Read Dii Lúg 10 Bible Online

Lúg 10 - Dii bible

Lúg 10

¹Pig woolı̵́ máa, ı̵́ 'yɛ́lı̵́ Yesu yee fó̧ó̧ tóó vu̵ vo' gúndɛm zu̵u̵ idú, ba' vu̵ la tíŋ́ woolı̵́ idú idú, kan ya kaa ka hí̧í̧ bi laa wu̵lı̵́ kan fó̧ó̧ woo 'waapád máalȩ́.

²O̧d vu̵: “Tú̵d sə̧"ȩ́ dɨlı̵́ gbo̧o̧ gba'a, a̧máa nán ba'ad vu̵ dɨ waaná'. Moo woo nɔ i vi ı̵́ tú̵d aga a duu ba' nán ba'ad tóó vu̵ ya tú̵d sə̧"ȩ́ woolı̵́.

³“I laa sú̵m. Mí ba' ví la kɔ́ ı̵́ mbee waa vu̵ wɔgɔ sa̧a̧m zág ya̧'a̧d voolı̵́.

⁴I pa̧ŋ kə́ə sɨɨde sá, kóó kə́ə gáá, kóó tɛ́gɛ́. I dii vá' nán tóó hi̧naalȩ́ sá á̧ḿ.

⁵“Sey kíí dɨ dɔ́lı̵́ kíi tóólı̵́ tée, i dəŋ bag vu̵ hȩn o̧: ‘Tayɨɨ a bag ví hȩn kíi yɛlı̵́.’

⁶Tow nán moo fȩȩlȩ́ tóó a du̵u̵lı̵́ tée, Tayɨɨ wú̵ń baggu̵ hȩn. Tow a pɛ́lı̵́ tée, hȩn baggı̵́ Tayɨɨ woo wú̵ń fíí ya víílí.

⁷Kíí dɔ́ kíi tóólı̵́ tée, i mbaa wu̵lı̵́, ví lá, ví zɔ hȩn ku̵u̵ pú̵ ví má nɔ. Maa nán ba'ad ba nuŋ hȩn sú̵ú̵lı̵́ woo ú̵. I lúú kíi tóólı̵́, la ud kíi tóólı̵́ sá.

⁸“Kíí dɔ́ kaa tóólı̵́, ku̵u̵ fȩȩ ví tée, ví lá hȩn ku̵u̵ 'yɛ́d ví tíŋ́ má nɔ.

⁹Ví za̧a̧ nán ho̧o̧ vu̵ wu̵lı̵́, ví o̧d nán kaa yȩ vu̵: ‘Gbaŋ waalı̵́ Tayɨɨ woo ya̧ víílí sú̵'ú̵.’

¹⁰A̧máa kíí dɔ́ kaa tóólı̵́, ku̵u̵ fȩȩn ví ní tée, i vúd saa voolı̵́, ví o̧d vu̵:

¹¹‘Vɔ́ vud nag vóó yɔ. Hád zu̵m ka má' doo vóólı̵́ yɛ, vɔ́ ta'ad gbɔd ví á̧ḿ yɔ. A̧máa i gaa gbaŋ waalı̵́ Tayɨɨ woo ba ya̧ sú̵'ú̵ á̧ḿ.’

¹²Mí o̧d ví, zá̧ga̧ moo sə̧"ȩ́lȩ́ tée, moo sə̧"ȩ́ nán kaa yȩ voo wú̵ń zi̧i̧ mba ı̵́ nán Súúduma voo á̧ḿ.”

¹³Yesu duu o̧: “Zó̧ó̧ wú̵ń ví̧i̧ nán Koorazín vu̵, kan nán Bɛdsáýda vu̵ ú̵, moo hȩn sa̧ga̧ máa káń kɔ́ víílí sa̧a̧mé yɛ, ka míń kɔ́ dɨ kaa Tír kan Sidɔ́ŋŋı̵́ tée, nán ka vu̵n tii zó̧ó̧ gbó̧ŋ́ na'a. Ka vu̵n gud kúú, ka vu̵n gbɔ́d hú̧u̧m.

¹⁴Moo woo nɔ zá̧ga̧ moo sə̧"ȩ́lȩ́ tée, víń nuŋ hȩn si̧'i̧ní mba nán Tír vu̵ kan nán Sidɔ́ŋ vu̵ á̧ḿ.

¹⁵Ɨ́ víí, nán Kapɛrnáhu̧m vu̵, ví o̧ bin mba hȩnna? Pɛ́lı̵́ sá̧ḿ! Vú̵ń sid ví zu̵u̵ há̧á̧ kaa nɔmmé.”

¹⁶Yesu duu o̧d waa duulí woo vu̵: “Nán a fȩȩ moo víí tée, fȩȩ moo míí nu. Nán a ma ví tée, ma míw. Nán a man tée, ma ı̵́ ka ba'an ya yɛ nɔ.”

¹⁷Ɨ́ vo' gúndɛm zu̵u̵ idú Yesu ba ba' vu̵ pee, vu̵ fíí ya kan zó̧ó̧ dȩ"ȩ́, vu̵ o̧ddu̵: “Ba'á, yigid ɓı̵́d vu̵ kid vɔ́ tɔ́g kan yɛ́g móó á̧ḿ.”

¹⁸A̧máa Yesu ka ki máa, hí̧i̧d vu̵: “Ká mí ho̧ Seeɗán wá̧á̧ zu̵u̵ be"ı̵́ vaŋná kɔ́ ı̵́ mam nimní wɔgɔ.

¹⁹Mí pú̵ ví sı̵́ néélȩ́ moo bɨɨg vu̵ 'ná'ané, kan nɛɛg vu̵ ú̵. Víń mba hȩn mbalı̵́ Seeɗán woo 'waapád; hȩn ɓı̵́d tóó wú̵ń kɔ́n ví ní.

²⁰A̧máa I dȩ' zó̧ó̧ moo yigid ɓı̵́d ku̵u̵ kid ví tɔ́g má nɔ sá, aga i dȩ' zó̧ó̧ moo vu̵ bíńda yéé víí be"ı̵́ sú̵'ú̵.”

²¹Sey woolı̵́ máa, yigid Tayɨɨ woo dȩ'ȩd Yesu zó̧ó̧, ma Yesu o̧: “Ba'á, ı̵́ káḿ 'yɛ́ be' kan hág, mí dȩm nag, moo mɔ́ yu̵g nán hȩn gaalı̵́ vu̵ hȩn yɛ, kan nán 'wɔ́lı̵́ vu̵ á̧ḿ, a̧máa mɔ́ tú'ud nán ı̵́ ku̵u̵ man kan náásá̧ŋ́ waa vu̵ má nɔ. Ɨ́ yo̧go̧, Ba'á. Mí dȩm nag, moo móo hí̧í̧ a kɔ́y ı̵́ yo̧go̧.

²²“Ba' míí gbɔn hȩn 'waapád sú̵'ú̵. A̧máa nán tóó gaa Waa Tayɨɨ woo 'waa né, séý Ba'á Tayɨɨ aga wu̵ gaa. Nán tóó gaa Ba'á Tayɨɨ 'waa né á̧ḿ, séý Waa wu̵ gaa, kan nán ı̵́ Waa Tayɨɨ woo ka hí̧í̧ bi tú'udu̵ máa, wú̵ń gaawu̵ á̧ḿ.”

²³Yesu tii daa waa duulí woo voolı̵́, o̧d vu̵ ya voolı̵́ vu̵ mɛ́ń: “Ɨ́ víí máa, du̵u̵d víw, moo nɔ́ɔ́ víí vu̵ ho̧ hȩn sú̵'ú̵.

²⁴Mí o̧d ví, anábi vu̵ kan gbanii vu̵ ɓu̵u̵lı̵́ na'a, ká vu̵ hí̧í̧ bi ho̧ hȩn kíí ho̧ yɛ vu̵ á̧ḿ, a̧máa vu̵ ho̧n né. Ká vu̵ hí̧í̧ bi ki moo kíí ki yɛ vu̵ á̧ḿ, a̧máa vu̵ kin ní.”

²⁵I ki ú, nán debtere gaalı̵́ tóó lúú yúba, bi gu̵g Yesu wu̵, vigi: “Akaw, míń kɔ́ née, ma míń nuŋ vágád káákáá Tayɨɨ woolı̵́lá?”

²⁶Yesu hí̧i̧du̵: “Debtere o̧ nɛ́nná? Mɔ́ záŋ́ga ki nɛ́nná?”

²⁷Nán pee hí̧i̧du̵: “A̧m hí̧í̧ ı̵́ 'yɛ́lı̵́ Tayɨɨ móó kan zó̧ó̧ móó, kan néélȩ́ móó, kan moo taalı̵́ móó 'waapád. A̧m hí̧í̧ dam vu̵ kɔ́ ı̵́ káḿ hí̧í̧ fó̧ó̧ móó máa wɔgɔ á̧ḿ.”

²⁸Ma Yesu hí̧i̧du̵: “Yagalı̵́. A̧m kɔ́ ı̵́ yo̧go̧ tée, mɔ́ń nuŋ vágád.”

²⁹A̧máa nán pee hí̧í̧ bi nuŋ moo to̧o̧ȩ, ma duu vi Yesu: “Dan sú̵u̵ nɔ́nná?”

³⁰Ma Yesu duu ka moo o̧ddu̵: “Nán tóó lúú Yerúsalemmé, zu̵u̵ kaa Yeríkolı̵́. Hi̧naalȩ́ máa, dɔ́d kɛm vu̵ ya̧gá̧, vu̵ vbiddu̵ sa̧a̧m, vu̵ gbɔ́gɔ, zaa kan nɔɔ ó̧, ma vu̵ daa lúú.

³¹Nán hȩn ha"ı̵́ tóó duu zu̵u̵ hi̧naa peelı̵́ á̧ḿ, la dunnɔ, daa ya̧a̧wo̧.

³²Nán Levíd tóó ya duu dunnɔ, daa ya̧a̧ hȩn woo.

³³A̧máa nán Samaríi tóó duu hi̧naa dágá yȩlȩ́ á̧ḿ, ma la dun nán pee. Ka ho̧go̧ máa, kɔ́gɔ la gíḿná.

³⁴Séé la woolı̵́, kɔ́ddu̵ gam[6] ndɔ́ggı̵́, go̧o̧ kan sa̧a̧m, gaŋ ha"u̵ wamndelı̵́, pa̧ŋŋɔ laan lig gáálı̵́, tu̵gu̵.

³⁵Ya̧g ka̧'a̧mé máa, vud booro idú, pú̵ ı̵́ lig aga, o̧ddu̵: ‘A̧m tu̵gu̵ ú̵. A̧m lı̵́d sɨɨde tóó yúú woolı̵́ ú̵ si̧', sey a̧n fíí ya tée, míń sú̵u̵m.’ ”

³⁶Yesu ka zíd nán yȩ ya̧g 'waa máa, duu vigi: “Mɔ́ taa nán máa ta̧a̧nɔ́ yȩ vu̵, nóo ba ka mbaa dag gboo ı̵́ ka dɔ́d kɛm vu̵ ya̧gá̧ yȩ woolá?”

³⁷Nán pee duu hí̧i̧du̵: “Nán ı̵́ ka kɔ́ddu̵ zó̧ó̧ nán yȩ nɔ.” Ma Yesu o̧ddu̵: “A̧m la kɔ́ ı̵́ yo̧go̧ á̧ḿ.”

³⁸Sey Yesu kan waa duulí woo vu̵ ku̵u̵ dɨ 'yȩ́mné daa máa, dɔ́ kaa tóólı̵́. Wakȩ́ȩ́ tóó yéé woo Máŕta, fȩȩwo̧, dɔd woolı̵́ kíilí.

³⁹Daa sá̧ŋ́ yéé woo Maaríi. Maaríi ya mbaa dáŋ́ ı̵́ 'yɛ́lı̵́ Yesu woolı̵́, baa ki moo woo.

⁴⁰A̧máa Máŕta dɨ woo fó̧ó̧ pinní kan ba'ad ɓu̵u̵lı̵́ na'a ligí, ma ya o̧d Yesu: “Ba'á, dan sá̧ŋ́ gbɔn ba'ad mí dágá. Hȩn woo gbɨn mɔ́ náa? A̧m o̧ddu̵ a ya maan ba'adɨ.”

⁴¹Ɨ́ 'yɛ́lı̵́ ka ki máa, hí̧i̧du̵: “Máŕta, Máŕta, mɔ́ tu̵u̵ zó̧ó̧ móó, mɔ́ pin fó̧ó̧ móó yúú hȩn ɓu̵u̵lı̵́ na'a vu̵lı̵́.

⁴²A̧máa hȩn ka maa kɔ́lı̵́ máa, dɨ dágá. Maaríi yee ka' ı̵́ woo du̵u̵ na'a sú̵'ú̵. Nán tóó wú̵ń vbinnɔ né.”