Read Dii Márkus 3 Bible Online

Márkus 3 - Dii bible

Márkus 3

¹Yesu duu dɔ́ lig sú̵ggı̵́ nán Yúúda voolı̵́. Nán tóó ká du̵u̵lı̵́, nag woo nɔɔwo̧ ó̧.

²Nán tóó vu̵ pí̧í̧ Yesu, tóó tée ba a za̧a̧ nán yȩ zá̧ga̧ asawəlı̵́ ú̵ tée, bi doowu̵ ú̵.

³Ma Yesu o̧d nán nag nɔm pee: “A̧m lúú dii dɔg yúba sa̧a̧m nán yȩ voolı̵́.”

⁴Ma Yesu vi nán vu̵, o̧: “Debtere Múúsa woo o̧ nɛ́nná? Zá̧ga̧ asawə máa, zá̧ga̧ hȩn du̵u̵ kɔ́láa? Tóó tée zá̧ga̧ hȩn ɓı̵́d wu̵ kɔ́láa? Tóó tée, moo nán sənnáa? Tóó tée moo nán nɔɔnáa?” A̧máa vu̵ mbaa simná.

⁵Yesu tə́gə vu̵ kə̧́ə̧́ daa kan zó̧ó̧ yȩ́ȩ́. Zó̧ó̧ ví̧i̧wo̧ moo tɔ́g ŋgó̧ó̧lȩ́ voo yɛ nɔ, o̧d nán pee: “A̧m yo̧o̧ nag móó la ú̵.” Nán pee yo̧o̧ nag, nag woo daa néé dɔg.

⁶Nán farísa ku̵u̵ ho̧ ná' máa, vu̵ vúd há̧ná, vu̵ sú̵g kan nán Heeród woo vu̵, vu̵ yá̧ḿ Yesu moo bi nɔɔwo̧ ó̧.

⁷Yesu daa laa kan waa duulí woo vu̵ ya̧g mammé. Nán Gálilée vu̵ ɓu̵u̵lı̵́ na'a vu̵ dugu, kan nán tóó vu̵ hág Yúúdalı̵́,

⁸kan nán tóó kaa Yerúsalemmé vu̵, kan nán hág Idumɛ́ɛlȩ́ vu̵, kan nán Yu̵ŕdɛn dən vu̵, kan nán kaa Tír vu̵, kan Sidɔ́ŋŋı̵́ á̧ḿ. Nán ɓu̵u̵lı̵́ na'a vu̵ ki hȩn Yesu ka baa kɔ́ yȩ, vu̵ yaa woolı̵́.

⁹Dúú ku̵u̵ sú̵g na'a máa, Yesu o̧d waa duulí woo vu̵, u̵u̵ mbɔ́gɔd bi nɛ́ŋ́ waaɨ, moo dúú u̵u̵ ɓəə bi sá.

¹⁰Ka baa za̧a̧ nán vu̵ ɓu̵u̵lı̵́ na'a máa, nán ku̵u̵ dɨ kan ho̧o̧ 'waapád vu̵ kə̧ə̧du̵ la fó̧lȩ́, moo bi za"u̵ ú̵.

¹¹Nán yigid ɓı̵́d ka kɔ́ vu̵, ku̵u̵ ho̧ Yesu máa, vu̵ baa kə̧ə̧du̵ la tíŋ́, vu̵ lɛ́g, vu̵ o̧: “Mɔ́ Waa Tayɨɨ woo nɔ.”

¹²A̧máa Yesu tiŋ vu̵ za̧a̧ná, o̧d vu̵ u̵u̵ moo moo yúú biilí sá.

¹³Pig woolı̵́ máa, Yesu ɗáá dɔg gu̵u̵ tóólı̵́, bee ı̵́ ka hí̧í̧ vu̵ máa yaan woolı̵́,

¹⁴yee fó̧ó̧ wa̧nɓó' zu̵u̵ idú, 'yɛ́ vu̵ waa ba'ad, moo u̵u̵ mbaa kan bi, bi ba' vu̵ u̵u̵ pa moo Tayɨɨ,

¹⁵pú̵ vu̵ néélȩ́ yigid ɓı̵́d vu̵ nɛ́né á̧ḿ.

¹⁶Yéé ı̵́ wa̧nɓó' zu̵u̵ idú sú̵u̵ voo, wu̵ yɛ nɔ. Yesu yee Simɔ́ŋ, 'yɛ́ddu̵ yéé tóó, Piɛ́r.

¹⁷Yee Zebedée waa Yaakúbu vu̵ kan daa sá̧ŋ́ Yoohá̧na, 'yɛ́d vu̵ yéé Bowanɛ́rge, yéé woo tú' “Bó̧ó̧ waa vu̵ yu̵.”

¹⁸Yee A̧ndɛrée, kan Filíb, kan Baatelemíi, kan Matío kan Tomás, kan Yaakúbu Álfa waa, kan Taadée, kan Simɔ́ŋ nán zó̧ó̧ pilí,

¹⁹kan Yúúdas Iskarió, ı̵́ ka dɔd Yesu nag nánán voolı̵́ pee.

²⁰Yesu duu vȩ́' ya kíilí. Dúú vu̵ duu faa sú̵g, sú̵ggı̵́ woo há' vu̵ hȩn lálı̵́ á̧ḿ.

²¹Yesu mɛm woo ku̵u̵ ki máa, vu̵ yaa bi ma"o̧ luu ú, moo vu̵ o̧ ba ya̧ŋŋɨ.

²²Nán moo Tayɨɨ tú"í ku̵u̵ sí zu̵u̵ Yerúsalemmé máa, tóó vu̵ o̧: “Gbanii yigid ɓı̵́d voo Belzabúl wu̵ kɔ́ Yesu;” tóó vu̵ o̧: “Yesu nɛŋ yigid ɓı̵́d vu̵ kan yɛ́g gbanii yigid ɓı̵́d voo nɔ.”

²³Yesu ka ki máa, bee vu̵, o̧d vu̵ moo kan gɛŋ: “Seeɗán dəŋ née nɛŋ fó̧ó̧ dáń woolá?

²⁴Nán hág tóó ku̵u̵ hɨ'ɨn ya̧g tée, hág woo wú̵ń tii gbá̧á̧ȩ.

²⁵Nán kíi tóó u̵u̵ fá̧ŋ́ moo tée, kíi woo wú̵ń dii ní á̧ḿ.

²⁶Yee Seeɗán a wu̵ hı̵́'ı̵́n ya idú tée, wú̵ń duu mbaan sı̵́ né, wú̵ń 'wáa ú̵.

²⁷“A̧máa nán tóó ba dɔ́ kíi nán néélȩ́ tóó woolı̵́, ba vbiddu̵ hȩn naa woo máa pɛ́lı̵́. Wú̵ń dəŋ ma"o̧ ta pȩ́ń, wú̵ń vbid hȩn naa woo 'waapád kíi woolı̵́.

²⁸“Mí o̧d ví moo yȩ́ńne, kóó hȩn ɓı̵́d woo ȩná, kan ya̧g vȩ́'ȩd 'waapád, Tayɨɨ wú̵ń kéé moo woo gbɔ ú̵.

²⁹A̧máa nán a haa yigid Tayɨɨ woo tée, Tayɨɨ wú̵ń gbɔn moo woo né sá̧ḿ, moo hȩn ɓı̵́d ı̵́ a mbaa káákáá máa, wu̵ yȩ nɔ.”

³⁰Yesu o̧ moo yȩ, moo vu̵ baa o̧: “Yigid ɓı̵́d kɔ́ Yesu sú̵'ú̵.”

³¹Yesu na' woo kan daa sá̧ŋ́ vu̵, vu̵ ya dii gɔ́ŋ́, vu̵ ba' la beewu̵.

³²Dúú vu̵ mbaa daa kannɔ; vu̵ o̧ddu̵: “Na' móó vu̵ kan dam sá̧ŋ́ vu̵ dɨm laalı̵́ gɔ́ŋ́.”

³³Yesu hí̧i̧d vu̵, o̧: “Nóo na' míí kan dan sá̧ŋ́ vu̵lá?”

³⁴Duu tə́gə nán vu̵n mbaa daa kannɔ pee vu̵ kə̧́ə̧́ daa, ma o̧: “Na' míí kan dan sá̧ŋ́ ku̵u̵ yɔ,

³⁵moo kóó nɔ́nná a kɔ́ hȩn hí̧í̧lí̧ Tayɨɨ woo tée, wu̵ dan sá̧ŋ́ kan dan kȩ́ȩ́, wu̵ na' míí á̧ḿ.”