Read Dii Márkus 7 Bible Online

Márkus 7 - Dii bible

Márkus 7

¹Nán farísa tóó vu̵ kan nán moo Tayɨɨ tú"í tóó vu̵ lúú ya Yerúsalemmé, vu̵ sú̵g gbɔ kan Yesu.

²Ku̵u̵ ho̧ waa duulí woo tóó ku̵u̵ nɛ'ɛn nag né, ku̵u̵ lá hȩn máa,

³vu̵ vi Yesu: “Moo ȩn waa duulí móó vu̵ duun hȩn dikab a ba ví yée voo vu̵ nélá? Moo ȩn vu̵ lá hȩn nag ví̧i̧gnálá̧?” Nán farísa kan nán Yúúda vu̵ 'waapád vu̵ baa nɛ' nag pȩ́ń, vu̵ lá hȩn, vu̵ duu hȩn dikab aa yée voo vu̵ ı̵́ yo̧go̧. Ku̵u̵ fíí ya lummí tée, vu̵ lán hȩn né, vu̵ nɛ' nag pȩ́ń. Vu̵ duu hȩn dikab tóó vu̵ ɓu̵u̵lı̵́ na'a, kɔ́ ı̵́ aa yée ku̵u̵ tú'ud vu̵ máa wɔgɔ, moo ɗag ha̧nné vu̵, kan gbág vu̵ kan gbág hɨɨ vu̵ kan leeso vu̵ á̧ḿ.

⁶Yesu ka ki moo vilí voo yȩ máa, hí̧i̧d vu̵, o̧: “Anábi Esáya ká moo moo yȩ́ń yúú víílí sú̵'ú̵, nán zó̧ó̧ ví̧i̧g yȩ víw. Tayɨɨ ká o̧d Esáya pȩ́ń, Esáya bíńda ı̵́ yo̧go̧: ‘Zig máa yɛ vu̵ na'ana ya̧gá̧ té'. A̧máa zó̧ó̧ voo ɗii kan mí ú̧.

⁷Vu̵ kɔ́ ba'ad kan yɛ́g míí leená té', vu̵ tú' moo palı̵́ nánán voo vu̵ kɔ́ ı̵́ moo Tayɨɨ wɔgɔ.’ ”

⁸Yesu duu o̧d vu̵: “Ví gbɔ dooká Tayɨɨ woo, ví duu də́ń hȩn dikab nánán voo nɔ.”

⁹Duu o̧d vu̵: “Ví ɓéé dooká Tayɨɨ woo moo bi duu hȩn dikab bii nu.

¹⁰Múúsa ká o̧ ná': ‘A̧m na' ba' móó kan na' móó ó̧.’ Duu o̧: ‘Nán a haa ba' woo kan na' woo tée, maa nɔmme.’

¹¹A̧máa ví o̧ víí: ‘Nán tóó 'yɛ́ hȩn, maa ba a pú̵ ba' woo kan na' woo nɔ. A̧máa tow a o̧ ba kɔrbánne (“hȩn ha"ı̵́ɨ”) tée,’

¹²ví há"u̵ a duu pú̵ ba' woo kan na' woo sá sá̧ḿ.

¹³Ví á̧d moo Tayɨɨ woo gbɔ, kan hȩn dikab víí kíí tú'ud vu̵ yȩ. Ví kɔ́ hȩn tóó vu̵ kə́dkə́d ı̵́ yo̧go̧ á̧ḿ.”

¹⁴Yesu duu bee dúú vu̵, o̧d vu̵: “Ya víí 'waapád, i ki ú, i ki du̵u̵lı̵́ na'a!

¹⁵Hȩn ka yaa gɔ́ŋ́, ka dɔ́ ya̧g nán woolı̵́ zu̵u̵ silí máa, wu̵ vi̧i̧n nánán vu̵ né. A̧máa hȩn ka vúd zó̧ó̧ nán woolı̵́ máa, wu̵ vi̧i̧ vu̵. [

¹⁶Nán a dɨ kan tɔ́g moo kilí ú tée, a ki du̵u̵lı̵́ na'a.]”

¹⁷Yesu ka gbɔ dúú vu̵, ka daa laa ligí máa, waa duulí woo vu̵ vigi moo yúú gɛŋ yȩlȩ́.

¹⁸Yesu hí̧i̧d vu̵: “Ví á̧ḿ, ví gaa ná hȩn náa? Ví kin hȩn ka yaa gɔ́ŋ́, ka dɔ́ ya̧g nánán woolı̵́ zu̵u̵ silí máa, ba wu̵ vi̧i̧nɔ né máa náa?

¹⁹Moo hȩn yȩ vu̵ dɔ́n zó̧ó̧lȩ́ né, a̧máa vu̵ dɔ́ silí. Pig woo tée, vu̵ vúd ya ku̵u̵ baa vúd máalȩ́.” (Moo yɛ tú' hȩn 'waapád ba maa lálı̵́ ú̵.)

²⁰Ma Yesu duu o̧: “A̧máa hȩn ka vúd zó̧ó̧ nán woolı̵́ máa, wu̵ vi̧i̧wo̧.

²¹Moo ɓı̵́d taalı̵́ vu̵ dəŋ zó̧ó̧lȩ́, ma vu̵ tá kan wakȩ́ȩ́ vu̵, vu̵ kɔ́ líw, vu̵ nɔɔ nɔm,

²²vu̵ kɔ́ ɓáa, vu̵ sú̵ zó̧ó̧, vu̵ kɔ́ hȩn zó̧ó̧ salı̵́, vu̵ kɔ́ hȩn kə̧ə̧g, vu̵ ma dooká vu̵, vu̵ ho̧ nɔ́ɔ́ ɓı̵́d, vu̵ haa du̵g, vu̵ na' yúú, vu̵ kɔ́ hȩn ya̧ŋ vu̵.

²³Hȩn ı̵́ yȩ vu̵ dəŋ dɨ zó̧ó̧ nánán woolı̵́, ma vu̵ vúd gɔ́ŋ́. Hȩn ku̵u̵ vi̧i̧ nánán vu̵ máa vu̵u̵ yȩ nɔ.”

²⁴Yesu ka lúú wu̵lı̵́ máa, laa hág Tírlı̵́. Dɔ́ kíi tóólı̵́, hí̧í̧ nán u̵u̵ gaa sá, a̧máa vu̵ há̧á̧ gaa.

²⁵Wakȩ́ȩ́ tóó ká du̵u̵lı̵́, hȩn hó̧g kɔ́ wakȩ́ȩ́ waa woo. Wakȩ́ȩ́ yȩ ká wakȩ́ȩ́ Gɛrɛ́ggɨ, hág Sirofeníilí. Ka ki moo Yesu woo máa, ya kə̧ə̧du̵ la tíŋ́, dȩnnɔ nag ba a la nɛŋ hȩn hó̧g waa bii woolı̵́.

²⁷A̧máa Yesu hí̧i̧du̵: “A̧m gbɔ náásá̧ŋ́ waa u̵u̵ ha̧' pȩ́ń. Kaa ɓɛ beréd náásá̧ŋ́ voo pú̵ ya̧'a̧d waa vu̵ tée, du̵u̵ né.”

²⁸Wakȩ́ȩ́ pee hí̧i̧du̵: “Ba' mía̧a̧, a̧máa ya̧'a̧d waa vu̵ lá beréd púpúd ku̵u̵ pee hágá náásá̧ŋ́ waa voolı̵́ nagá máa ó̧.”

²⁹Ma Yesu duu hí̧i̧du̵: “Yúú ya̧g hí̧í̧lí̧ móó yȩlȩ́, a̧m laa la ú̵. Hȩn hó̧g lúú waa móó woolı̵́ sú̵'ú̵.”

³⁰Sey ka vȩ́' la woolı̵́ kíilí máa, nuŋ waa yó̧ó̧ ud mbaa píggí. Hȩn hó̧g lúú sú̵'ú̵.

³¹Yesu daa lúú hág Tírlı̵́, duu vȩ́' ya̧a̧ duu Sidɔ́ŋŋı̵́ kan Dekapól, ma ya̧ mam Gáliléelı̵́.

³²Nán vu̵ pa̧nnɔ ya nán kpo̧o̧g tóó, ká moon moo dȩ"ȩ́ na'a né. Vu̵ dȩnnɔ nag moo a ha'adu̵ nag yúlí.

³³Yesu ɓɛgɛ laan ya nán ku̵u̵ wu̵lı̵́ pɛ́lı̵́ máalȩ́, dɔ́ddu̵ nag vbaŋ waa tɔ́ggı̵́, tu̵'u̵ su̵d za'anɔ mɛ́ɛ́lȩ́,

³⁴luu dɔg nɔ́ɔ́ be"ı̵́, hí̧d, o̧: “Efáta.” (Moo woo tú' “A̧m tú̵'ú̵ la ú̵.”)

³⁵Tɔ́g woo vu̵ há̧á̧ tú̵'ú̵, mɛ́ɛ́ woo yu̵u̵, bé' moo moolȩ́ to̧o̧ na'a.

³⁶Ma Yesu tiŋ vu̵ u̵u̵ o̧d nán tóó sá. Tiŋ vu̵, faa tiŋ vu̵, a̧máa vu̵ baa pa laan voo tíŋ́ tíŋ́.

³⁷Hȩn Yesu ka kɔ́ yȩ la' vu̵ la fid, vu̵ o̧: “Kɔ́ hȩn vu̵ 'waapád, maa du̵u̵ mɛ́ń. Kɔ́ nán tɔ́g pɛ́lı̵́ vu̵ ki moo, nán kpo̧o̧g vu̵ moo moo á̧ḿ.”