Read Dhundari लूका 1 Bible Online

लूका 1 - Dhundari bible

लूका 1

¹घणा मनख आपण्अ बीच मं बरती बाता को ब्योरो माण्ढबा की जोरी कर्या

²ज्यो वान्अ सरु सुं होती देख्या छा। वे मनख ये बाता बताया छ अर वे चोखा समचार का परचार करबाळा रिया छा।

³सरीमान थियुफिलुस! क्युं क म सरूवात सुंई सबन्अ घणी चोकसी सुं पढ़यो छु जिसुं मन्अ यो चोखो लाग्यो क म बी थारअ बेई ईको एक नम्बरवाई वर्णन लखु।

⁴जिसुं थे या जाणल्यो क ज्यो बाता थान्अ सखाई गेई छ वे परमाणित छ।

⁵वा दना मं जद्‍या यहूद्‍या प हेरोदेस को राज छो अबिय्याह का दल मं जकर्याह नांऊ को एक याजक छो। उंकी लुगाई हारून का बंस की छी। उंको नांऊ एलीसिबा छो।

⁶वे दोनी परमेसर की नजरा मं धरमी छा। वे परमेसर की सबळी आज्ञा अर निमा न्अ निस्पाप मान्अ छा।

⁷वांक्अ कोई आस-ओलाद कोन्अ छी क्युं क एलीसिबा बांझ छी अर दोनी बुढ़ा होग्या छा।

⁸जद्‍या जकर्याह का दल की मन्दर म सेवा करबा की बज्जी आई अर वो परमेसर क साम्अ उपासना करबा बेई उबो छो।

⁹जद्‍या याजका का रुवाज की न्याई गोळया गुड़ाया अर उंका नांऊ की परची नखळी क वो मन्दर म जार धूप बाळ्अ।

¹⁰धूप बाळबा की बगत सबळा मनख बारअ परातना करर्या छा।

¹¹उं बगत परबु को सरगदूत उन्अ धूप देबा की वेदी की जीवणी-बगल मं उबो दिख्यो।

¹²जकर्याह सरगदूत न्अ देखर घबराग्यो अर ड़र क मारअ जड़ होग्यो।

¹³फेर परबु को सरगदूत उन्अ खियो, “जकर्याह ड़रप्अ मत, थारी परातना की सुणाई होगी छ जिसुं थारी लुगाई एक छोरा न्अ जण्अली, अर तु उंको नांऊ यूहन्‍ना रखाणज्यो।

¹⁴वो थन्अ खुसी अर आण्द देव्अलो, अर उंका जनम सुं घणा मनख राजी होवला,

¹⁵क्युं क वो परबु की नजरा म महान होवलो। वो कद्‍या बी अंगूरा को खाटो रस अर नसा की चीजा कोन्अ पिवलो। जनम सुंई वो पवितर-आत्मा सुं भर्यो होवलो।

¹⁶वो इजरायल का घणा मनखा न्अ वांका परमेसर की ओड़ी फरावलो।

¹⁷वो एलिय्याह जस्यानकी सक्‍ति अर परमेसर की आत्मा मं परबु क आग्अ-आग्अ चाल्अलो। जिसुं वो माई-बाप को मन ओलादा ओड़ी मोड़ देव्अलो अर वो आज्ञा कोन मानबाळा न्अ अस्या बच्यारा बेई उकसाव्अलो जिसुं वे धर्मया ज्यान का बच्यार रखाण्अ। यो सब वो मनखा न्अ परबु बेई तियार करबा बेई करअलो।”

¹⁸जद्‍या जकर्याह परबु का सरगदूत न्अ खियो, “म या कस्यान जाणु क्युं क म एक बुढ़ो मनख छु? अर म्हारी घरहाळी बी बुढ़ी होगी।”

¹⁹जद्‍या परबु को सरगदूत खियो, “म जिब्रायल छु। म वो छु ज्यो परमेसर क साम्अ उबो रेऊ छु। मन्अ तसुं बतळाबा अर यो चोखो समचार बताबा खन्दाया छ।

²⁰पण देख! क्युं क तु म्हारा सब्दा प ज्यो सई बगत आया सुं सांचा होवला वाप्अ बस्वास कोन कर्यो जिसुं तु गुंगो हो जावलो अर उं दन ताणी कोन बोल सक्अलो जद्‍या ताणी ये बचन पुरा कोन हो जाव्अ।”

²¹उण्डी बाण्अ लोगबाग जकर्याह की बाठनाळरया छा। वान्अ अचम्बो होर्यो छो क उन्अ मन्दर म अतरी बेर कस्यान लागी?

²²फेर जद्‍या वो बाण्अ आयो तो वासुं कोन बोल पार्यो छो। वे जाणग्या क उन्अ मन्दर म कोई दर्सण होया छ। वो गुंगो होग्यो छो अर खाली असारा करर्यो छो।

²³अर फेर अस्यान होई क मन्दर सेवा की बगत पूरी होई तो वो पाछो खुदक्अ घरा चलग्यो।

²⁴थोड़साक दना पाछ्अ उंकी लुगाई इलीसिबा पेटसुं होई पांच मिना ताणी वा सबसु एकाड़ी रेई। वा खेई,

²⁵“अब आखरी बगत मं जार परबु अस्यान म्हारी सायता कर्यो छ। मनखा का बीच म म्हारी लाज राखबा बेई वो म्हारी सुदी लियो छ।”

²⁶इलीसिबा को जद्‍या छठो मिनो चालर्यो छो तो गलील का एक नगर नासरत मं परमेसर एक सरगदूत जिब्रायल न्अ

²⁷एक कुंवारी कन्अ खन्दायो जिकी यूसुफ नांऊ का एक मनख सुं सगाई होगी छी। वो दाऊद का बंस को छो। अर उं कुंवारी को नांऊ मरियम छो।

²⁸जिब्रायल उकन्अ आर खियो, “थारी जै हो! थारअ उपरअ परबु की दीया होई छ। परबु थारी लार छ।”

²⁹ये बचन सुणर वा घणाजोर सुं घबरागी, वा बच्यार मं पड़गी क अस्यान बोलबा को कांई मतबल हो सक्अ छ?

³⁰जद्‍या सरगदूत उन्अ खियो, “मरियम ड़रप्अ मत, परमेसर की दीया थारप्अ होई छ।

³¹सुण! तु पेटसुं होवली अर एक छोरा न्अ जण्अली अर तु उंको नांऊ ईसु रखाण्अली।

³²वो महान होवलो अर वो परम परमेसर को छोरो खुवावलो। अर परबु परमेसर उन्अ उंका बाप को सिंहासन देव्अलो।

³³वो आखरी बगत ताणी याकूब का घराणा प राज करअलो अर उंको राज कद्‍या बी खतम कोन्अ होव्अलो।”

³⁴जद्‍या मरियम सरगदूत न्अ खेई, “या सांची कस्यान हो सक्अ छ? मं तो हालताणी कुंवारी छु।”

³⁵फेर सरगदूत खियो, “थार कन्अ पवितर-आत्मा आवली अर परमप्रधान परमेसर की सक्‍ति थन्अ अपणी छाया म ले लेली। अस्यान वो पैदा होबाळो पवितर बाळक परमेसर को छोरो खुवावलो।

³⁶अर सुण थारा कुटम्ब की इलीसिबा बुढ़ापा म आस सुं छ अर यो उंको छठो मिनो छ। लोगबाग खेव्अ छा क वा बांझड़ी छ।

³⁷पण परमेसर बेई कांई बी अणोतो कोन्अ।”

³⁸मरियम खेई, “मं परबु की दासी छु। ज्यो तु म्हारअ बेई खियो छ वस्यान ई होव्अ।” अर फेर सरगदूत उकन्अ सुं चलग्यो।

³⁹वा दना म मरियम तियार होर बेगीसीक यहूद्‍या का डुंगर क पेलाड़ी का नगर मं चलगी।

⁴⁰फेर वा जकर्याह क घरा पुंची अर वा इलीसिबा न्अ नमस्कार करी।

⁴¹इलीसिबा जस्यानई मरियम को नमस्कार सुणी तो ज्यो बाळक इलीसिबा का पेट मं छो उचकबा लागग्यो अर इलीसिबा पवितर-आत्मा सुं भरगी।

⁴²अर वा जोरसुं खेबा लागी, “तु सबळी लुगाया म सबसु ज्यादा सोभागवती छ। अर जी बाळक न्अ तु जण्अली वो धनै छ।

⁴³पण या अतरी बड़ी बात म्हारी लार क्युं होई क म्हारा परबु की माई म्हारअ कन्अ आई छ!

⁴⁴क्युं क थारा नमस्कार की आवाज जस्यानई म्हारा काना मं पड़ी, म्हारा पेट को बाळक खुसी सुं उचक्यो छो।

⁴⁵तु धनै छ ज्यो या बस्वास करी छ क परबु ज्योबी खियो छ वो पूरो होर रेव्अलो।”

⁴⁶जद्‍या मरियम खेई, “म्हारी आत्मा परबु की महमा करअ छ;

⁴⁷म्हारी आत्मा म्हारा रुखाळा परमेसर मं आण्द सुं छ।

⁴⁸वो अपणी गरीब दासी की सम्भाळ लियो छ हां आज पाछ्अ सबळा मन्अ धनै खेवला।

⁴⁹क्युं क वो परम सक्‍तिमान परमेसर म्हारअ बेई घणो लूंठो काम कर्यो छ उंको नांऊ पवितर छ।

⁵⁰उंकी दीया भक्‍ता प पीढ़ी सुं पीढ़ी ताणी बणी रेव्अ छ।

⁵¹वो अपणा हाथा की तागत दखायो छ वो घमण्डया न्अ कण-कणका कर दियो।

⁵²वो बड़ा-बड़ा राजा-माराजा न्अ वांका सिंहासना सुं उतार दियो अर सिधा मनखा न्अ ऊंचा उठायो छ।

⁵³वो भूखा न्अ चोखा-चोखा पकवान खुवार धपा दियो अर भागवाना न्अ रिता हाथा ई पाछा खन्दा दियो।

⁵⁴आपणा आग्ला बढ़ा न्अ दिया बचना की ज्यान वो अपणा दास इजरायल की सायता करबा आयो।

⁵⁵उन्अ अबराम अर उंका बंस का प सदा दीया दखाबा की याद रेई।”

⁵⁶कोई तीन मिना ताणी मरियम इलीसिबा की लार रेई अर फेर खुदक्अ घरा पाछी आगी।

⁵⁷इलीसिबा क बाळक जणबा की बगत आई अर वा एक छोरा न्अ जणी।

⁵⁸जद्‍या उंका पाड़ोसी अर परवार का मनख या सुण्या क परबु उंक्अ उपरअ दीया कर्यो छ तो सबळा उंकी लार मलर खुसी मनाया।

⁵⁹अर फेर अस्यान होई क आठवां दन छोरा को खतनो करबा बेई लोगबाग उण्डअ आया। वे उंका बाप का नांऊ की न्याई उंको नांऊ जकर्याह रखाणर्या छा,

⁶⁰जद्‍या उंकी माई खेई, “नई ईको नांऊ तो यूहन्‍ना रखाणणी छ।”

⁶¹जद्‍या वे उन्अ खिया, “थारा कस्या बी लाकती का को यो नांऊ कोन्अ।”

⁶²अर फेर वे असारा मं उंका बाप न्अ बुज्या क वो उन्अ कांई नांऊ देबो छाव्अ छ?

⁶³जद्‍या जकर्याह वांसु माण्ढबा बेई एक तखती मांगर लख्यो, “ईको नांऊ यूहन्‍ना छ।” ईप्अ वे सबळा बच्यार मं पड़ग्या।

⁶⁴जद्‍या एकधम उंकी जबान खुलगी अर उंकी आवाज नखळबा लागगी। वो बोलबा लागग्यो अर परमेसर की महमा करबा लागग्यो।

⁶⁵जिसुं सबळा पाड़ोसी डरपगा अर यहूदया का सबळा डुंगरा का छेत्र का मनखा म वा सब बाता की बतळ्यावण होबा लागगी।

⁶⁶ज्योबी या सुण्यो वो अचम्बा मं होर खेबा लागग्यो, “यो छोरो कांई बण्अलो?” क्युं क परबु को हाथ उंक्अ उपरअ छ।

⁶⁷जद्‍या उंको बाप पवितर-आत्मा सुं भरग्यो अर वो या भविष्यवाणी कर्यो

⁶⁸“इजरायल का परमेसर की जै हो क्युं क वो खुदका मनखा की सायता करबा बेई आयो अर वान्अ आजाद कर्यो।”

⁶⁹वो आपण्अ बेई अपणा सेवक दाऊद का परवार मं एक रुखाळो दियो।

⁷⁰ज्यो वो घणो पेली अपणा पवितर परमेसर की ओड़ी सुं बोलबाळा का मुण्ढा सुं बचन दियो छो।

⁷¹वो आपान्अ आपणा बेरया सुं अर वा सबळा का हाथा सुं, ज्यो आपसुं सूग करअ छा, आपान्अ छुड़ाबा को बचन दियो छो।

⁷²आपणा आग्लाबड़ा प दीया दखाबा को अर खुदका बचना न्अ याद रखाणबा को

⁷³उंको बचन छो एक वा सोगन छी ज्यो आपणा आग्लाबड़ा अबराम की लार लियो छो

⁷⁴क आपणा बेरया का हाथा सुं आपान्अ छूटवाड़ो मल्अ अर बना कोई ड़र क आपणा परबु की सेवा करबा की आज्ञा मल्अ।

⁷⁵अर आपणी जन्दगी मं आपा उंक्अ साम्अ सदा पवितर अर धरमी बण्या रे सकां।

⁷⁶“ह छोरा, अब तु परमप्रधान परमेसर की ओड़ी सुं बोलबाळा खुवावलो। क्युं क तु परबु क आग्अ-आग्अ चालर उंक्अ बेई गेल्‍ला न्अ तियार करअलो।

⁷⁷अर उंका मनखा न्अ खेवलो क वांका पापा की छमा सु'ई वांको उद्धार होव्अलो।

⁷⁸आपणा परमेसर की दीया सुं एक नया दन को उजाळो आपण्अ उपरअ सरग सुं उतरअलो।

⁷⁹वांक्अ उपरअ चलकबा बेई ज्यो मोत की काळी छाया म जीर्या छ क आपणा पगा न्अ सान्ति का गेल्‍ला की दसा मल्अ।”

⁸⁰अस्यान वो छोरो बड़ो होबालाग्यो अर उंकी आत्मा गाढ़ी सुं बी गाढ़ी होबा लागी। वो मनखा मं प्रगट होबासुं पेली सूनी ठार मं रेव्अ छो।