Read Dii Lúg 12 Bible Online

Lúg 12 - Dii bible

Lúg 12

¹Sey woo dúú ɓu̵u̵lı̵́ na'a vu̵ sú̵g uzinɛɛre há̧á̧ uzinɛɛre há̧á̧ vu̵ 'ná'án. Yesu dəŋ o̧d waa duulí woo vu̵: “I gág kan nán farísa vu̵ ú̵. Nán zó̧ó̧ ví̧i̧g yȩ vu̵ yu̵, moo voolı̵́ ya̧gá̧ man kan wággɨ.

²Moo hȩn tóó ba wáy, ban kúu ní máa wú̵ń pɛ́lı̵́. Kóó hȩn tóó ba yú̵g, nán ban gaa né máa pɛ́lı̵́.

³Moo woo nɔ, moo 'waapád kíí dɨ moolȩ́ ya dimmí yȩ, wú̵ń kiy ya 'waapád. Moo kíí dɨ lágané tɔ́ggı̵́ yú̵ggı̵́ná yȩ, vú̵ń ɗáá dii a̧a̧lȩ́ ma vú̵ń pa moo woo.

⁴“Dan gboo míí vu̵, i ki ú. Mí o̧d ví, i ndɔg nán u̵u̵ nɔɔ fó̧ó̧ víí máa vu̵ sá, moo vú̵ń duu kɔ́n hȩn tóó né.

⁵A̧máa mí tú'ud ví ı̵́ ka maa ndɔggı̵́ má nɔ. I ndɔg Tayɨɨ, ka nɔɔ nán 'waa tée, ka duu gbɔgɔ vee gə̧ə̧lȩ́ má nɔ. Dɨ ı̵́ yo̧go̧; mí o̧d ví, i ndɔg wu̵ yu̵ dágá.

⁶Dȩ' naag nɔ́nɔ́ pȩ́ń vu̵ gín vu̵ dála idú náa? Kóó ı̵́ yo̧go̧ si̧', Tayɨɨ záń vu̵ dágá aga né.

⁷Wá' yúú hú̧' víí vu̵ 'waa sú̵'ú̵ á̧ḿ. I kɔ́ dú̵ú̵ sá; Tayɨɨ hí̧í̧ ví mba dȩ' naag vu̵ ɓu̵u̵lı̵́ na'a.”

⁸Yesu duu o̧d vu̵: “Mí o̧d ví, kóó nɔ́nná a tú' ba bin nán míí nu tíŋ́ nánán voolı̵́ tée, ı̵́ míí Tayɨɨ ka ba'an ya yɛ, míń o̧d maleeka Tayɨɨ woo vu̵: ‘Nán yɛ nán míí nu’ á̧ḿ.

⁹A̧máa nán a su̵u̵n tíŋ́ nánán voolı̵́ tée, míń su̵u̵wu̵ tíŋ́ maleeka Tayɨɨ woo voolı̵́ á̧ḿ.

¹⁰Ɨ́ míí Tayɨɨ ka ba'an ya yɛ, nán a moo moo maag yúú míílí̧ ú̧ si̧', moo woo wú̵ń 'wáa ú̵. A̧máa nán a haa yigid Tayɨɨ woo tée, Tayɨɨ wú̵ń gbɔn moo woo né.

¹¹Ku̵u̵ pa̧ŋ ví laan lig sú̵ggı̵́ nán Yúúda voolı̵́, tóó tée, nán gbo̧o̧ voolı̵́ tée, i gbɔ́ dam: ‘Yee vɔ́ń la hí̧í̧ nɛ́nná?’ tóó tée: ‘Vɔ́ń o̧ nɛ́nná?’ máa sá,

¹²moo yigid Tayɨɨ woo wú̵ńnɔ tú'ud ví moo i o̧ máa zu̵u̵ ya̧g woolı̵́.”

¹³Nán tóó sa̧a̧m dúú voolı̵́ o̧d Yesu: “Akaw, i o̧d dan nii a pú̵n hȩn gaga ka' ı̵́ míí nu.”

¹⁴Yesu ka ki máa, hí̧i̧du̵: “Ɨ́ yo̧go̧ yȩȩ́, nóo 'yɛ́n ı̵́ moo sə̧"ȩ́, tóó tée, ı̵́ hȩn gaga yȩ"ȩ́ sa̧a̧m víílílá?”

¹⁵Duu o̧d dúú vu̵: “I gággú̵. I kɔ́ ɗɔgɔm sá, moo hȩn naa há'an nán vu̵ nɔm né, kóó a ɓu̵u̵ ú̵ si̧'.”

¹⁶Ma Yesu duu o̧d vu̵ moo yɛ kan ya̧g zílí: “Nán naa tóó dɨ kan bab woo, hȩn bab woo vu̵ liidu̵ ɓu̵u̵lı̵́ na'a.

¹⁷Ka ho̧ ná' máa, taa o̧ zó̧ó̧ woolı̵́: ‘Mí kan ya a̧n su̵g hȩn bab míí vu̵ 'yɛ́n wu̵lı̵́ né. Yee míń kɔ́ nɛ́nná?’

¹⁸Duu o̧: ‘Yow, mí gaa hȩn a̧n kɔ́ máa sú̵'ú̵. Míń 'woo a̧a̧ míí vu̵, míń duu yo̧o̧ tóó gbo̧o̧ ba'a. Míń aa tú̵d míí wu̵lı̵́, míń paga hȩn naa míí vu̵ 'yɛ́ wu̵lı̵́ 'waapád.

¹⁹Pig woo tée míń o̧d fó̧ó̧ míí, mɔ́ dɨ sı̵́ kan hȩn ɓu̵u̵lı̵́ na'a ó̧. Wú̵ń mbaa veevee. Mɔ́ń nəə, mɔ́ń lá, mɔ́ń zɔ, mɔ́ń dȩ' zó̧ó̧ wu̵lı̵́.’

²⁰A̧máa Tayɨɨ o̧d baa pee: ‘Ya̧ŋ móó yɛ nɔ! Vid ɓəə yɛ mɔ́ń nɔɔ wu̵lı̵́. Hȩn káḿ mbɔ́g 'yɛ́ vu̵ yȩ, vú̵ń mbaad nɔ́nná?’ ”

²¹Pig woo máa, Yesu duu o̧: “Dɨ ı̵́ yo̧go̧, nán ka su̵gu̵d fó̧ó̧ woo hȩn naa tée, wú̵ń 'yɛ́n hȩn naa tíŋ́ Tayɨɨ woolı̵́ né.”

²²Yesu duu o̧d waa duulí woo vu̵: “Moo woo nɔ mí o̧d ví, i gbɔ́ dam moo fó̧ó̧ víí sá, kan hȩn lálı̵́ víí vu̵, kan sa̧a̧m dɔ́lı̵́ víí vu̵ sá á̧ḿ.

²³Moo vágád wu̵ mba hȩn lálı̵́, fó̧ó̧ wu̵ mba sa̧a̧m.

²⁴I tə́g lá ví kpa̧a̧naag vu̵ yu̵, vu̵ ban hȩn né, vu̵ su̵gu̵n hȩn bab vu̵ né, vu̵ kan lig hȩn 'yɛ́lı̵́ pɛ́lı̵́, a̧a̧ pɛ́lı̵́ á̧ḿ. A̧máa kóó ı̵́ yo̧go̧ si̧', Tayɨɨ dɨ vu̵ hȩn lálı̵́ pú̵lı̵́ɨ. Máa, víi mban nɔ́g waa vu̵ náa?

²⁵Nóo víílí sa̧a̧mé, dam gbɔ́lı̵́ woo ka há"u̵ nɔm waaná' agalá?

²⁶A̧máa kíí dɨ kan néélȩ́ kɔ́n hȩn waa sȩ́gȩ́d yȩ vu̵ né, máa moo ȩn ví gbɔ́ dam moo hȩn tóó vu̵lá?

²⁷I ho̧ yəəyə́əné vu̵ yu̵. Vu̵ kɔ́n ba'ad né, vu̵ paan sugud né. Kóó ı̵́ yo̧go̧ si̧', vu̵ dɨ na"ȩ́, vu̵ ko̧' á̧ḿ. A̧máa mí o̧d ví, kóó Súlemáánu kan hȩn naa woo vu̵ 'waapád ká dɔ́ sa̧a̧m du̵u̵ man kan yəəyə́əné né, kóó dágá aga.

²⁸Ɓəə máa, hó̧d dii hó̧g tíŋ́, yɔ́gɔ́ vú̵ń saawu̵ gbɔ. A̧máa Tayɨɨ dɨd vu̵ sa̧a̧m dɔ́lı̵́ ı̵́ yo̧go̧, ma dan tóó víaa? Nán moo fȩȩlȩ́ waaná' yɛ víw.

²⁹Ɨ́ víí, i soo hȩn vu̵ daa, i o̧: ‘Vɔ́ń lá ȩná?’, ‘Vɔ́ń zɔ ȩná?’ sá. I gbɔ́ dam sá á̧ḿ.

³⁰Moo hȩn yȩ vu̵ 'waapád, nán gaa Tayɨɨ sá hágá yɛlı̵́ vu̵u̵ baa soo. A̧máa Ba' víí Tayɨɨ gaa ba vín maa hȩn yȩ vu̵ nuníi máa ó̧.

³¹Séý i dəŋ soo gbaŋ waalı̵́ Tayɨɨ woo pȩ́ń tée, sı̵́ń ha'ad ví hȩn ı̵́ yȩ vu̵ té'.”

³²Yesu duu o̧: “Hú' mbee waaná' yɛ ví, i kɔ́ dú̵ú̵ sá. To̧o̧d Ba' víí Tayɨɨ moo bi dɔd ví gbaŋ waalı̵́ woolı̵́.

³³I gí hȩn kíí 'yɛ́ máa, ví yȩ' nán gíḿ vu̵ la té'. I mbɔ́gɔd fó̧ó̧ víí kə́ə sɨɨde ka mbúgu ní, kan hȩn naa ka lı̵́n be"ı̵́ né má nɔ. Ya woo líw vu̵ séen la wu̵lı̵́ bə́' né, ya ɓugud ka lı̵́n hȩn wu̵lı̵́ né má nɔ.

³⁴Moo ya hȩn naa víí ku̵u̵ du̵u̵lı̵́ máa, zó̧ó̧ víí vu̵ du̵u̵lı̵́ á̧ḿ.”

³⁵Yesu duu o̧: “I dɔ́ sa̧a̧m ba'ad víí, ví sa vee 'yɛ́ lám víí vu̵lı̵́.

³⁶I mbaa kɔ́ ı̵́ gba'a ku̵u̵ laa ı̵́ buulí voo máa vu̵ wɔgɔ. Sey a fíí ya ya lig pú̵lı̵́lı̵́, a vá' ya tée, u̵u̵ tú̵'u̵du̵ vaŋná.

³⁷Du̵u̵d gba'a ı̵́ ı̵́ buulí voo a maa vu̵ nɔ́ɔ́ to̧o̧ná má nɔ. Mí o̧d ví moo yȩ́ńne, wú̵ń dɔ́ sa̧a̧m ba'ad woo, wú̵ń 'yɛ́ gba'a woo yȩ vu̵ ya hȩn lálı̵́lı̵́, wú̵ń séé ya kɔ́d vu̵ ba'ad.

³⁸Tóó tée, a yaa dɨ tı̵́gɨdáa? A yaa dɨ damnaalá̧a̧? A nuŋ nán yȩ vu̵ ı̵́ yo̧go̧ tée, du̵u̵d vu̵ ú̵.

³⁹“A̧máa i gaa du̵u̵ na'a. Baa lig kan gaa líw ban yaa sey woo tɛ́lá tée, kan nən né, kan gbɔn líw kan kɛnnɔ lig ní.

⁴⁰Ví á̧ḿ, i mbaa bə́', moo ı̵́ míí Tayɨɨ ka ba'an ya yɛ, sey a̧n fíí ya tée, víń gaa né.”

⁴¹Piɛ́r ka ki moo yȩ máa, vi Yesu: “Ba'á, mɔ́ zíd vu̵ yu̵ ya̧g yȩ naa? Kóó nán 'waapáddaa?”

⁴²Ɨ́ 'yɛ́lı̵́ Yesu hí̧i̧du̵: “Nóo nán hȩn tu̵lı̵́ yȩ́ń kan zó̧ó̧ diinílá? Wu̵ ı̵́ nán baa lig woo ka 'yɛ́gɛ yúú nán woo voolı̵́ 'waapád, moo a yȩ' vu̵ hȩn lálı̵́ sey hȩn lálı̵́lı̵́ má nɔ.

⁴³Nán baa lig woo a yaa, a maawo̧ a dɨ kɔ́lı̵́ ı̵́ yo̧go̧ tée, du̵u̵du̵ ú̵.

⁴⁴Mí o̧d ví moo yȩ́ńne, wú̵ń 'yɛ́gɛ yúú hȩn woo vu̵lı̵́ 'waapád.

⁴⁵A̧máa nán ba'ad yȩ a moo woolı̵́ zó̧ó̧lȩ́: ‘Baa lig míí wú̵ń yaan há̧ná né’, tée wú̵ń bé' nán ba'ad vu̵ gbɔ́lı̵́, wayée vu̵ kan wakȩ́ȩ́ vu̵ á̧ḿ, wú̵ń lá hȩn, wú̵ń zɔ hȩn, wú̵ń kíí doo.

⁴⁶Baa lig woo a yaa tée, zá̧ga̧ woo nán ba'ad yȩ wú̵ń laanɔ né, wú̵ń gaan sey woo né á̧ḿ. Baa lig wú̵ń sə̧'ə̧nɔ sa̧a̧mé, wú̵ń su̵g sú̵ú̵ vu̵ hȩn kan nán moo faalı̵́ vu̵ dágá.

⁴⁷Nán ba'ad ı̵́ ka gaa hȩn hí̧í̧lí̧ baa lig woo woo, ma ka mbɔ́gɔn hȩn né, ka kɔ́n hȩn hí̧í̧lí̧ baa lig woo woo né tée, wú̵ń gbɔ́gɔ ɓu̵u̵lı̵́ na'a.

⁴⁸A̧máa ı̵́ ka gaan hȩn hí̧í̧lí̧ baa lig woo woo né pȩ́ń, a kɔ́ hȩn ka maa gbɔ́lı̵́ tée, wú̵ń gbɔ́gɔ loo waaná'. Nán Tayɨɨ ka pú̵gu̵ hȩn ɓu̵u̵ máa, wú̵ń duu vigi hȩn ɓu̵u̵ á̧ḿ. Nán Tayɨɨ ka 'yɛ́ hȩn woolı̵́ na'a máa, wú̵ń duu vigi hȩn za̧a̧ná á̧ḿ.”

⁴⁹Yesu o̧: “Mí yaa moo vee wu̵ mu"í̧ hágá yɛlı̵́. Mí hí̧í̧ vee woo kan dəŋ má"ȩ́ 'ya̧'a̧ yɛ nɔ!

⁵⁰Mam Tayɨɨ tóó dɨlı̵́, maa míń dɔ́[9] wu̵lı̵́ pȩ́ń, a̧máa hȩn woo yúnna dɨ zó̧ó̧lȩ́.

⁵¹Ví taa ba mín yaan kan moo zó̧ó̧ ká̧'a̧dɨ hágá yɛláa? Ɨ́ yo̧go̧ pɛ́lı̵́ sá̧ḿ, a̧máa nán vú̵ń hı̵́'ı̵́n moo míílí̧.

⁵²Moo 'ya̧'a̧ yɛ nán u̵u̵ mbaa kíi dágá fó̧ó̧ nɔ́nɔ́ tée, vú̵ń hı̵́'ı̵́n, ı̵́ tóó vú̵ń idú, ı̵́ tóó vú̵ń ta̧a̧nɔ́.

⁵³Waa ba'a vú̵ń hı̵́'ı̵́n kan wayée waa voo vu̵, wayée waa vú̵ń hı̵́'ı̵́n kan ba' voo vu̵, waa na'a vú̵ń hı̵́'ı̵́n kan waa wakȩ́ȩ́ waa voo vu̵, wakȩ́ȩ́ waa vú̵ń hı̵́'ı̵́n kan na' voo vu̵, waa na'a vú̵ń hı̵́'ı̵́n kan kȩ́ȩ́ waa voo vu̵, wakȩ́ȩ́ vú̵ń hı̵́'ı̵́n kan wə̧ə̧ na' voo vu̵.”

⁵⁴Yesu duu o̧d dúú vu̵: “Kíí ho̧ mam ka doo ka' mam na'alȩ́ tée, ví o̧: ‘Mam wú̵ń yaa ú̵’, tée mam yaa gínú.

⁵⁵Sápéém ka zu̵u̵ na'alȩ́ tée, ví o̧: ‘Ya píím dɨ sı̵́ yaalı̵́ɨ’, tée ya pi gínú.

⁵⁶Nán zó̧ó̧ ví̧i̧g yȩ ví, ví gaa hȩn hágá yɛ vu̵ səgən, kan ı̵́ be"ı̵́ vu̵ á̧ḿ, a̧máa ví ho̧ hȩn 'ya̧'a̧ yɛ vu̵ səgə né.”

⁵⁷Yesu duu o̧: “Moo ȩn ví səgən víí hȩn hí̧í̧lí̧ Tayɨɨ woo kan hȩn tóó vu̵ nélá?

⁵⁸Káḿ dɨ laalı̵́ kan dam ı̵́ maag, nán moo sə̧"ȩ́ woolı̵́ tée, a̧m mbɔ́g moo kannɔ hi̧naalȩ́ pȩ́ń. Moo kan pa̧ŋ la dɔm nán moo sə̧"ȩ́ woolı̵́, tée nán moo sə̧"ȩ́ kan 'yɛ́m nag só̧ó̧ze woolı̵́, só̧ó̧ze kan tú̵'u̵m.

⁵⁹Mí o̧m mɔ́ń vún púúsina woolı̵́ né sá̧ḿ, séý mɔ́ń sú̵ú̵ dála kéélı̵́ woo 'waa pȩ́ń.”