Read Dii Márkus 4 Bible Online

Márkus 4 - Dii bible

Márkus 4

¹Yesu duu bé' moo tú"í ya̧g mam Gáliléelı̵́. Dúú vu̵ sú̵g ya ɓu̵u̵lı̵́ na'a. Moo woo nɔ Yesu ɗáá mbaa nɛ́ŋ́ tóólı̵́ mammé. Dúú vu̵ mbaa voo ya 'wɔ́ggı̵́ 'waapád, dáŋ́ mammé.

²Yesu tú'ud vu̵ moo ɓu̵u̵lı̵́ na'a kan ya̧g zílí. Ka dɨ hȩn tú"í máa, o̧d vu̵:

³“I ki ú. Nán hu̵u̵d hu̵u̵lı̵́ tóó vúd laa hu̵u̵d woo hu̵u̵lı̵́.

⁴Sey ka dɨ hu̵u̵lı̵́ máa, hu̵u̵d tóó vu̵ pee hi̧naalȩ́. Nɔ́g waa vu̵ ya ɓee lá.

⁵Ka' tóó vu̵ pee ya kpi'idí, ya hád ka ɓu̵u̵ né máalȩ́. Vu̵ tá̧' vaŋná, moo hád ɓu̵u̵n yagalı̵́ né.

⁶A̧máa zá̧ga̧ ka ye' máa, vu̵ mbɛ́, vu̵ 'wɔ́, moo vu̵ ho̧n ya zágád ndaggı̵́ né.

⁷Ka' tóó vu̵ pee sa̧a̧m sa̧'a̧d voolı̵́. Sa̧'a̧d vu̵ na', vu̵ pɛ vu̵, vu̵ kɔ́n yȩ́ń né.

⁸Hu̵u̵d tóó vu̵ pee hág du̵u̵lı̵́, vu̵ na', vu̵ lɛ, vu̵ kɔ́ yȩ́ń, tóó vo' ta̧a̧nɔ́, tóó vo' gúú, tóó tȩmɛre.”

⁹Yesu duu o̧d vu̵: “Nán a dɨ kan tɔ́g moo kilí ú tée, a ki du̵u̵lı̵́ na'a.”

¹⁰Sey Yesu ka hı̵́'ı̵́n kan dúú vu̵ máa, nán ı̵́ ku̵u̵ gbɔ kannɔ, kan waa duulí woo vu̵ á̧ḿ máa, vu̵ vigi moo yúú ya̧g zílí yȩ vu̵lı̵́.

¹¹Yesu hí̧i̧d vu̵: “Ɨ́ víí máa, Tayɨɨ tú'ud ví hȩn yú̵ggı̵́ gbaŋ waalı̵́ woolı̵́ sú̵'ú̵. A̧máa nán tóó voo máa, vu̵ ki voo kan ya̧g zílíi,

¹²moo u̵u̵ baa tə́gə, u̵u̵ ho̧ gaa sá, u̵u̵ baa ki moo yȩ, a̧máa a dɔ́ vu̵ tɔ́g sá, moo ka vu̵n tii zó̧ó̧ tée, kan kéé hȩn ɓı̵́d voo gbɔ ú̵.”

¹³Yesu duu o̧d waa duulí woo vu̵: “I kin ya̧g zílí ı̵́ yɛ né tée, víń dəŋ née ki ya̧g zílí tóó vu̵lá?

¹⁴Nán hu̵u̵d hu̵u̵lı̵́ máa, wu̵ nán ı̵́ ka pa moo Tayɨɨ má nɔ.

¹⁵Nán tóó vu̵ mbaa kɔ́ ı̵́ hȩn á̧á̧ ı̵́ ku̵u̵ pee ya̧g hi̧naalȩ́ máa vu̵ wɔgɔ. Ku̵u̵ ki moo Tayɨɨ tée, Seeɗán yaa vaŋná, vud moo ku̵u̵ ki pee.

¹⁶Nán tóó vu̵ mbaa voo kɔ́ ı̵́ hȩn á̧á̧ ı̵́ ku̵u̵ pee ya kpi'idí máa vu̵ wɔgɔ. Ku̵u̵ ki moo Tayɨɨ tée, vu̵ fȩȩ vaŋná kan zó̧ó̧ dȩ"ȩ́.

¹⁷Vu̵ fȩȩ moo waaná', a̧máa vu̵ kan ya doo ndalı̵́ pɛ́lı̵́. Sey ku̵u̵ si̧'i̧d nán vu̵, ku̵u̵ duun vu̵ kan hȩn ɓı̵́d yúú moo Tayɨɨlı̵́ tée, ı̵́ voo vu̵ kéé moo Tayɨɨ gbɔ há̧ná.

¹⁸Ɨ́ tóó ku̵u̵ pee sa̧a̧m sa̧'a̧dı̵́ máa, vu̵ nán ı̵́ ku̵u̵ ki moo Tayɨɨ woo,

¹⁹a̧máa zó̧ó̧ tu̵u̵lı̵́ yúú hȩn góó vu̵lı̵́, kan hȩn zo"ı̵́ yúú hȩn naa vu̵lı̵́, kan zó̧ó̧ sú̵lı̵́ vu̵ yaa, vu̵ lı̵́d moo Tayɨɨ zó̧ó̧ voolı̵́, moo Tayɨɨ kɔ́n yȩ́ń woo voolı̵́ né.

²⁰Ɨ́ tóó ku̵u̵ pee hág du̵u̵lı̵́ máa, vu̵ nán ı̵́ ku̵u̵ ki moo Tayɨɨ, ku̵u̵ 'yɛ́ zó̧ó̧ wu̵lı̵́ máa, vu̵u̵ lii yȩ́ń, tóó vo' ta̧a̧nɔ́, tóó vo' gúú, tóó tȩmɛre.”

²¹Yesu duu o̧d vu̵: “Vu̵ baa ma' lám moo sú"í kan dəgga? Tóó tée búg leesoláa? Vu̵ baa ha'anɔ yúú táabələlı̵́ náa?

²²Moo hȩn ku̵u̵ wáá vu̵ yu̵g máa, vú̵ń kúú 'waapád. Hȩn tóó ba yú̵g, ba vún né máa pɛ́lı̵́.

²³Nán a dɨ kan tɔ́g moo kilí ú tée, a ki du̵u̵lı̵́ na'a.”

²⁴Yesu duu faa o̧d vu̵: “Kíí ki moo Tayɨɨ tée, i gággú̵. Tayɨɨ wú̵ń kɔ́d ví hȩn kɔ́ ı̵́ kíí kɔ́d dey vu̵ wɔgɔ, wú̵ń duu ha'ad ví tóó wu̵lı̵́ á̧ḿ,

²⁵moo nán ka dɨ kan hȩn tée, Tayɨɨ wú̵ń duu pú̵gu̵ tóó. A̧máa nán ı̵́ ka 'yɛ́n hȩn né tée, hȩn ı̵́ ka dɨ kannɔ máa, Tayɨɨ wú̵ń ɓɛ luu.”

²⁶Yesu duu faa o̧: “Gbaŋ waalı̵́ Tayɨɨ woo man kan nán tóó ka hu̵u̵ hu̵u̵d bab woolı̵́ má nɔ.

²⁷Pig woolı̵́ máa, kóó a nə, kan nən né á̧ḿ, vid kan zá̧ga̧ á̧ḿ, aga hu̵u̵d tá̧', na', ı̵́ bab aga gaan woo né sá̧ḿ.

²⁸Tú̵d aga dəŋ tá̧', na', tée duu lɛ, yȩ́ń aga mbɔ́gɔy kan fó̧ó̧ woo du̵u̵ na'a.

²⁹Ka yó̧ tée, ı̵́ bab aga sə̧', moo sey tú̵d sə̧"ȩ́ woo ya̧ sú̵'ú̵.”

³⁰Yesu duu faa o̧: “Ba gú̵gu̵n gbaŋ waalı̵́ Tayɨɨ woo kan ȩná? Ba tú'únɔ kan ya̧g zílí woo ȩná?

³¹Man kan yȩ́ń sambɨɨm hó̧g tóó ka mbaa hágá má nɔ, wu̵ mba hȩn á̧á̧ tóó vu̵ kan yȩ́ń 'mɛ́ŋ́ 'waapád.

³²A̧máa ka tá̧', ka na' sú̵'ú̵ tée, na' mba wi' kpag vu̵ 'waapád, hȩȩ waa, nɔ́g waa vu̵ sé' waa wu̵lı̵́, vu̵ mbaa yigid wu̵lı̵́ á̧ḿ.”

³³Yesu baa o̧d vu̵ moo woo vu̵ kan ya̧g zílí ɓu̵u̵lı̵́ na'a, kan hi̧naa, hi̧naa, moo u̵u̵ ki gaa ú̵.

³⁴Baa o̧d vu̵ də́ń moo kan ya̧g zílíi. A̧máa ku̵u̵ mbaa kan waa duulí woo vu̵ mɛ́ń tée, duu vud moo woo o̧d vu̵ 'waapád.

³⁵Zá̧ga̧ dágá yȩlȩ́, mɛnné máa, Yesu o̧d waa duulí woo vu̵: “Ba ɗáá ví la mam dən.”

³⁶Sey ku̵u̵ gbɔ zu̵u̵ dúú vu̵ máa, vu̵ pa̧ŋ Yesu kan nɛ́ŋ́ ba mbaa wu̵lı̵́ peelı̵́. Nɛ́ŋ́ tóó ká vu̵ dɨ bə́' dáŋ́ woolı̵́ á̧ḿ.

³⁷Ku̵u̵ lúú sú̵'ú̵ máa, sápéém gbo̧o̧ tóó yaa mammé, mam gágán yɛ́d hi̧' nɛ́ŋ́ŋı̵́.

³⁸Yesu dɨ woo nəm pigim nɛ́ŋ́ŋı̵́, ɓəg yúú hȩn yúú ɓəggı̵́lı̵́. Vu̵ nimmɔ, vu̵ vigi: “Akaw, mɔ́ taan vɔ́ náa? Ba ti ví sú̵'ú̵ náa?”

³⁹Yesu níḿ dɔg sée sápéém, o̧d mam: “Mbaa simná, nam sá.” Sápéém gə́d mbaa simmm.

⁴⁰Pig woolı̵́ máa, Yesu vi vu̵: “Moo ȩn ví kɔ́ dú̵ú̵lá? Ví 'yɛ́n zó̧ó̧ míílí̧ ní moo ȩná?”

⁴¹Ku̵u̵ ho̧ hȩn yȩ máa, dú̵ú̵ kɔ́ vu̵ gbo̧o̧ ba'a, vu̵ ó̧ń ya voolı̵́: “Nán woo nóo yȩlá! Sápéém kan mam ku̵u̵ kiddu̵ tɔ́g á̧ḿ yɛlá!”