Read Dhundari मरकुस 16 Bible Online

मरकुस 16 - Dhundari bible

मरकुस 16

¹आरामहाळा दन बित्या सुं मरियम मगदलीनी, सलोमी अर याकूब की माई मरियम ईसु की ल्यास क लगाबा बेई खसबूहाळा सामान मोल ली।

²दितवार क दन सुवारे दन उगता'ई वे कबर प गी।

³वे बतळाती जारी छी क, “आपण्अ बेई कबर को भाटो कुण हटावलो?”

⁴फेर जद्‍या वे नजरा उठा'र नाळी तो देखी क वो भाटो उण्डअ सुं हट मेल्यो छो। वो भाटो घणु बड़ो छो।

⁵फेर जद्‍या वे कबर क माईन्अ गी तो वे देखी क एक मनख धोळाफट लत्ता पेर उंकी जीवणी-बगल म बेठ्‍यो छ। अर वे ड़रप गी।

⁶फेर वो मनख वान्अ खियो, “डरपो मतो, थें जी ईसु न्अ ज्यो नासरत नगर को रेबाळो छ हेररी छो, जिन्अ सुळी प लटकाया छा, वो जिन्दो हेग्यो! वो अण्डअ कोन्अ। ई ठार न्अ देखो जण्ढ्अ उन्अ मेल्या छा।

⁷अब थें जावो अर उंका चेला न्अ अर पतरस न्अ खिज्यो क वो थासुं पेलीई गलील म जार्यो छ। जस्यान वो थान्अ खियो छो, वो थान्अ उण्डअ'ई मल्अलो।”

⁸जद्‍या ड़र अर अचम्बा म हेर वे कबर म सुं बारे नखळर भागगी। वे कोई न्अ कांई बी कोन बताई क्युं क वे घणाजोर सुं घबरागी छी।[22]

⁹दितवार क दन सुवारेई जिन्दो हेबा क पाछ्अ वो सबसु पेली मरियम मगदलीनी क साम्अ प्रगटयो, जिम्अ सुं वो सात दुष्टात्मा न्अ नखाळ्यो छो।

¹⁰वा ईसु की लाराळा न्अ, ज्यो कळेस म पड़र, रोवणा पिटणा करर्या छा, जार बताई।

¹¹जद्‍या वे सुण्या क ईसु जिन्दो छ अर वा उन्अ देखी छ, तो वे बस्वास कोन कर्या।

¹²ईक्अ पाछ्अ वा चेला म सुं दो क साम्अ, ईसु दूसरा भेष म प्रगटयो, जद्‍या वे यरूसलेम सुं खुदक्अ गांव जारया छा।

¹³वे पाछा आर दूसरा न्अ बी ईका बारा म बताया, पण वे वांको बी बस्वास कोन कर्या।

¹⁴फेर जद्‍या उंका ग्यारा चेला रोटी खार्या छा, तो वो वाक्अ साम्अ प्रगटयो अर वान्अ वाका मनां की कळ्डाई अर बेबस्वास बेई लड़यो क्युं क जिन्दो हेबा क पाछ्अ वे वाका समचार को बस्वास कोन कर्या, ज्यो ईसु न्अ जिन्दो हेबा क पाछ्अ देख्या छा।

¹⁵फेर वो वान्अ खियो, “जावो अर सबळी दुनिया का सबळा मनखा न्अ चोखो समचार द्‍यो।”

¹⁶ज्योबी चोखा समचार म बस्वास करअ अर बतिस्मो लेव्अ, उंको उद्धार होवलो अर ज्यो बस्वास कोन करअ, वे परमेसर क साम्अ दोषी मान्या जावला।

¹⁷“ज्यो म्हारअ उपरअ बस्वास करअ ला, वांन्अ ये अचम्बा का काम करबा की सकत्यां मल्अली; वे म्हारा नांऊ सुं दुष्टात्मा न्अ नखाळ्अला, वे नुई नुई बोल्या बोल्अला,

¹⁸अर ज्यो वे खुदका हाथा सुं सांप-ढिण्ढवा न्अ पकड़ ले अर जैर बी पी जाव्अ तो वाक्अ कांई बी कोन हेवलो। वे बिमारा क माथ्अ हाथ मेलेला अर वे नीका हे जावला।”

¹⁹जद्‍या परबु ईसु चेला सुं अस्यान बतळा लियो तो उन्अ सरग म उठालिया। वो परमेसर की जीवणी-बगल म बेठग्यो।

²⁰उंका चेला बारे जार सबळी ठार म चोखा समचार को परचार कर्या, वाकी लार परबु परमेसर काम करर्यो छो। परबु परमेसर वाका परचार न्अ अचम्बा का काम की सक्‍ति सुं भरर सांचो बणार्यो छो।