Read Denya I Tɛssalonika 3 Bible Online

I Tɛssalonika 3 - Denya bible

I Tɛssalonika 3

¹Ne ndɛre ɛsé dékɛlege nnó déma détuú mashu ne ɛnyú, dégɛ́gé nnó dékagé ko sé metɔɔ́ ndɛre delá dépɔɔ́ ne ɛnyú, défɛre nnó ɛlú galɔ́gálɔ́ nnó ɛsé ne Silas dékpɛ delá né melɔ Atɛns,

²détɔ́ meŋmɛ sé Timɔti ɛta nyú. Ji apyɛ utɔɔ́ Ɛsɔwɔ choncho ne ɛsé ne apóge ɛsé mangare abya melɔ́mélɔ́ Kras. Ɛsé détɔ ji nnó achwɔ́ afyɛ ɛnyú ɛshyɛ, ápyɛ́ metɔɔ́ ɛwé ɛnyú défyɛɛ́ ne Kras ɛ́bɛ́né,

³nnó ɛ́kágé muú nyú fɔ abɔ gepwa né metɔɔ́ gétúgé gefɔgé ɛfwyale ɛwé bɔɔ́ ápyɛ ɛnyú dégɛne. Ɛnyú ambɔɔ́ dékaá mɛ nnó mbɔ ne Ɛsɔwɔ akɛlege nnó ɛpyɛ ne bɔɔ́ bií.

⁴Yɛ gébégé ɛsé délu ne ɛnyú, débɔ mɛ mbɛ dégare ɛnyú nnó ɛsé ako dégɛne nyɛ ɛfwyale. Ne wyɛmbɔ ntó ne ɛpyɛɛ́, ɛnyú ambɔɔ́ dékaá cháŋéné.

⁵Getúgé me nla nkage ko sé metɔɔ́ ne ntɔme Timɔti nnó achwɔ́ apɛ mbɔgé ɛnyú delú défyɛɛ́ wyɛ metɔɔ́ ne Kras waá défyɛɛ́ fɔ́. Me mpyɛmbɔ́ gétúgé nnó mbɔ́ ɛfɔ nnó ndɔ fɔ danchɔmeló muú achwɔɔ́ bɔɔ́ ne mmuameno, apyɛ ɛnyú délyaá mamfyɛ metɔɔ́ ne Jisɔs. Ne nnó ndɔ fɔ utɔɔ́ ɛbi dépyɛ ɛta nyú uno mme detu.

⁶Ne nana ayi Timɔti atane ɛta nyú achwɔɔ́, achwɔ́ ɛsé ne abya melɔ́mélɔ́ nnó ɛnyú delú défyɛɛ́ wyɛ metɔɔ́ ne Kras ne débɔɔ́ wyɛ gejeé ne atɛ. Agare ntó ɛsé ndɛre ɛsé delú ɛnyú metɔɔ́ chí chi chí ne nnó ɛnyú debɔ gejeé dɔɔ́ mangɛ ɛsé wyɛ ndɛre ɛsé ntó débɔɔ́ gejeé mangɛ ɛnyú.

⁷Aŋmɛ sé, gétú ɛyigémbɔ, yɛ́ ɛlé bɔɔ́ ápyɛ ɛsé déwuú ubalé dégɛne ɛfwyale, matɔɔ́ ákwene ɛsé mmu néndé ɛnyú delú défyɛɛ́ wyɛ metɔɔ́ ne Kras.

⁸Ne nana amba apwya ɛsé mmu ndɛre ɛnyú détɛne ne ɛshyɛ défyɛɛ́ metɔɔ́ ne Ata.

⁹Ɛsé dékage yɛ́ ndɛre détamege Ɛsɔwɔ né mmyɛmenɛne gétúgé genó ɛyi ji apyɛ né geŋwáge nyú, ne nechɔ́chɔ́ ɛniné ɛsé déwyaá né mbɛ ushu Ntɛ sé Ɛsɔwɔ.

¹⁰Ɛsé dénɛnemmyɛ mbaá Ɛsɔwɔ ne matɔɔ́ sé ako, utuú ne ŋwɔmese nnó ji ápyɛ ɛsé dema detuú mashu ne atɛ, nnó délɛre ɛnyú unó bi ɛnyú débɔɔ́ mankaá, ɛbi upyɛɛ́ nnó metɔɔ́ ɛwé ɛnyú défyɛɛ́ ne Kras ɛbɛne cháŋéné.

¹¹Dénɛnemmyɛ nnó Ntɛ ɛsé Ɛsɔwɔ jimbɔɔ́ ne Ata sé Jisɔs apyɛ ɛsé degɛ meti déchwɔ́ detuú mashu ne ɛnyú.

¹²Dénɛnemmyɛ nnó Ata apyɛ gejeé ɛyigé ɛnyú débɔɔ́ ne atɛ choncho ne bɔɔ́ ako geja ɛké ɛyigé ɛsé débɔɔ́ ne ɛnyú.

¹³Déké dépyɛɛ́ mbɔ, Ata apyɛɛ́ matɔɔ́ nyú ábɛ́nege, apyɛ ɛnyú débɛɛ́ fɔ́ gyɛɛ́ né meti fɔ, ne apyɛ ɛnyú débɛɛ́ bɔɔ́ ukpea gébégé détɛnege né mbɛ ushu Ntɛ sé Ɛsɔwɔ né bií bi Kras ákerege meso fa mme ne bɔɔ́ ukpea bií ako.