Read De Bibel JHF 1. Samuel 6 Bible Online

1. Samuel 6 - De Bibel JHF bible

1. Samuel 6

¹Un de Lod Gottes wia oppe Felda de Filista säwen Moonat.

²Un de Filista roopten de Priesta un Woasaja un säden: Waut sell wie met de Lod Gottes doonen? Sajcht ons daut, met waut wie ar aun äarem Uat schekjen sellen.

³Un see säden: Wan jie de Lod Gottes Israels wajchschekjen, soo sell jie ar nich ladich wajchschekjen, dan jie motten ar onbedinjt een Schultopfa brinjen; dan woa jie jesunt woaren, un daut woat junt jesajcht woaren, wuarom siene Haunt nich von junt auf lat.

⁴Un see säden: Wautverret Schultopfa es daut, daut wie am brinjen sellen? Un see säden: No de Zol de Ferschten de Filista, 5 goldne Bule un fief goldne Mies; dan dee selje Ploagen ha see un äare Ferschten.

⁵Un moakt Bilda von june Bule un Bilda von june Mies, dee daut Launt vedoawen, un jeft däm Gott Israels Iea; veleicht lat hee siene Haunt leichta woaren äwa junt un äwa junem Gott un äwa junem Launt.

⁶Un wuarom well jie jun Hoat vestocken, aus de Ägipta un de Farao äa Hoat vestokt ha? Leeten see an nich gonen, aus hee siene Macht aun an jeeeft haud, un see jinjen wajch?

⁷Un nu moakt junt eenen Woagen un nämt 2 suende Kjäj, opp dee kjeen Joch jekomen es; un spaunt de Kjäj verem Woagen un brinjt äare Kjalwa wajch, trigj no Hus.

⁸Un nämt de Lod Gottes un stalt ar oppem Woagen; un daut goldne Jereetschoft, daut jie am aus Schultopfa jäwen, doot en een Kaustje aun äare Sied, un schekjt ar, daut see wajchjeit.

⁹Un paust opp: Wan see däm Wajch no äare Jrensen noppjeit, no Bat-Semes han, soo haft hee ons dit groote Iebel jedonen; oba wan nich, soo weet wie, daut nich siene Haunt ons jeschloagen haft; een Toofaul es ons daut jewast.

¹⁰Un de Mana deeden aulsoo un neemen 2 suende Kjäj un spaunde dee aun eenem Woagen, un äare Kjalwa spoade see Tus en.

¹¹Un see stalden de Lod Gottes oppem Woagen, un daut Kaustje met de goldne Mies un de Bilda von äare Bule.

¹²Un de Kjäj jinjen jlikjwajch oppem Wajch no Bat-Semes; opp eene Gauss jinjen see, biem gonen brellde see, un jinjen nich no rajchtsch noch no linkjsch; un de Ferschten de Filista jinjen hinja an häa, bat aune Jrens von Bat-Semes.

¹³Un dee von Bat-Semes arnten de Weitarnt enne Läacht; un aus see äa Uag opphoowen un de Lod sagen, doa freiden see sikj, ar to seenen.

¹⁴Un de Woagen kaum oppem Flekj Josua, von Bat-Semes, un bleef doa stonen; un daut wia doa een groota Steen. Un see spoolde daut Holt vom Woagen un opfaden de Kjäj aus Brauntopfa däm Harn.

¹⁵Un de Leviten neemen de Lod Gottes rauf un daut Kaustje, daut bie ar wia, en däm goldnet Jereetschoft wia, un saden dee opp däm groote Steen. Un de Mana von Bat-Semes opfaden Brauntopfa un schlachten Schlachtopfa aun janem Dach däm Harn.

¹⁶Un de fief Ferschten de Filista kjikjten too un jinjen aun janem Dach trigj no Ekron.

¹⁷Un dit sent de goldne Bule, dee de Filista däm Harn aus Schultopfa jäwen: Fa Aschdod eene, fa Gasa eene, fa Askalon eene, fa Gat eene, fa Ekron eene;

¹⁸un de goldne Mies no de Zol de Städa de Filista, no de fief Ferschten, von de fauste Städa bat no de opne Darpa; un see brochten dee bat nom groote Steen Abel, opp däm see de Lod Gottes raufstalden, dee bat opp disem Dach oppem Flekj Josua, von Bat-Semes, es.

¹⁹Un hee schluach unja de Lied von Bat-Semes, wiels see enne Lod Gottes jekjikjt hauden, un schluach unja däm Volkj 70 [no eene aundre Hauntschreft 50 000] Maun; doa truad daut Volkj, wiels de Har soo eenen groote Schlag unja däm Volkj aunjerecht haud;

²⁰un de Lied von Bat-Semes säden: Wäa kaun ver däm Harn, disem heiljen Gott, bestonen? Un no wäm von ons saul hee noppgonen?

²¹Un see schekjten Booten no de Bewona von Kirjat-Jearim un säden: De Filista ha de Lod Gottes trigjjebrocht; komt rauf, fieet ar no junt nopp.