Read Dii Márkus 2 Bible Online

Márkus 2 - Dii bible

Márkus 2

¹Bá' tóó pig woolı̵́ máa, Yesu duu fíí ya kaa Kapɛrnáhu̧mmé. Nán vu̵ ki Yesu ba dɨ ligí,

²vu̵ sú̵g ya dúú ɓu̵u̵lı̵́ na'a, vu̵ nugun ya mbaalı̵́ né, kóó na'amé á̧ḿ. Yesu baa tú'ud vu̵ moo.

³Ka dɨ moo tú"í máa, nán ndaddú̵ vu̵ gaŋ nán kpee tóó yaan woolı̵́.

⁴Vu̵ nugun ya dɔ́lı̵́ dáŋ́ Yesu woolı̵́ né, moo dúú ká vu̵ ɓu̵u̵ wu̵lı̵́ ú̵. Vu̵ dɔg kɛ yúú lig ka' ı̵́ Yesu ka mbaa wu̵lı̵́ máalȩ́, vu̵ sid nán kpee pee zu̵u̵ kan píg woo ya vu̵n kɛ peelı̵́.

⁵Yesu ka ho̧ zó̧ó̧ 'yɛ́lı̵́ voo máa, o̧d nán kpee pee: “Waa míí, hȩn ɓı̵́d móó vu̵ kéé gboy sú̵'ú̵.”

⁶Nán moo Tayɨɨ tú"í tóó vu̵ mbaa du̵u̵lı̵́, vu̵ taa moo voolı̵́ zó̧ó̧lȩ́:

⁷“Moo ȩn nán yȩ ka o̧ moo ı̵́ yo̧go̧lá? Haa Tayɨɨɨ! Nán tóó dɨ kan néélȩ́ kéé hȩn ɓı̵́d nán voo gbɔn né, séý Tayɨɨɨ.”

⁸Yesu gaa moo taalı̵́ voo zó̧ó̧ woolı̵́ vaŋná, ma vi vu̵: “Ví taa moo ȩn ı̵́ yo̧go̧ zó̧ó̧ víílílá?

⁹Kaa o̧d nán kpee: ‘Hȩn ɓı̵́d móó vu̵ kéé gboy sú̵'ú̵,’ tóó tée kaa o̧: ‘A̧m lúú yúba, mɔ́ gaŋ píg móó, mɔ́ 'yȩmma ó̧’ tée ȩn təə mbalá?

¹⁰A̧máa ı̵́ míí Tayɨɨ ka ba'an ya yɛ, mí hí̧í̧ i gaa ba mín dɨ kan néélȩ́ kéé hȩn ɓı̵́d nán voo vu̵ gbɔ hágá yɛlı̵́ ú̵.” Ma o̧d nán kpee pee:

¹¹“Míi o̧m a̧m lúú dɔg yúba, mɔ́ ɓɛ píg móó, mɔ́ laa móólȩ́ kíilí.”

¹²Nán ho̧o̧ pee ka ki máa, lúú dɔg ya̧g woolı̵́, ɓɛ píg woo, vúd la nɔ́ɔ́ nán voolı̵́ 'waapád. Hȩn yȩ kɔ́ nán 'waapád vu̵ la ɓá'. Vu̵ na' Tayɨɨ, vu̵ o̧: “Hȩn ı̵́ yo̧go̧ yȩ, ba ho̧n ví lá see né.”

¹³Yesu duu daa vúd laa ya̧g mam Gáliléelı̵́. Nán 'waapád vu̵ yaa woolı̵́, baa tú'ud vu̵ moo.

¹⁴Ka dɨ daa ya̧a̧lȩ́ máa, ho̧ Levíd, Álfa waa, dɨ mbaalı̵́ bilów lámba su̵ggı̵́ woolı̵́. Yesu o̧ddu̵: “A̧m duun ya ú̵.” Levíd lúú dɔg, dugu.

¹⁵Pig woolı̵́, Yesu ka dɨ mbaalı̵́ ya hȩn lálı̵́lı̵́ Levíd woolı̵́ kíilí máa, waa duulí woo vu̵ ɓu̵u̵lı̵́ na'a, kan nán lámba su̵ggı̵́ vu̵, kan nán hȩn ɓı̵́d kɔ́lı̵́ vu̵ ɓu̵u̵lı̵́ na'a, vu̵ sú̵g lá hȩn kannɔ á̧ḿ.

¹⁶Nán moo Tayɨɨ tú"í tóó vu̵ du̵u̵lı̵́ á̧ḿ, vu̵ nán farísa vu̵ yu̵. Vu̵ ho̧ Yesu lá hȩn kan nán hȩn ɓı̵́d kɔ́lı̵́ vu̵ kan nán lámba su̵ggı̵́ vu̵, vu̵ vi waa duulí Yesu woo vu̵: “Moo ȩn Yesu sú̵g lá hȩn kan nán lámba su̵ggı̵́ vu̵ kan nán hȩn ɓı̵́d kɔ́lı̵́ vu̵ dágálá?”

¹⁷Yesu ka ki máa, hí̧i̧d vu̵: “Nán ku̵u̵ mbaa nánná máa, vu̵u̵ soon gbaŋ gam né. A̧máa nán ho̧o̧ vu̵u̵ baa soo. Mí yaan nán ku̵u̵ taa ba bin kɔ́ hȩn hí̧í̧lí̧ Tayɨɨ woo nɔ máa vu̵ yu̵ beelı̵́ né, a̧máa mí ya bee nán ı̵́ ku̵u̵ gaa ba bin kɔ́ hȩn ɓı̵́ddɨ máa vu̵ yu̵.”

¹⁸Sey tóólı̵́ máa, waa duulí Yoohá̧na ı̵́ mam Tayɨɨ wooné woo vu̵, kan nán farísa vu̵, vu̵ dɨ hȩn lálı̵́ kȩȩlȩ́. Nán tóó vu̵ yaa Yesu woolı̵́, vu̵ vigi: “Moo ȩn waa duulí Yoohá̧na woo vu̵, kan waa duulí nán farísa voo vu̵, vu̵ dɨ voo hȩn lálı̵́ kȩȩlȩ́, a̧máa waa duulí ı̵́ móó, vu̵ kȩȩn voo nélá?”

¹⁹Yesu hí̧i̧d vu̵ o̧: “Nán ku̵u̵ bee vu̵ hȩn lálı̵́ lig pú̵lı̵́lı̵́, ma ı̵́ kȩ́ȩ́ aga ka dɨ lá kan vu̵ tée, víń hí̧í̧ u̵u̵ kȩȩ hȩn lálı̵́ á̧ḿma? Ka dɨ lá mbaalı̵́ kan vu̵ tée, vu̵ kȩȩ né sá̧ḿ.

²⁰A̧máa zá̧ga̧ tóó wú̵ń yaa dɨlı̵́, vú̵ń luu ı̵́ kȩ́ȩ́ aga voolı̵́ sa̧a̧mé, tée vú̵ń kȩȩ hȩn lálı̵́ sey yȩlȩ́.

²¹“Nán tóó dɛ sa̧a̧m də̧'ə̧ 'maŋ la ní'in sa̧a̧m dɔ́lı̵́ seelı̵́ né, moo sa̧a̧m də̧'ə̧ 'maŋ kan dɛ sa̧a̧m dɔ́lı̵́ see tée, deyné woo kan duu mba hȩnne.

²²Vu̵ to̧o̧n doo gbág seelı̵́ né. Nán a kɔ́ ı̵́ yo̧go̧ tée, doo wú̵ń 'wɔ gbág lı̵́d, tée doo wú̵ń yɛ́d á̧ḿ. A̧máa ba to̧o̧ doo gbág 'maŋŋı̵́.”

²³Zá̧ga̧ asawə tóólı̵́ máa, Yesu ya̧a̧ bab tóólı̵́. Waa duulí woo vu̵ ya̧a̧ daa á̧ḿ, vu̵ bé' tú̵d hȩȩné.

²⁴Nán farísa ku̵u̵ ho̧ máa, vu̵ vi Yesu: “I ho̧ sú̵m, moo ȩn vu̵ kɔ́ hȩn moo palı̵́ baa ví ku̵u̵ há' kɔ́lı̵́ zá̧ga̧ asawəlı̵́ máalá̧?”

²⁵Yesu ka ki máa, hí̧i̧d vu̵: “Ví záŋ́ga hȩn Daavíd ka kɔ́n máa né kəddaa? Sey ká kan hȩn tóó pɛ́lı̵́, go̧o̧m ka ya̧ vu̵ kan nán ku̵u̵ mbaa kannɔ á̧ḿ máa,

²⁶dɔ́ lig Tayɨɨlı̵́, sey ı̵́ nii hȩn ha"ı̵́ Abiatáa woolı̵́, ɓɛ beréd ku̵u̵ ha'ad Tayɨɨ máa, lá. Pú̵ nán ku̵u̵ mbaa kannɔ á̧ḿ máa vu̵. Beréd woo, nán té' vu̵u̵ lán né, séý nán hȩn ha"ı̵́ vu̵ yu̵ dágá.”

²⁷Yesu duu o̧d vu̵: “Ká vu̵ mbɔ́g asawə moo nánán voo nɔ, a̧máa vu̵ mbɔ́gɔn nánán moo asawəɨ né.

²⁸Moo woo nɔ, ı̵́ míí Tayɨɨ ka ba'an ya yɛ, míi gbaŋ asawə á̧ḿ.”