Read Dii Lúg 13 Bible Online

Lúg 13 - Dii bible

Lúg 13

¹Sey woolı̵́ máa, nán Gálilée tóó vu̵ dɨd Tayɨɨ hȩn ha"ı̵́, a̧máa Pilád ba' nán u̵u̵ nɔɔ vu̵ ú̵. Ma, nánán tóó vu̵ ya o̧d Yesu moo yȩ.

²Yesu ka ki moo yȩ máa, hí̧i̧d vu̵: “Ví taa nán Gálilée yȩ vu̵nnɔ kɔ́ hȩn ɓı̵́d mba daga vu̵ 'waapád, ma ba ku̵u̵ kɔ́d vu̵ hȩn sȩ́ḿ ı̵́ yo̧go̧ yȩ naa?

³Mí o̧d ví, pɛ́lı̵́ sá̧ḿ! A̧máa tow i gbɔn mbaalı̵́ ɓı̵́d víí ní tée, ya víí 'waapád víń dɨ nɔm ı̵́ yo̧go̧ á̧ḿ.

⁴I ho̧ nán wa̧nɓó' zu̵u̵ ka'andaddú̵ lig lú̵gú̵d Silówalı̵́ ka túḿ pi̧i̧ vu̵ yȩ, vu̵ nɔɔ sú̵'ú̵. Tóó tée ví taa ba vu̵nnɔ kɔ́ hȩn ɓı̵́d mba nán Yerúsalem tóó vu̵ 'waapáddaa?

⁵Mí o̧d ví, pɛ́lı̵́ sá̧ḿ. A̧máa i gbɔn mbaalı̵́ ɓı̵́d víí ní tée, víń ti ı̵́ yo̧go̧ 'waapád.”

⁶Pig woo máa Yesu duu zí ya̧g yɛ, o̧: “Nán tóó ndag zɔgɔb[10] woo bab woolı̵́, ma yaa líid woo to̧"ȩ́, a̧máa ho̧n né.

⁷Ka ho̧ ná' máa, o̧d nán bab baalı̵́: ‘A̧m ho̧ ve' ta̧a̧nɔ́ wu̵ yɛ nɔ, mí baa ya soo zɔgɔb yɛ líid woo, a̧máa mí ho̧n né. A̧m du̵ gbɔgɔ la ú̵. Moo ȩn ka lá hág té"á?’

⁸Ma nán bab baalı̵́ pee hí̧i̧du̵: ‘Ɨ́ 'yɛ́lı̵́ míí, i gbɔ a mbaa ve' dágá yɛ pȩ́ń. Mí ɓú do̧o̧ woo, mí du' hȩ́ȩ wu̵lı̵́.

⁹Tóó tée vee wú̵ń lii ú. Tow a lii ní tée, víń du̵gu̵ gbɔ la.’ ”

¹⁰Zá̧ga̧ asawə tóólı̵́ máa, Yesu dɨ moo tú"í lig sú̵ggı̵́ nán Yúúda voolı̵́.

¹¹Wakȩ́ȩ́ tóó ká du̵u̵lı̵́, yigid ɓı̵́d ká kunnɔ ve' wa̧nɓó' zu̵u̵ ka'andaddú̵, yó̧o̧n dɔg yúba né.

¹²Sey Yesu ka ho̧go̧ máa, beewu̵, o̧ddu̵: “Na'á, kó̧ggı̵́ móó yȩ 'wáa sú̵'ú̵.”

¹³Yesu ha'adu̵ nag. Wakȩ́ȩ́ pee há̧á̧ yó̧ó̧ dɔg, dəŋ Tayɨɨ na"ȩ́.

¹⁴Ɨ́ nii lig sú̵ggı̵́ nán Yúúda voo ka ho̧ máa, kɔ́ zó̧ó̧ yȩ́ȩ́, moo ȩn Yesu ba za̧a̧ nán zá̧ga̧ asawəlı̵́lá, o̧d dúú vu̵: “Ba baa kɔ́ ví ba'ad bá' gúú náa? I yaa fó̧ó̧ víí vu̵ za̧a̧né bá' yȩlȩ́. A̧máa i yaa zá̧ga̧ asawəlı̵́ sá.”

¹⁵Ɨ́ 'yɛ́lı̵́ Yesu hí̧i̧du̵ ya̧g o̧: “Nán zó̧ó̧ ví̧i̧g yɛ víw! Ya víí 'waapád, ví buu ndaa víí, tóó tée, wamnde víí, moo bi zɔnnɔ mam zá̧ga̧ asawəlı̵́ náa?

¹⁶Wakȩ́ȩ́ yɛ á̧ḿ, Ibrahí̧í̧ma aa yéeɨ, ma Seeɗán kɔ́gɔ ho̧o̧ ve' wa̧nɓó' zu̵u̵ ka'andaddú̵ yɔ. Maa ba mín za̧a̧wo̧ zá̧ga̧ asawəlı̵́ ú̵ náa?”

¹⁷Sey ka moo moo ı̵́ yo̧go̧ máa, nán maag woo vu̵ 'waapád sȩ́ḿ kɔ́ vu̵. A̧máa dúú vu̵ dȩ' voo zó̧ó̧ yúú hȩn sa̧ga̧ Yesu ka kɔ́ vu̵ yȩlȩ́.

¹⁸Yesu duu o̧: “Gbaŋ waalı̵́ Tayɨɨ woo man kan ȩná? Ba gú̵gú̵nɔ kan ȩná?

¹⁹Man kan yȩ́ń sambɨɨm hó̧g nán tóó ka ɓɛ hu̵u̵ bab woolı̵́, ka na' tée, nɔ́g waa ku̵u̵ sé' waa waa vu̵ wu̵lı̵́ má nɔ.”

²⁰Yesu duu faa o̧d vu̵: “Míń gú̵gú̵n ví gbaŋ waalı̵́ Tayɨɨ woo kan ȩná?

²¹Man kan wág wakȩ́ȩ́ tóó ka ɓɛ, ka duu ɓɛ zu̵m ááwa gbɛg zu̵u̵ nɔ́nɔ́, ka du' wág yȩ wu̵lı̵́, ka dɔn tée, ka fúŋ́ na'a má nɔ.”

²²Yesu baa 'yȩm ya̧a̧ duu kaa gbo̧o̧ vu̵lı̵́ kan kaa waa vu̵, moo dɔggı̵́ Yerúsalemmé. Ma baa tú' moo duu wu̵lı̵́.

²³Nán tóó vigi: “Ba'á, nán waaná' vú̵ńnɔ dɔ́ gbaŋ waalı̵́ Tayɨɨ wooláa?” Yesu ka ki máa, hí̧i̧d vu̵:

²⁴“I sȩn fó̧ó̧ moo ví dɔ́ ya̧g dɔ́m ɓə́əné yȩlȩ́ ó̧, moo mí o̧d ví, nán ɓu̵u̵lı̵́ na'a vú̵ń soo bi dɔ́ ú̵, a̧máa vú̵ń nugun néélȩ́ woo né.

²⁵Zá̧ga̧ woo, ı̵́ kíi aga wú̵ń tú̵' ya̧g dɔ́m. Tée víń dii gɔ́ŋ́, víń béé bee, o̧: ‘Ɨ́ 'yɛ́lı̵́ vóó, i tú̵'u̵d vɔ́ ú̵.’ A̧máa, wú̵ń hí̧i̧d ví: ‘Mí gaan ya kíí yaa né.’

²⁶Yow, tée ı̵́ víí, víń bé' moo moolȩ́: ‘Ká vɔ́ lá, vɔ́ zɔ hȩn tíŋ́ víílí, ví tú' moo tə́ḿ vóó vu̵lı̵́.’

²⁷Wú̵ń hí̧i̧d ví: ‘Mí o̧d ví, mí gaan ya kíí yaa né. I lúú la dáŋ́ míílí̧ yɛlı̵́ 'waapád, nán hȩn ɓı̵́d kɔ́lı̵́ yȩ víw.’

²⁸Víń ho̧ Ibrahí̧í̧ma, kan Iizág, kan Yaakúbu, kan anábi vu̵ 'waapád, ya gbaŋ waalı̵́ Tayɨɨ woolı̵́, tée víń ká̧ŋ́, víń sə́ŋ́ nú', vú̵ń tú̵' gbɔ ví gɔ́ŋ́.

²⁹Nán vú̵ń yaa ka' mam na'alȩ́, kan ka' mam waalı̵́, kan ka' mam gbɔ́zammé, kan mam wázammé, vú̵ń lá hȩn ya gbaŋ waalı̵́ Tayɨɨ woolı̵́.

³⁰Nán ı̵́ ku̵u̵ ho̧ vu̵ hȩn leená hágá yɛlı̵́ máa, tóó vú̵ń tii nán gbo̧o̧. Nán ı̵́ ku̵u̵ mbaa nán gbo̧o̧ hágá yɛlı̵́ máa, tóó vú̵ń tii hȩn lee.”

³¹Zá̧ga̧ woo, nán farísa tóó vu̵ yaa Yesu woolı̵́, vu̵ o̧ddu̵: “A̧m lúú yɛlı̵́, moo Heeród hí̧í̧ bi nɔɔmɔ́.”

³²Yesu ka ki máa, hí̧i̧d vu̵: “I la o̧d hȩn 'yȩ́gȩné ba̧ba̧a̧m[11] yȩ a ki du̵u̵lı̵́ na'a, ɓəə kan yɔ́gɔ́ á̧ḿ, míń dɨ yigid ɓı̵́d vu̵ nɛné, míń dɨ nán ho̧o̧ vu̵ za̧a̧née. Bá' ta̧a̧nɔ́ woo tée, míń 'waa ba'ad míí vu̵ wu̵lı̵́.

³³A̧máa séý míń 'yȩm ɓəə, kan yɔ́gɔ́, kan yɔ́gɔ́ tóó, moo anábi vu̵ 'waapád u̵u̵ nɔɔ Yerúsalemmé.

³⁴“Nán Yerúsalem vu̵, nán Yerúsalem vu̵, ví nɔɔ anábi vu̵, ví gbóo nán Tayɨɨ ka ba' vu̵ víílí máa vu̵ nɔɔ kan 'yɛgɛ. Do' née mí hí̧í̧ bi su̵g ví kɔ́ ı̵́ nɔ́g na'a ka su̵g waa vu̵ búggí máa wɔgɔlá! A̧máa ví sɛ́n né.

³⁵Kaa víí wú̵ń tii gbá̧á̧. Mí o̧d ví, víń duu ho̧n mí sı̵́ né, há̧á̧ wú̵ń ya̧ sey i o̧: ‘Tayɨɨ ı̵́ 'yɛ́lı̵́ a bag ı̵́ ka yaa kan yɛ́g woo yȩ ú̵’ pȩ́ń.”