Read Dii Matío 13 Bible Online

Matío 13 - Dii bible

Matío 13

¹Zá̧ga̧ woo máa Yesu vúd kíilí la mbaa ya̧g mam Gáliléelı̵́ moo bi tú' hȩnne.

²Dúú ku̵u̵ sú̵g ya ɓu̵u̵lı̵́ na'a, ku̵u̵ gbɔ daa kannɔ máa, Yesu la ɗáá mbaa nɛ́ŋ́ tóólı̵́. Dúú vu̵ dii mbaa voo ya̧g nɛ'ɛmé.

³Ma Yesu zíd vu̵ ya̧g fáá fáá fáá, o̧d vu̵: “I ki sú̵m! Nán hu̵u̵d hu̵u̵lı̵́ tóó vúd laa hu̵u̵d woo hu̵u̵lı̵́.

⁴Sey ka dɨ hu̵u̵lı̵́ máa, hu̵u̵d tóó vu̵ pee hi̧naalȩ́. Nɔ́g waa vu̵ ya ɓee lá.

⁵Ka' tóó vu̵ pee ya kpi'idí, ya hád ka ɓu̵u̵ né máalȩ́. Vu̵ tá̧' vaŋná, moo hád ɓu̵u̵n yagalı̵́ né.

⁶A̧máa zá̧ga̧ ka ye' máa, vu̵ mbɛ́, vu̵ 'wɔ́, moo vu̵ ho̧n ya zágád ndaggı̵́ né.

⁷Ka' tóó vu̵ pee sa̧a̧m sa̧'a̧d voolı̵́. Sa̧'a̧d vu̵ na', vu̵ pɛ vu̵.

⁸Hu̵u̵d tóó vu̵ pee hág du̵u̵lı̵́, tóó kɔ́ yȩ́ń tȩmɛre, tóó vo' gúú, tóó vo' ta̧a̧nɔ́.

⁹Nán a dɨ kan tɔ́ggú̵ tée, a ki du̵u̵lı̵́ na'a.”

¹⁰Waa duulí Yesu woo vu̵ séé ya, vu̵ vigi: “Moo ȩn mɔ́ o̧d dúú vu̵ moo kan ya̧g zílílá?”

¹¹Yesu hí̧i̧d vu̵, o̧: “Ɨ́ víí máa, Tayɨɨ tú'ud ví moo, ví gaa hȩn yú̵ggı̵́ gbaŋ waalı̵́ woolı̵́ sú̵'ú̵. A̧máa nán tóó voo máa, ká tú'un vu̵ lá né.

¹²Nán ka dɨ kan hȩn tée, Tayɨɨ wú̵ń duu pú̵gu̵ tóó moo a nuŋ hȩn ɓu̵u̵ ú̵. A̧máa nán ı̵́ ka 'yɛ́n hȩn né tée, hȩn ı̵́ ka dɨ kannɔ máa, Tayɨɨ wú̵ń ɓɛ luu.

¹³Moo woo nɔ mí mood vu̵ moo kan ya̧g zílí, moo vu̵ tə́gə, vu̵ ho̧ gaa né. Vu̵ ki moo yȩ, a̧máa vu̵ kin ní, dɔ́n vu̵ tɔ́g né á̧ḿ.

¹⁴Anábi Esáya ká moo moo yȩ, moo woo nɔ ma hȩn yȩ kɔ́y ı̵́ yo̧go̧ yúú voolı̵́, ká o̧: ‘Víń ki kan tɔ́g víí ú, a̧máa wú̵ń dɔ́n ví tɔ́g né; víń tə́g kan nɔ́ɔ́ víí ú, a̧máa víń ho̧n né,

¹⁵moo zig yɛ zó̧ó̧ voo néé ó̧, vu̵ kan tɔ́g pɛ́lı̵́. Vu̵ sȩȩ nɔ́ɔ́ voo, moo ba ka bin ho̧ kan nɔ́ɔ́, ba ka bin ki kan tɔ́g bii, ba kan dɔ́d bi tɔ́g, ba ka bin tii zó̧ó̧, ba ka mín za̧a̧ bi ú.’

¹⁶“A̧máa ı̵́ víí máa, du̵u̵d víw, moo nɔ́ɔ́ víí vu̵ ho̧ hȩn, tɔ́g víí vu̵ ki moo sú̵'ú̵.

¹⁷Mí o̧d ví moo yȩ́ńne, anábi vu̵ kan nán ku̵u̵ kɔ́ hȩn hí̧í̧lí̧ Tayɨɨ woo máa vu̵ ɓu̵u̵lı̵́ na'a ká vu̵ hí̧í̧ bi ho̧ hȩn kíí ho̧ yɛ vu̵ á̧ḿ, a̧máa vu̵ ho̧n né. Ká vu̵ hí̧í̧ bi ki moo kíí ki yɛ vu̵ á̧ḿ, a̧máa vu̵ kin ní.

¹⁸“I ki sı̵́ ya̧g zílí nán hu̵u̵d hu̵u̵lı̵́ yɛ woo ka tú' má nɔ.

¹⁹Hȩn á̧á̧ ı̵́ ku̵u̵ pee hi̧naalȩ́ máa, wu̵ nán 'waapád ka ki moo gbaŋ waalı̵́ Tayɨɨ woo, ka dɔ́nnɔ tɔ́g né tée, Seeɗán ya vud moo ba ki pee woolı̵́ zó̧ó̧lȩ́.

²⁰Hȩn á̧á̧ ı̵́ ku̵u̵ pee ya kpi'idí máa, wu̵ nán ı̵́ ka ki moo Tayɨɨ, ka fȩȩ vaŋná kan zó̧ó̧ dȩ"ȩ́ má nɔ,

²¹fȩȩ moo waaná', a̧máa kan ya doo ndalı̵́ pɛ́lı̵́. Sey ku̵u̵ si̧'i̧d nán vu̵, ku̵u̵ duun vu̵ kan hȩn ɓı̵́d yúú moo Tayɨɨlı̵́ tée, kéé moo Tayɨɨ gbɔ há̧ná.

²²Hȩn á̧á̧ ı̵́ ku̵u̵ pee sa̧a̧m sa̧'a̧dı̵́ máa, wu̵ nán ı̵́ ka ki moo Tayɨɨ, a̧máa zó̧ó̧ tu̵u̵lı̵́ yúú hȩn góó vu̵lı̵́, kan hȩn zo"ı̵́ yúú hȩn naa vu̵lı̵́, vu̵ lı̵́d moo Tayɨɨ zó̧ó̧ woolı̵́, moo Tayɨɨ kɔ́n yȩ́ń woolı̵́ né.

²³Hȩn á̧á̧ ı̵́ ku̵u̵ pee hág du̵u̵lı̵́ máa, wu̵ nán ı̵́ ka ki moo Tayɨɨ, ka dɔ́ddu̵ tɔ́ggı̵́ má nɔ. Nán yȩ lii yȩ́ń, tóó kɔ́ tȩmɛre, tóó kɔ́ vo' gúú, tóó kɔ́ vo' ta̧a̧nɔ́.”

²⁴Yesu duu zíd vu̵ ya̧g tóó, o̧: “Gbaŋ waalı̵́ Tayɨɨ woo man kan nán tóó ka ba tú̵d hó̧d du̵u̵ bab woolı̵́ má nɔ.

²⁵A̧máa sey nán ku̵u̵ nə máa, ı̵́ maag woo tóó ya hu̵u̵du̵ hó̧d ɓı̵́d bab tíŋ́, daa lúú.

²⁶Sey tú̵d hó̧d ka tá̧', ka na', ka lɛ máa, hó̧d ɓı̵́d vu̵ sú̵g lɛ á̧ḿ.

²⁷Nán ba'ad baa pee woo vu̵ ya vigi: ‘Ba'á, ká ví ban tú̵d hó̧d du̵u̵ wu̵ bab víílí náa? Hó̧d ɓı̵́d yɛ vu̵ vúd tɛ́lá?’

²⁸Baa pee hí̧i̧d vu̵: ‘Ɨ́ maag míí tóó wu̵ kɔ́ hȩn yȩ nɔ.’ Nán ba'ad vu̵ duu vigi: ‘Ví hí̧í̧ oo la naa vu̵ gbɔ áa?’

²⁹Baa pee duu hí̧i̧d vu̵: ‘Áá'a. I naa vu̵ 'ya̧'a̧ yɛ tée, ka vín su̵g naa vu̵ kan tú̵d hó̧d á̧ḿ.

³⁰I gbɔ u̵u̵ sú̵g na' á̧ḿ, há̧á̧ a ya̧ sey tú̵d hó̧d fa̧"ȩ́. Sey woo a ya̧ tée, míń o̧d nán tú̵d hó̧d fa̧"ȩ́ vu̵ u̵u̵ dəŋ naa hó̧d ɓı̵́d vu̵ vad moo a̧nné vɛlı̵́, a̧máa u̵u̵ su̵g tú̵d yȩ́ń aa a̧a̧ míílí̧.’ ”

³¹Yesu duu zíd vu̵ ya̧g tóó, o̧: “Gbaŋ waalı̵́ Tayɨɨ woo man kan yȩ́ń sambɨɨm hó̧g nán tóó ka ɓɛ hu̵u̵ bab woolı̵́ má nɔ.

³²Wu̵ mba hȩn á̧á̧ tóó vu̵ kan yȩ́ń 'mɛ́ŋ́ 'waapád, a̧máa sey ka na' tée, na' mba wi' kpag vu̵ 'waapád. Maa nɔ́g waa vu̵ waa waa vu̵ sé"ı̵́ wu̵lı̵́.”

³³Yesu duu o̧d vu̵ ya̧g zílí tóó: “Gbaŋ waalı̵́ Tayɨɨ woo man kan wág wakȩ́ȩ́ tóó ka ɓɛ, ka duu ɓɛ zu̵m ááwa gbɛg zu̵u̵ nɔ́nɔ́, ka du' wág yȩ wu̵lı̵́, ka dɔn tée, ka fúŋ́ na'a má nɔ.”

³⁴Moo 'waapád yȩ Yesu o̧d dúú vu̵ kan ya̧g zílíi. O̧n vu̵ moo té' né, séý kan ya̧g zílíi.

³⁵Anábi tóó ká moo moo yȩ, moo woo nɔ ma hȩn yȩ kɔ́y ı̵́ yo̧go̧, ká o̧: “Míń moo moo míí kan ya̧g zílíi; míń vud hȩn ku̵u̵ yú̵g diga sey hág ka dəgə ná né máa vu̵ tú'.”

³⁶Sey woo Yesu kéé dúú vu̵ gbɔ, daa dɔ́ kíilí, waa duulí woo vu̵ laa woolı̵́, vu̵ vigi: “A̧m tú'ud vɔ́ moo yúú hó̧d ɓı̵́d babbı̵́ yȩ nɔ.”

³⁷Yesu hí̧i̧d vu̵, o̧: “Ɨ́ míí Tayɨɨ ka ba'an ya yɛ, mí ı̵́ ka ba tú̵d hó̧d du̵u̵ má nɔ.

³⁸Bab wu̵ hággɨ. Tú̵d hó̧d á̧á̧ du̵u̵ wu̵ nán ı̵́ ku̵u̵ 'yɛ́ zó̧ó̧ Tayɨɨ woolı̵́ máa vu̵ yu̵. Hó̧d ɓı̵́d wu̵ nán Seeɗán woo vu̵ yu̵.

³⁹Ɨ́ maag ka hu̵u̵ hó̧d ɓı̵́d máa, wu̵ Seeɗánne. Sey tú̵d hó̧d fa̧"ȩ́ wu̵ hág a 'wáa tɛ́ nɔ. Nán tú̵d hó̧d fa̧"ȩ́ wu̵ maleeka vu̵ yu̵.

⁴⁰Hág a 'wáa tée, vú̵ń kɔ́ ı̵́ yo̧go̧ á̧ḿ, kɔ́ ı̵́ ku̵u̵ naa hó̧d ɓı̵́d vu̵ gbɔ vɛlı̵́ máa wɔgɔ.

⁴¹Míń ba' maleeka míí vu̵. Nán ku̵u̵ dɔd daga vu̵ ya hȩn ɓı̵́ddı̵́ kan ı̵́ ku̵u̵ ŋgó̧o̧d Tayɨɨ tɔ́g máa vu̵, maleeka vú̵ń nɛŋ vu̵ luu tíŋ́ míílí̧,

⁴²vú̵ń gbɔ vu̵ vee gə̧ə̧lȩ́. Ya woo nán yȩ vú̵ń ká̧ŋ́, vú̵ń sə́ŋ́ nú' wu̵lı̵́ á̧ḿ.

⁴³Tée nán ku̵u̵ kɔ́ hȩn hí̧í̧lí̧ Tayɨɨ woo máa, vú̵ń dȩ' zó̧ó̧, vú̵ń tú kɔ́ ı̵́ zá̧ga̧ wɔgɔ ya gbaŋ waalı̵́ Ba' voo woolı̵́. Nán a dɨ kan tɔ́ggú̵ tée, a ki du̵u̵lı̵́ na'a.”

⁴⁴Yesu duu o̧: “Gbaŋ waalı̵́ Tayɨɨ woo man kan hȩn naa ku̵u̵ yu̵ggu̵ babbı̵́ má nɔ. Nán ka nuŋ tée, duu yu̵g la tíŋ́ kan zó̧ó̧ dȩ"ȩ́, la gí hȩn ka 'yɛ́ 'waapád ya hɨn bab yȩ wu̵lı̵́.

⁴⁵“Gbaŋ waalı̵́ Tayɨɨ woo duu man kan nán sɔ́g kɔ́lı̵́ tóó ka soo zaŋ vəg du̵u̵ má nɔ.

⁴⁶Ka nuŋ tóó sɔ́g woo ka néé na'a máa, la gí hȩn ka 'yɛ́ 'waapád la fȩȩn wu̵lı̵́.

⁴⁷“Gbaŋ waalı̵́ Tayɨɨ woo man kan kȩgȩ tóó ku̵u̵ tú̵ú̵ mammé má nɔ. Yéé ze' kə́dkə́d vu̵u̵ ma'ay wu̵lı̵́.

⁴⁸Sey kȩgȩ ka hi̧' sú̵'ú̵ tée, nán kȩgȩ tú̵ú̵lı̵́ vu̵ woo laan ya̧g nɛ'ɛmé, vu̵ yee ze' du̵u̵ vu̵ 'yɛ́ ɓaalı̵́, a̧máa vu̵ kéé ze' ɓı̵́d vu̵ gbóo.

⁴⁹Zá̧ga̧ hág 'wáanélȩ́ tée, wú̵ń dɨ kɔ́yné ı̵́ yo̧go̧ á̧ḿ. Maleeka vú̵ń yaa, vú̵ń səgən nán hȩn ɓı̵́d kɔ́lı̵́ vu̵ kan ı̵́ ku̵u̵ kɔ́ hȩn hí̧í̧lí̧ Tayɨɨ woo máa vu̵.

⁵⁰Vú̵ń gbóo nán ı̵́ ku̵u̵ kɔ́ hȩn ɓı̵́d máa vu̵ vee gə̧ə̧lȩ́. Ya woo nán yȩ vú̵ń ká̧ŋ́, vú̵ń sə́ŋ́ nú' wu̵lı̵́ á̧ḿ.”

⁵¹Yesu vi vu̵: “Ví ki moo yȩ vu̵ 'waapád sá'áa?” Vu̵ hí̧i̧du̵: “Ee.”

⁵²Duu o̧d vu̵: “Dɨ ı̵́ yo̧go̧ á̧ḿ, nán moo Tayɨɨ tú"í ku̵u̵ duu moo gbaŋ waalı̵́ Tayɨɨ woo máa, vu̵ man kan baa lig tóó ka vud hȩn 'maŋ woo kan hȩn see woo vu̵ ya hȩn naa woolı̵́ má nɔ.”

⁵³Sey Yesu ka 'waa ya̧g zílí yɛ vu̵ sú̵'ú̵ máa, lúú wu̵lı̵́.

⁵⁴Daa laa kaa ha̧a̧lȩ́ woolı̵́, tú' moo lig sú̵ggı̵́ nán Yúúda voolı̵́. Nán ku̵u̵ ki moo tú"í woo máa, kɔ́ vu̵ la ɓá', vu̵ o̧: “Nuŋ hȩn gaalı̵́ yȩ kan néélȩ́ hȩn sa̧ga̧ kɔ́lı̵́ yȩ vu̵ tɛ́lá?

⁵⁵Waa nán lig ga'ané yȩ woo nɔ pɛ́láa? Maaríi waaɨ náa? Daa sá̧ŋ́ vu̵u̵ Yaakúbu kan Yu̵u̵séfu kan Simɔ́ŋ kan Yúúda vu̵ yu̵ pɛ́láa?

⁵⁶Daa kȩ́ȩ́ vu̵u̵ sa̧a̧m baa vílí 'waapád yɛ nɔ náa? Nuŋ hȩn 'waapád yȩ vu̵ tɛ́lá?”

⁵⁷Hȩn woo ká há' vu̵ zó̧ó̧ 'yɛ́lı̵́ Yesu woolı̵́ á̧ḿ. A̧máa Yesu o̧d vu̵: “Vu̵ ɓéen anábi ya tóólı̵́ né, séý kaa ha̧a̧lȩ́ woolı̵́ kan kíi woolı̵́.”

⁵⁸Yesu duu kɔ́n sı̵́ hȩn sa̧ga̧ vu̵ wu̵lı̵́ ɓu̵u̵lı̵́ na'a né, moo moo faalı̵́ voo yȩ nɔ.