Read Dhundari लूका 24 Bible Online

लूका 24 - Dhundari bible

लूका 24

¹सप्ताह का सरूवात क दन सुवारेई भागफाटया की वे बेरबान्या बी खुसबु हाळा सामान न्अ जिन्अ वे तियार करी छी कबर प लेर आई।

³वे माईन्अ चलगी पण बान्अ परबु ईसु की ल्यास कोन्अ मली।

⁴जद्‍या वे ई बात मं उळजरी छी क बाक्अ सांकड्अ चलक-भलक करता लत्ता फेरया दो मनख आर उबा हेग्या।

⁵ड़र क मारअ वे जमी ओड़ी खुदका मुण्ढा लटका मली छी। वे दो मनख बान्अ खिया, “ज्यो जीवतो छ बीन्अ थे मुर्दा मं क्युं हेररी छो?

⁶वो अण्डअ कोन्अ। वो जीवतो हेग्यो। याद करो जद्‍या वो गलील मंई छो, वो थान्अ कांई खियो छो?”

⁷वो खियो छो क, मनख का छोरा न्अ पाप्या क हाथा मं सुप्यो जाबो जरूरी छ। फेर वो सुळी प लटकायो जावलो अर तीसरअ दन नस्तेई बीन्अ फेर जीवतो करणी छ।

⁸जद्‍या बा बेरबान्या न्अ उंकी बाता याद आगी।

⁹वे कबर सुं पाछी आगी अर वे ये सबळी बाता बा ग्यारा अर ओर सबळा न्अ बताई।

¹⁰वे बेरबान्या छी मरियम मगदलीनी, योअन्‍ना अर याकूब की माई, मरियम। वे अर बाकी लार की दूसरी बेरबान्या ये बाता थरपेड़ा न्अ बतारी छी।

¹¹पण बाकी बाता थरपेड़ा न्अ एक कस्सा की न्याऊ लागी अर वे बाको बस्वास कोन कर्या।

¹²पण पतरस उबो होयो अर कबर ओड़ी भाग्योई आयो। वो तण्अ लळर देख्यो पण बीन्अ सण का चोखा तागा सुं बण्या कफन क अलावा कांई कोन्अ दिख्यो। फेर खुदका मन ई मन मं अचम्बो करतो-करतो वो पाछो चलग्यो।

¹³बी दन बीका चेला मंसुं दो, यरूसलेम सुं कोई सात मील आंतरअ बस्या इम्माऊस नांऊ का गांव मं जारया छा।

¹⁴ज्यो बाता हेई छी बाप्अ वे आमा-सामा बतळार्या छा।

¹⁵जद्‍या वे या बाता प बतळ्यावण अर बच्यार करर्या छा जद्‍या खुद ईसु उण्डअ आग्यो अर बाकी लार-लार चालबा लागग्यो।

¹⁶पण बान्अ बीन्अ पचाणबा कोन्अ दियो,

¹⁷ईसु बान्अ खियो, “चालता-चालता थे आमा-सामा ये कुणकी बाता की बतळ्यावण करर्या छो?” वे रुकग्या। वे घणा दुखी दिखर्या छा।

¹⁸बाम्अ सुं किलयुपास नांऊ को एक मनख बीन्अ खियो, “यरूसलेम मं रेबाळो तूई ऐकलो अस्यो मनख हलो ज्यो पाछला दना मं होइ बाता का बारा मं कोन्अ जाण्अ।”

¹⁹ईसु बान्अ बुज्यो, “कसी बाता?” वे बीन्अ खिया, “सब नासरी ईसु का बारा मं छ वो एक अस्यो मनख छो ज्यो खियो अर कर्यो बीसुं परमेसर अर सबळा मनखा क साम्अ या दखा दियो क वो एक महान परमेसर की ओड़ी सुं बोलबाळा छो।

²⁰अर मे ई बारा मं बाता करर्या छा क आपणा परमुख याजक अर राजो कस्यान बीन्अ मोत की सज्या बेई सुंप दिया अर वे बीन्अ सुळी प लटका दिया।

²¹मे आस रखाण्अ छा क यो बोई छ ज्यो इजरायल न्अ आजाद करवातो अर या सब क बारे या बाता न्अ हिया तीसरो दन छ।

²²अर म्हाकी टोळी की एकात बेरबान्या म्हान्अ अचम्बा म पटक दी। आज सुवारे भागफाटया की वे कबर प गई।

²³पण बान्अ उण्डअ ल्यास कोन्अ लादी। वे पाछी आई अर म्हान्अ बताई क सरगदूता का दर्सण पाई छ ज्यो खिया छ क वो जिन्दो छ।

²⁴फेर म्हाम्अ सुं एकात कबर प गिया अर जस्यान बेरबान्या बताई छी उण्डअ वस्यान ई पाया। वे बीन्अ कोन्अ देख्या।”

²⁵जद्‍या ईसु बान्अ खियो, “थे कतरा मुरख छो अर परमेसर की ओड़ी सुं बोलबाळा ज्योबी खिया, बीप्अ बस्वास करबा मं कतरा ढिला छो।

²⁶कांई मसी बेई यो जरूरी कोन्अ छो क वो या दुखा न्अ भोग्अ अर अस्यान खुदकी महमा मं घुस्अ?”

²⁷अर अस्यान मूसा सुं सरू कर सबळा परमेसर की ओड़ी सुं बोलबाळा सुं सरू करर सबळा सास्तरा मं बीका बारा मं ज्यो खिया छा, वो बान्अ चोखा खोलर समझायो।

²⁸वे जद्‍या बी गांव कन्अ आया, जण्ढ्अ जारया छा, ईसु अस्यान बुवार कर्यो, जाण्अ बीन्अ आग्अ जाणी छ।

²⁹पण वे बीन्अ जोरी कर खिया, “म्हाकी लार रूक जा क्युं क स्याम हेगी अर अब दन आथग्यो।” तो वो बाकी लार रुकबा माईन्अ आग्यो।

³⁰जद्‍या बाकी लार वो खाबा का पाटा प छो जद्‍या वो रोटी उठायो अर धन्यवाद कर्यो। फेर बीन्अ तोड़र बान्अ देर्यो छो

³¹जद्‍या बाकी आंख्या खुलगी अर वे बीन्अ पेचाण लिया। पण वो बाक्अ साम्अ सुं अन्तरध्यान हेग्यो।

³²फेर वे आमा-सामा खिया, “गेल्‍ला मं जद्‍या वो आपसुं बाता करर्यो छो अर आपान्अ सास्तर समझार्यो छो तो कांई आपणा मना मं आग सीक कोन्अ भभकी छी?”

³³फेर बेगासाक उबा हिया अर पाछा यरूसलेम ओड़ी चलग्या। उण्डअ बान्अ ग्यारा थरपेड़ा अर दूसरा मनख एकलार भेळा मल्या,

³⁴ज्यो खेर्या छा, “ह परबु सांच्याई जीवतो हेग्यो। वो समौन न्अ दर्सण दियो छो।”

³⁵फेर वे दोनी गेल्‍ला म ज्योबी होयो छो बीको ब्योरो दिया अर बताया क “जद्‍या वो रोटी का टुकड़ा लियो छो तो वे ईसु न्अ कस्यान पेचाण्या छा।”

³⁶हालताणी वे बान्अ ये बाता बताईर्या छा क वो खुद वाक्अ गाब्अ आर उबो हेग्यो अर बान्अ खियो, “थान्अ सान्ति मल्अ।”

³⁷पण वे चमकर घबराग्या। वे बच्यार कर्या जाण्अ वे कोई भूत देखर्या छ।

³⁸पण वो बासुं बोल्यो, “थे अस्यान क्युं घबरार्या छो? थांका मना मं बहम क्युं उठर्या छ?

³⁹म्हारा हाथा अर म्हारा पगा न्अ देखो। म्हारअ हाथ लगावो, अर देखो क कोई भूत क हाड़-मांस कोन्अ हेव्अ अर जस्या थे देखर्या छो क वे म्हारअ छ।”

⁴⁰या खेर वो हाथ अर पग बान्अ दखायो।

⁴¹पण खुदकी खुसी म्हारअ वे हालताणी बी बस्वास कोन करर्या छा। वे कळाचूक छा तो ईसु बान्अ खियो, “अण्डअ थां कन्अ खाबा बेई कोई-कांई छ क?”

⁴²वे रांदेड़ी एक मच्छी को टुकडो बीन्अ दिया।

⁴³अर वो बीन्अ लेर बाक्अ साम्अ ई खायो।

⁴⁴फेर वो बान्अ खियो, “ये बाता वे छ ज्यो मं थान्अ जद्‍या खियो छो जद्‍या मं थांकी लार छो क जतरी बी बाता मूसा की बेवस्था अर परमेसर की ओड़ी सुं बोलबाळा अर भजना की कताब मं म्हारा बारा मं मण्ढरी छ सबळी पूरी हेव्अ।

⁴⁵फेर पवितर सास्तरा न्अ समझबा बेई वो बाकी बुद्धि का गेल्‍ला न्अ खोल दियो।”

⁴⁶अर वो बान्अ खियो, “या बाई छ ज्यो मण्ढर्यो छ क मसी दुख भोग्अलो अर तीसरअ दन मरया मंसुं जीवतो ह जावलो।

⁴⁷अर बीका नांऊ सुं पापा सुं छमा बेई मन फराबा को यो संदेसो यरूसलेम सुं सरू हर सबळा देसा मं फेलायो जावलो।

⁴⁸थे या बाता गुवा छो।

⁴⁹अर अब म्हारो परम बाप मंसुं ज्यो प्रतिज्ञा कर्यो छ, बीन्अ म थांक्अ बेई खन्दाऊलो। पण थान्अ ई नगर मं बी बगत ताणी रुकणी छ, जद्‍या ताणी थे सरग की सक्‍ती कोन्अ भरजावो।”

⁵⁰ईसु फेर बान्अ बैतनिय्याह ताणी बाण्अ लेग्यो। अर वो हाथ ऊंचा कर बान्अ आसीर्वाद दियो।

⁵¹बान्अ आसीर्वाद देता-देता ई वो बान्अ छोड़ दियो अर फेर बीन्अ सरग मं उठालिया।

⁵²जद्‍या वे उंकी आराधना कर्या अर घणा आण्द की लार वे यरूसलेम पाछा आग्या।

⁵³अर मन्दर मं परमेसर की महमा करता-करता वे बगत काटबा लागग्या।