Read De Bibel JHF 1. Samuel 9 Bible Online

1. Samuel 9 - De Bibel JHF bible

1. Samuel 9

¹Un daut wia een Maun von Benjamin, sien Nomen wia Kisch, Abiel sien Sän, de Sän von Zeror, de Sän von Bekorath, vom Sän Afiach, de Sän von eenem Benjaminita, een rikja Maun.

²Un hee haud eenen Sän, sien Nomen wia Saul, jung un scheen, un kjeen Maun von de Kjinja Israel wia scheena aus hee; von siene Schulla aun wia hee hecha aus aulet Volkj.

³Un de Äselinen von Kisch, von Saul sienem Voda, hauden sikj veerrt; un Kisch säd to sienem Sän Saul: Nemm doch eenem von diene Junges met die un moak die opp, go han, sieekj de Äselinen.

⁴Un hee jinkj derch de Boaj Efraim un jinkj derch daut Launt Schalischa, un see fungen dee nich; un jinjen derch daut Launt Schaalim, oba dee wieren uk doa nich; un hee jinkj derch daut Launt Benjamin, un see fungen dee nich.

⁵See wieren aun daut Launt Zif jekomen, doa säd Saul toom Jung, dee bie am wia: Komm un lot ons trigjgonen, daut nich mien Voda vonne Äselinen lat un om ons sikj Sorjen moakt.

⁶Un hee säd to am: Kjikj doch, een Maun Gottes es en dise Staut, un de Maun woat jeieet; aules waut hee räd, traft secha en; lot ons nu no am gonen, veleicht sajcht hee ons onsem Wajch, opp däm wie gonen.

⁷Un Saul säd to sienem Jung: Oba kjikj, wan wie hangonen, waut well wie däm Maun brinjen? Dan daut Broot es en onse Tausche utjegonen, un wie ha kjeen Jeschenkj däm Maun Gottes to brinjen; waut ha wie?

⁸Un de Jung auntwuad däm Saul un säd: Kjikj, ekj ha 1/4-det Deel vom Schekel Selwa; daut well ekj däm Maun Gottes jäwen, doamet hee ons onsem Wajch sajcht.

⁹(Ver däm säd maun en Israel aulsoo, wan maun jinkj, Gott too befroagen: Komm un lot ons nom Seena gonen; dan däm, dee vondoag Profeet heet, dee nand maun verhäa Seena.)

¹⁰Doa säd Saul too sienem Jung: Dien Wuat es goot; komm, lot ons gonen! Un see jinjen no de Staut, woa de Maun Gottes wia.

¹¹See jinjen jrod nopp no de Staut, doa troffen see Mejales, dee rutkaumen, om Wota too schapen; un see säden to an: Es de Seena hia?

¹²Un see auntwuaden an un säden: Jo, kjikj, hee es ver die; nu spood die, dan hee es vondoag enne Staut jekomen, wiels daut Volkj vondoag een Schlachtopfa oppe Hecht [huach bowen woa de Opfaaultoa stunt] haft.

¹³Wan jie enne Staut komen, soo woa jie am finjen, ver däm hee oppe Hecht noppjeit toom äten; dan daut Volkj at nich, bat hee jekomen es; dan hee säajent daut Schlachtopfa, nodäm äten de Enjelodne. Soo got nu nopp, dan krakjt vondoag woa jie am finjen.

¹⁴Doa jinjen see nopp enne Staut. Aus see enne Staut kaumen, kjikj, doa kaum Samuel rut, an entjäajen, om no de Hecht nopptogonen.

¹⁵Oba de Har haud eenen Dach, ver däm Saul kaum, däm Samuel sienem Ua jeopenboat un jesajcht:

¹⁶Morjen om dise Tiet woa ekj eenen Maun ut däm Launt Benjamin no die schekjen, un du saust am toom Ferscht saulwen äwa mien Volkj Israel; un hee woat mien Volkj ut de Haunt de Filista raden; dan ekj ha mien Volkj jeseenen, dan sien Jeschrecht es no mie jekomen.

¹⁷Aus nu Samuel Saul sach, auntwuad am de Har: Kjikj doa däm Maun, von däm ekj to die jerät ha; disa saul äwa mien Volkj harschen.

¹⁸Un Saul kaum em Dooa no Samuel un säd: Saj mie doch, woa daut Hus vom Seena es.

¹⁹Un Samuel auntwuad Saul un säd: Ekj sie de Seena; go ver mie nopp no de Hecht, dan jie sellen vondoag met mie äten, un Zemorjes woa ekj die gonen loten; un aules, waut en dienem Hoaten es, woa ekj die sajen.

²⁰Un waut de Äselinen betraft, dee die vondoag ver dree Doag veloaren jegonen sent, recht dien Hoat nich opp an, dan dee sent jefungen. Un no wäm es de gaunza Wensch Israels? Nich no die un no dienem gaunzen Vodahus?

²¹Doa auntwuad Saul un säd: Sie ekj nich een Benjaminita, von eenem de kjlanste Stam Israels, un es nich mien Jeschlajcht daut jerinjste unja aule Jeschlajchta de Stam Israels? Un wuarom rädst du dise Wieed to mie?

²²Un Samuel naum Saul un sienem Jung un fieed an enne groote Stow, un hee jeef an eenen Plauz bowen unja de Enjelodne; un daut wieren bie 30 Maun.

²³Un Samuel säd to de Kjäakjsche: Jeff daut Stekj häa, daut ekj die jeef, von däm ekj die jesajcht ha: Laj daut bie die too Sied.

²⁴Doa brocht de Kjäakjsche een Stekj vom Schinkje un waut doa aun wia un läd daut Saul väa. Un hee säd: Kjikj, daut Äwajebläwne; laj die väa, at! Dan opp eene bestemde Tiet es daut fa die oppbewoat worden, aus ekj säd: Ekj ha daut Volkj enjeloden. Soo aut Saul met Samuel aun janem Dach.

²⁵Un see jinjen vonne Hecht rauf enne Staut; un hee räd met Saul oppem Dak.

²⁶Un see stunden tiedich opp; un daut passieed, aus de Morjenroot oppjinkj, doa roopt Samuel däm Saul oppem Dak un säd. Kjikj opp, daut ekj die bejleit! Un Saul stunt opp, un see jinjen beid, hee un Samuel, rut oppe Gauss.

²⁷Aus see aum Enj de Staut rauf jinjen, säd Samuel too Saul: Saj däm Jung, daut hee veropp jeit - un hee jinkj veropp; oba du sto nu stell, daut ekj die daut Wuat Gottes hieren lot.