Read Denya Utɔɔ́ Aŋgbá Jisɔs 6 Bible Online

Utɔɔ́ Aŋgbá Jisɔs 6 - Denya bible

Utɔɔ́ Aŋgbá Jisɔs 6

¹Né gébé ɛyigembɔ, ɛchomele bɔɔ́ Jisɔs ɛwɛ́ne ɛjyɛ́ mbɛmbɛ nkane gejamégé bɔɔ́ ábánege bwɔ́. Abi ajɔge mejɔɔ́ Grek abɔ ásɔɔ́ matɔɔ́ ne abi Hibru nnó áfwalege akwi andeé bwɔ́ né uno bi ákarege yɛndé bií.

²Ne aŋgbá Jisɔs afyaneapéa ákuú bɔɔ́ Jisɔs ako ne ake ne ɛbwɔ́, “Ɛpɔ́fɔ́ chó nnó ɛsé delyaá mangaré mekomejɔɔ́ Ɛsɔwɔ, depane le depɔre menyɛɛ́ mankaré.

³Ne aŋmɛ́ sé, ndɛre ɛlúmbɔ, ɛlɔ́ nnó ɛnyú déjyá bɔɔ́ akeneama nnó ápyɛgé utɔɔ́ ɛbi. Bɔɔ́ bina abɔ́ mambɛ abi bɔɔ́ ako ákamé nnó awya gepɔ gelɔ́gelɔ́ ne ákaáge geno cháŋéné ne Mendoó Ukpea ɛgbeé bwɔ́ matɔɔ́.

⁴Ne ɛsé aŋgbá Jisɔs dechyɛge nyɛ gemɛ se geko né mmyɛ manɛne ne mangarege mekomejɔɔ́ Ɛsɔwɔ.”

⁵Ne bɔɔ́ ako áwúge mbɔ, matɔɔ́ agɔ́ bwɔ́. Ne ajya Stɛfɛn ayi áfyɛɛ́ metɔɔ́ ne Jisɔs dɔɔ́ ne Mendoó Ukpea ɛgbeé ji metɔɔ́. Abifɔ alú Filip ne Prokɔrɔs, Nikanɔ ne Timɔn, Pamɛnas ne Nikolyɔs ayi atané melɔ Antiɔk ayi alaá muú Jus.

⁶Ɛbwɔ́ áchwɔ ne bɔɔ́ bimbɔ né mbɛ ushu áŋgbá Jisɔs, ne áŋgbá Jisɔs ánɛre bwɔ́ amu mmyɛ anɛmmyɛ ɛta bwɔ́.

⁷Ne mekomejɔɔ́ Ɛsɔwɔ akɛne agyage, ne ɛchomele bɔɔ́ Jisɔs ɛwé ɛlu né Jɛrosalɛ ɛwɛne ɛjyɛ mbɛ, ne gejamégé ampyɛ upɛ Ɛsɔwɔ ákwɔ́lege ntó depɔré Jisɔs.

⁸Stɛfɛn yina ayi ɛbwɔ́ ábɔ́ ajya, alu muú yi mejé Ɛsɔwɔ ɛbɔ́ ɛlu ne ji ne Ɛsɔwɔ achyɛge ji uto apyɛ ufélekpá ne ukpɛkpɛ uno né metɔɔ́ metɔɔ́ bɔɔ́.

⁹Bɔɔ́ Jus fɔ́ áchwɔ́, álɔ manyɛɛ́ mbeé ne Stɛfɛn. Ɛbwɔ́ ne áwya ɛcha mmyɛmenɛne ɛwé akuú ɛcha bɔɔ́ bi átané defwɛ́. Ɛbwɔ́ abɔ átané melɔ Sɛren ne Aleksanda ne abifɔ nto atané gebagé mewaá Silisya ne Ɛsya.

¹⁰Ɛbwɔ́ ápulé mankwɔre depɔ tire Stɛfɛn agare meti ɛpɔ́, getuge Mendoó Ukpea ɛbɔ ɛchyɛge ji deŋgare mejɔɔ́.

¹¹Ne ɛbwɔ́ achyɛ́ bɔɔ́ fɔ́ unyiɛlé nnó áchwɔ́ byɔ gebyɔ nnó ɛbwɔ́ abɔ́ áwuú nkane Stɛfɛn ájɔɔ́ge mejɔɔ́ mebomebo ne Ɛsɔwɔ ne Mosis.

¹²Mechɔ ɛwé ɛsɔ́ bɔɔ́ matɔɔ́ chóncho ne ákpakpa melɔ ne anlɛre mabɛ́ Ɛsɔwɔ. Ne ájyɛ pyɛ́ Stɛfɛn áchwɔ né mbɛ ushu ɛchomele ákpakpa bɔɔ́ Jus.

¹³Bɔɔ́ bina áchwɔ ne bɔɔ́ bifɔ abi ágaré gebyɔ ake, “Mende yina ajɔɔ́ge mejɔɔ́ mebomebo mbaá ɛcha upɛ Ɛsɔwɔ se yɛndé bií ne mabɛ́ Mosis.

¹⁴Ɛsé debɔ́ dewú ji ajɔɔ́ ake, Jisɔs, mende Nasarɛt ammuú nyɛ ɛcha upɛ Ɛsɔwɔ ne akwɔrege nyɛ ntó gepɔge melɔ geko ɛyi Mosis abɔ́ alɛré ɛsé.”

¹⁵Bɔɔ́ ako abi abɔ́ alu né ɛcha ɛso ɛwémbɔ, átó Stɛfɛn amɛ mmyɛ ne ágɛ́ nnó ushu bi ukwɔré úlú ɛke ɛbi ɛkiɛ́nné Ɛsɔwɔ.