Read Dii Lúg 14 Bible Online

Lúg 14 - Dii bible

Lúg 14

¹Zá̧ga̧ asawə tóólı̵́ máa, Yesu dɔ́ lá hȩn lig ı̵́ nii farísa tóó woolı̵́. Nán farísa vu̵ pí̧í̧ Yesu.

²Ma nán ho̧o̧ fó̧ó̧ hú̵'u̵né tóó du̵u̵lı̵́, ya mbaa Yesu woolı̵́ tíŋ́.

³Yesu ka ho̧ máa, vi nán debtere gaalı̵́ vu̵, kan nán farísa vu̵ moo: “Debtere baa ví gbɔ hi̧naa moo nán vu̵ za̧a̧né zá̧ga̧ asawəlı̵́ áa?”

⁴A̧máa vu̵ sɛ́n ya̧g hí̧í̧lí̧ ní. Yesu ka ho̧ máa, ha'ad ho̧o̧ pee nag, daa za̧a̧wo̧ gbɔ la,

⁵duu o̧d vu̵: “Nán tóó waa woo, tóó tée ndaa woo, ka wá̧á̧ dəə mammé zá̧ga̧ asawəlı̵́ tée, wú̵ń vunnɔ vaŋná náa?”

⁶Ma moo yȩ big vu̵ ya̧g hí̧í̧lí̧.

⁷Yesu ka ho̧ nán ku̵u̵ bee vu̵ hȩn lálı̵́, ku̵u̵ dəŋ dɔ́ mbaa ya mbaalı̵́ ı̵́ nii voolı̵́ máa, o̧d nán vu̵ 'waapád ya̧g zílí yɛ:

⁸“Nán tóó ka beem ya lig pú̵lı̵́lı̵́ tée, a̧m dəŋ mbaa ya mbaalı̵́ ı̵́ nii voolı̵́ sá. Tóó tée, vú̵ń bee ı̵́ nii tóó ka mbam máa du̵u̵lı̵́ á̧ḿ.

⁹Ma ı̵́ ka bee ví pee kan ya o̧m: ‘A̧m gbɔd nán yȩ ya mbaalı̵́ɨ!’ tée ka mɔ́ń lúú kan sȩ́ḿ, daa laa ya tóólı̵́.

¹⁰A̧máa sey ku̵u̵ beem hȩn lálı̵́ tée, a̧m la mbaa na'amé, moo nán ka beem yȩ a ya o̧m: ‘Dan gboo, a̧m dɔ́ ya yɛlı̵́,’ tée hȩn woo wú̵ń zám fó̧lȩ́ nɔ́ɔ́ nán ku̵u̵ du̵u̵lı̵́ 'waapád yȩ voolı̵́ á̧ḿ.

¹¹Kóó nɔ́nná a na' yúú tée, Tayɨɨ wú̵ń tiiwu̵ hȩn leená. Nán a 'yɛ́ fó̧ó̧ woo hȩn lee tée, Tayɨɨ wú̵ń tiiwu̵ nán gbo̧o̧ á̧ḿ.”

¹²Yesu duu o̧d nán ba beewu̵ hȩn lálı̵́ pee: “Sey káḿ bee nán vu̵ hȩn lálı̵́ zá̧ga̧ sa̧a̧mé, tóó tée mɛnné tée, a̧m bee dam gboo vu̵, tóó tée mɛm móó vu̵ yu̵ sá, kóó dam dáŋ́ lig ı̵́ naa vu̵. Ɨ́ voo, ka vu̵n duu beem, ka vu̵n duu vȩ' pú̵mmɔ́.

¹³A̧máa sey káḿ bee hȩn lálı̵́ tée, a̧m bee nán gíḿ vu̵, kan nán kó̧ggı̵́ vu̵, kan kpee vu̵, kan yə̧m vu̵ yu̵.

¹⁴Tée mɔ́ń mbaa kan zó̧ó̧ dȩ"ȩ́, moo vu̵ kan hȩn u̵u̵ duu vȩ' pú̵n mɔ́ né. A̧máa sey Tayɨɨ a nim nán ku̵u̵ kɔ́ hȩn hí̧í̧lí̧ woo máa vu̵ nɔmmé tée, wú̵ń sú̵u̵m wu̵lı̵́ á̧ḿ.”

¹⁵Nán ku̵u̵ sú̵g lá hȩn kan Yesu yȩ, dágá ka ki moo yȩ máa, o̧ddu̵: “Du̵u̵d nán ı̵́ a lá hȩn gbaŋ waalı̵́ Tayɨɨ woolı̵́ má nɔ.”

¹⁶A̧máa Yesu zíddu̵ ya̧g yȩ o̧: “Nán tóó kɔ́ hȩn lálı̵́ gbo̧o̧ woo, béé nán vu̵ ɓu̵u̵lı̵́ na'a.

¹⁷Ku̵u̵ mbɔ́g hȩn lálı̵́ 'waa máa, ba' nán ba'ad woo, moo a la o̧d nán ba béé vu̵ pee: ‘I yaa ú̵, hȩn lálı̵́ mbɔ́gɔy 'waa sú̵'ú̵.’

¹⁸A̧máa ya voo 'waapád vu̵ tii moo. Tóó dəŋ o̧: ‘Mí fȩȩ bab sú̵'ú̵, mí laa ho̧lȩ́ȩ. I gbɔnnɔ́, míń nugun laalı̵́ né.’

¹⁹Tóó o̧ woo: ‘Mí fȩȩ ndaa hȩn baalı̵́ wa̧nɓó', mí laa vu̵ gu̵ggı̵́ɨ. I gbɔnnɔ́, míń nugun laalı̵́ né.’

²⁰Tóó duu o̧ woo: ‘Vu̵ pú̵n liggi, moo woo nɔ, míń nugun laalı̵́ né.’

²¹Nán ba'ad pee fíí ya o̧d baa lig woo. Baa pee kɔ́ zó̧ó̧ yȩ́ȩ́, o̧ddu̵: ‘A̧m laa saalı̵́ kan tə́ḿmé vaŋná, mɔ́ pa̧ŋ nán gíḿ vu̵, kan nán kó̧ggı̵́ vu̵, kan yə̧m vu̵, kan nán kpee vu̵ ya ú̵.’

²²Pig woolı̵́ nán ba'ad pee duu fíí ya o̧ddu̵: ‘Ba'á, mí bee nán pee vu̵ yaan sú̵'ú̵. A̧máa ya mbaalı̵́ tóó vu̵ kéé ú̵.’

²³Baa lig duu o̧ddu̵: ‘A̧m vúd la hi̧naa vu̵lı̵́ kan kaa pigim, mɔ́ pin nán vu̵ dɔd ya, moo lig míí a hi̧"ú̧.

²⁴Mí o̧d ví, nán mín bee vu̵ yȩ, vú̵ń lán hȩn míí yɛ né sá̧ḿ.’ ”

²⁵Yesu tii daa o̧d dúú ku̵u̵ duuwu̵ ɓu̵u̵lı̵́ na'a yȩ vu̵:

²⁶“Nán tóó a bi duunɔ́ tée, a gbɔ ba' woo, kan na' woo, kan kȩ́ȩ́, kan waa vu̵, kan daa sá̧ŋ́ vu̵, kan daa kȩ́ȩ́ vu̵, kan fó̧ó̧ woo á̧ḿ. A ı̵́ yo̧go̧ pɛ́lı̵́ tée, nán yȩ waa duulí míí nu pɛ́lı̵́.

²⁷Nán a ndɔg nɔm,[12] a duun mí ní tée, waa duulí míí nu pɛ́lı̵́.

²⁸“Nán tóó sa̧a̧m víílí ka hí̧í̧ bi yo̧o̧ lig hɨɨ tée, a wá' hȩn a yo̧o̧n wu̵lı̵́ pȩ́ń. Tée a gaa sɨɨde bii ban maa sú̵'ú̵ pȩ́ń, ma a dəŋ ba'ad woo.

²⁹A ı̵́ yo̧go̧ pɛ́lı̵́ tée kan pɛd lig, sɨɨde kan ndu̵u̵, nán ka vu̵n hı̵́'ɨwu̵,

³⁰ka vu̵n o̧: ‘Nán yȩ dəŋ hȩn yo̧o̧lȩ́ sú̵'ú̵, a̧máa sé"ı̵́ woo mbaga ma.’

³¹Dɨ ı̵́ yo̧go̧ á̧ḿ, gbanaa tóó ka laa daga sɨɨ salı̵́, ma ka dɨ kan fó̧ó̧ uzinɛɛre wa̧nɓó'. Ɨ́ tóó dɨ woo kan fó̧ó̧ uzinɛɛre gbɛg. Ɨ́ ka dɨ woo kan fó̧ó̧ uzinɛɛre wa̧nɓó' yȩ, kɔ́ nɛ́nná? Taan moo pȩ́ń náa?

³²A̧máa ka gaa ba bíń mbannɔ né tée, séý a ba' la o̧d gbanaa ı̵́ tóó ka yaa ná bə́' né yȩ pȩ́ń, tée a mbɔ́g moo kannɔ vaŋná.

³³Moo woo nɔ kóó nɔ́nná a gbɔn hȩn dáń woo vu̵ 'waapád né tée, waa duulí míí nu pɛ́lı̵́.”

³⁴Yesu duu o̧d vu̵: “Ta̧m zú̵g máa, hȩn to̧o̧ȩ, a̧máa ka san sı̵́ né tée, ba duu kɔ́gɔ nɛ́nná?

³⁵Wú̵ń duu kɔ́n hȩn yȩ́ń tóó né. Ba yɛddu̵ yɛnnée. Nán a dɨ kan tɔ́g moo kilí ú tée, a ki du̵u̵lı̵́ na'a.”