalden am wada aun sienem Uat.

⁴Un aus aum aundren Dach Zemorjes oppstunden, kjikj, doa lach Dagon opp sienem Aunjesecht oppe Ieed ver de Lod Gottes; un zwoa wia Dagon sien Haupt un siene beid Henj aufjehakt oppe Schwal, blooss daut Feschlief wia aun am äwajebläwen.

⁵Doarom gonen de Priesta von Dagon un aula, dee en Dagon sienem Hus gonen, nich oppe Dagon siene Schwal en Aschdod bat opp disem Dach.

⁶Un de Haunt Gottes lach schwoa opp de Asdodita, un hee vewust an; un hee schluach an met Bule, Aschdod un siene Jäajent.

⁷Un aus de Lied von Aschdod sagen, daut et aulsoo wia, säden see: De Lod Gottes Israels saul nich bie ons bliewen; dan siene Haunt es hoat äwa ons un äwa Dagon, onsem Gott.

⁸Un see schekjten han un vesaumelden aule Ferschten de Filista no sikj un säden: Waut sell wie met de Lod Gottes Israels doonen? Un see säden: Maun brinjt de Lod Gottes Israels no Gat. Un see brochten de Lod Gottes Israels han.

⁹Un daut passieed, nodäm see dee hanjebrocht hauden, doa kaum de Haunt Gottes äwa de Staut, un daut jeef een sea groota Schrakj; un hee schluach de Lied de Staut, von Kjlien bat toom Grooten, daut Bule aun an utbruaken.

¹⁰Doa schekjten see de Lod Gottes no Ekron. Un daut passieed, aus de Lod Gottes no Ekron kaum, doa schrieejen de Ekronita un säden: See ha de Lod Gottes Israels no mie jebrocht, om mie un mien Volkj omtobrinjen!

¹¹Un see schekjten han un vesaumelden aule Ferschten de Filista un säden: Schekjt de Lod Gottes Israels wajch, daut see aun äarem Uat trigjkjemt un mie un mien Volkj nich ombrinjt. Dan daut wia eene Doodesangst enne gaunze Staut; de Haunt Gottes wia sea schwoa opp an.

¹²Un de Lied, dee nich storwen, worden met Bule jeschloagen; un daut Jeschrecht; de Staut jinkj nom Himmel nopp.