Read Dii Márkus 15 Bible Online

Márkus 15 - Dii bible

Márkus 15

¹Ya̧g ka̧'a̧m hí̧m máa, gbanaa hȩn ha"ı̵́ vu̵ kan ı̵́ nii Yúúda vu̵, kan nán moo Tayɨɨ tú"í vu̵, vu̵ sú̵g kan ı̵́ nii moo sə̧"ȩ́ vu̵ 'waapád, vu̵ yá̧ḿ Yesu. Vu̵ taga, vu̵ pa̧ŋ la dɔddu̵ Pilád woolı̵́ nagá.

²Ma Pilád vigi: “Mɔ́ gbanaa nán Yúúda voo naa?” Yesu hí̧i̧du̵ o̧: “Aga móo o̧!”

³Gbanaa hȩn ha"ı̵́ vu̵ doowu̵ ba kɔ́ hȩn ɓı̵́d ɓu̵u̵ ú̵.

⁴Ma Pilád duu vigi: “Ku̵u̵ dɨm doolı̵́ na'a yȩ nɔ, mɔ́ń hí̧i̧n ya̧g náa?”

⁵A̧máa Yesu duu hí̧i̧n sı̵́ moo né sá̧ḿ, moo woo nɔ Pilád mbaa ɗii.

⁶Mam vúnní páska 'waapád dúú vu̵ baa vi nán dágá lig púúsinalȩ́, tée guvɛrnə́ər vud pú̵ vu̵.

⁷Nán tóó ká du̵u̵lı̵́, yéé woo Barábas. Dɨ lig púúsinalȩ́ kan nán tóó kú̵u̵ lúú moo kaalı̵́, vu̵ nɔɔ nɔmme á̧ḿ.

⁸Dúú vu̵ dɔg guvɛrnə́ər Pilád woolı̵́, vu̵ dȩnnɔ nag, vu̵ vigi a kɔ́d bi kɔ́ ı̵́ ba ka baa kɔ́d bi daa see máa wɔgɔ.

⁹Ma Pilád vi vu̵: “Ví hí̧í̧ a̧n gbɔd bi gbanaa nán Yúúda voo yȩ naa?”

¹⁰Pilád ká gaa gbanaa hȩn ha"ı̵́ ba vu̵n dɔd Yesu biilí nagá kan sɨg moolȩ́ȩ.

¹¹A̧máa gbanaa hȩn ha"ı̵́ vu̵ o̧d dúú vu̵ ba u̵u̵ vi Pilád a gbɔd bi Barábaddu̵.

¹²Pilád duu vi vu̵: “Ví hí̧í̧ a̧n kɔ́ née kan ı̵́ kíí beewu̵ gbanaa nán Yúúda voo yȩlá?”

¹³Dúú ku̵u̵ ki máa, vu̵ moo moo yúba, vu̵ o̧: “A̧m ga"u̵ la' vbagadı̵́!”

¹⁴Ma Pilád duu vi vu̵: “Kɔ́ hȩn ɓı̵́d woo ȩná?” A̧máa dúú vu̵ duu tó̧' kɔɔg, vu̵ o̧: “A̧m ga"u̵ la' vbagadı̵́!”

¹⁵Pilád ka hí̧í̧ bi kɔ́d dúú vu̵ hȩn zó̧ó̧ dȩ"ȩ́ȩ máa, vud Barábas lig púúsinalȩ́ gbɔd vu̵, duu o̧d só̧ó̧ze u̵u̵ gbɔ́ Yesu kan looɨ. Ɓɛ Yesu pú̵ vu̵ u̵u̵ ga"u̵ la' vbagadı̵́.

¹⁶Só̧ó̧ze vu̵ pa̧ŋ Yesu laan ke'em guvɛrnə́ər woolı̵́, vu̵ sú̵g gbɔ kannɔ 'waapád.

¹⁷Vu̵ dɔ́ddu̵ sa̧a̧m gbo̧o̧ tóó yȩ́ȩ́ná, vu̵ zaŋ mɛɛtawəl sa̧'a̧d gbo'odu̵.

¹⁸Vu̵ vá"u̵: “Kəə zee, gbanaa nán Yúúda voo!”

¹⁹Vu̵ vəəwu̵ kan dȩ' yúlí, vu̵ tú̵'u̵du̵ su̵d fó̧lȩ́, vu̵ gu doo núug tíŋ́ woolı̵́.

²⁰Ku̵u̵ kɔ́ddu̵ ba̧a̧m 'waa sú̵'ú̵ máa, vu̵ sid sa̧a̧m gbo̧o̧ woo yȩ́ȩ́ná pee, vu̵ dɔ́ddu̵ sa̧a̧m ı̵́ woo vu̵, ma vu̵ pa̧ŋŋɔ laan moo ga"ı̵́ la' vbagadı̵́.

²¹Sey ku̵u̵ vúd la máa, nán Siirɛ́n tóó vȩ́' ya babbı̵́, yéé woo Simɔ́ŋ, Alegzá̧ŋndərə ba' voo, kan Rufúu wu̵. Só̧ó̧ze vu̵ yúgu moo a gaŋ la' vbagad Yesu woo nɔ.

²²Vu̵ pa̧ŋ Yesu laan ya tóó ku̵u̵ bee Golgáta máalȩ́. Yéé woo tú' “gu̵u̵ dag gbágadɨ.”

²³Vu̵ hí̧í̧ bi pú̵gu̵ doo ku̵u̵ ya̧a̧n kan gam tóó ku̵u̵ bee míir máa, a̧máa zɔn né.

²⁴Vu̵ ga"u̵ la' vbagadı̵́, vu̵ yȩ'ȩn sa̧a̧m woo voolı̵́ sa̧a̧mé, vu̵ gbɔ sáásáá moo kóó nɔ́nná a lá tée, a ɓɛ.

²⁵Sey ku̵u̵ ga' Yesu máa, zá̧ga̧ néé sú̵'ú̵.

²⁶Vu̵ tú' moo ȩn vu̵ nɔɔwo̧ lá máa, vu̵ bíńda hȩn yúú la' vbagad woolı̵́, o̧: “Ɨ́ yɛ gbanaa nán Yúúda voo nɔ.”

²⁷Vu̵ su̵g ga' vu̵ kan kɛm tóó vu̵ idú, dágá nag nánné, tóó nag kpáagı̵́. [

²⁸Vu̵ bíńda hȩn yȩ debterelı̵́ sú̵'ú̵; moo woo nɔ hȩn woo kɔ́y ı̵́ yo̧go̧; vu̵ bíńda: “Ká vu̵ beewu̵ nán hȩn ɓı̵́d kɔ́lı̵́ɨ.”]

²⁹Nán hi̧naa ya̧a̧lȩ́ vu̵ haa du̵g, vu̵ tɨgɨ yúú, vu̵ o̧: “Héy, móo dɨ lig hȩn ha"ı̵́ 'wɔlı̵́, mɔ́ń duu yo̧o̧ bá' ta̧a̧nɔ́ má nɔ née!

³⁰A̧m səd fó̧ó̧ móó, mɔ́ sí zu̵u̵ la' vbagadı̵́ sı̵́nná!”

³¹Gbanaa hȩn ha"ı̵́ vu̵ kan nán moo Tayɨɨ tú"í vu̵ á̧ḿ, vu̵ kɔ́ ba̧a̧m ya voolı̵́, vu̵ o̧: “Baa səd nán tóó vu̵, a̧máa səd fó̧ó̧ woo mban né.

³²A ı̵́ nán sənné, gbanaa nán Izraɛ́l voo nɔ, a sí zu̵u̵ la' vbagadı̵́ 'ya̧'a̧ yɛ tée, báń ho̧ ví, báń 'yɛ́ ví zó̧ó̧ baa ví yúú woolı̵́.” Nán vu̵n su̵g ga' vu̵ á̧ḿ pee vu̵ haa Yesu á̧ḿ.

³³Zá̧ga̧ ka ya̧ sa̧a̧m máa, vid sa̧' hág 'waapád, há̧á̧ zá̧ga̧ 'yɨg wu̵lı̵́.

³⁴Zamndi ta̧a̧nɔ́ ya̧g mɛnné máa, Yesu moo dɔg moo há̧á̧ yúba, o̧: “Eloí, Eloí, lemá sabagtaní?” (Moo woo tú' “Tayɨɨ míí, Tayɨɨ míí, moo ȩn mɔ́ gbɔnná?”)

³⁵Nán tóó ku̵u̵ mbaa wu̵lı̵́, ku̵u̵ ki máa, vu̵ o̧: “Ki sı̵́ɨ, dɨ Elía béélı̵́ɨ.”

³⁶Nán dágá kɛ ɗug la yoo sugud zu̵m doo vó̧o̧dı̵́, hȩ dȩ"ȩ́ pú̵gu̵ dɔg moo a a̧a̧ ó̧, o̧: “Gbɔ lá ví, ba ho̧ ví Elía a ya siddu̵ ú̵ tɛ́ nɔ.”

³⁷A̧máa Yesu duu wa̧a̧ wa̧ya̧g gbo̧o̧ ba'a, ma wə̧m sə̧'ə̧y.

³⁸Sey woolı̵́ máa, sa̧a̧m ku̵u̵ yȩȩ du̵n zu̵u̵ lig hȩn ha"ı̵́lı̵́ máa, dey zu̵u̵ sa̧a̧mé yúba pi há̧á̧ ya̧ zu̵u̵ hágá sag.

³⁹Ɨ́ nii só̧ó̧ze ka dii tíŋ́ Yesu woolı̵́, ka ho̧ nɔm woo yȩ máa, o̧: “Nán yȩ Waa Tayɨɨ woo nɔ gínú.”

⁴⁰Wakȩ́ȩ́ tóó ká vu̵ du̵u̵lı̵́, vu̵ dii ya ɗiilílí, vu̵ ho̧ hȩn yȩ vu̵. Sa̧a̧m voolı̵́ máa, Maaríi Magdaláa du̵u̵lı̵́ kan Salomɛ́ɛ kan Maaríi Yaakúbu ı̵́ náásá̧ŋ́ waa na' voo kan Yu̵u̵sɛ́d vu̵ á̧ḿ.

⁴¹Wakȩ́ȩ́ yȩ ká vu̵ duu ya Yesu hág Gáliléelı̵́ pi nu, vu̵ kɔ́ddu̵ ba'ad. Wakȩ́ȩ́ tóó vu̵ ɓu̵u̵lı̵́ na'a vu̵ du̵u̵lı̵́ á̧ḿ, ká vu̵ lúú ɗáá dɔg kannɔ Yerúsalemmé á̧ḿ.

⁴²Zá̧ga̧ woo máa, zá̧ga̧ hȩn mbɔ́ggı̵́ɨ. Vu̵ mbɔ́g hȩn moo asawə wu̵lı̵́. Ya̧g mɛnné máa,

⁴³nán tóó yaa, yéé woo Yu̵u̵séfu, ká nán kaa Arimatéeɨ, ká ı̵́ nii moo sə̧"ȩ́ȩ á̧ḿ; nán to̧o̧ȩ, mbaa laa gbaŋ waalı̵́ Tayɨɨ woo nɔ á̧ḿ. Yu̵u̵séfu zi̧i̧ zó̧ó̧ laa Pilád woolı̵́, ɓá"u̵ fó̧ó̧ Yesu woo.

⁴⁴Ma Pilád ka ki moo nɔm Yesu woo máa, hȩn woo kɔ́gɔ la ɓá', bee ı̵́ nii só̧ó̧ze pee ya, vigi Yesu ba nɔɔ ɗii sá'áa?

⁴⁵Ka ki ba nɔɔ sú̵'ú̵ máa, Pilád gbɔd Yu̵u̵séfu fó̧ó̧ Yesu woo.

⁴⁶Yu̵u̵séfu fȩȩ sa̧a̧m nɔm dɔnné du̵u̵ tóó, sid fó̧ó̧ Yesu woo la' vbagadı̵́, go̧o̧wo̧ kan sa̧a̧m pee kɔ́ ı̵́ ku̵u̵ baa kɔ́ máa wɔgɔ, dɔddu̵ bɛ́ɛ́g tóó ku̵u̵ kɛ isȩȩmé máalȩ́, vbii 'yɛgɛ gbo̧o̧ tóó tú̵' ya̧gníim bɛ́ɛ́gı̵́.

⁴⁷Maaríi Magdaláa vu̵ kan Maaríi Yu̵u̵sɛ́d na' woo vu̵ du̵u̵lı̵́, vu̵ ho̧ ya ku̵u̵ 'yɛ́gɛ máa.