Read Dii Lúg 16 Bible Online

Lúg 16 - Dii bible

Lúg 16

¹Yesu o̧d waa duulí woo vu̵: “Nán naa tóó ká dɨ kan nán hȩn tu̵lı̵́ woo. Ka dɨ hȩn woo lı̵́nné máa, nán tóó vu̵ ya o̧ddu̵.

²Ma bee nán hȩn tu̵lı̵́ woo pee, vigi: ‘Mí ki moo tóó yúú móólȩ́ máalá̧! A̧m wá' hȩn yúú ba'ad móólȩ́ bɔ, moo mɔ́ń duu tu̵n sı̵́ hȩn míí ní.’

³“Nán hȩn tu̵lı̵́ pee ka ki moo yȩ máa, o̧ zó̧ó̧ woolı̵́: ‘Baa lig míí wú̵ń vun sı̵́ ba'ad hȩn tu̵lı̵́ míí yɛlı̵́ yɔ. A̧máa mí baa hȩn mban né, sȩ́ḿ kɔ́n hȩn ɓá"ı̵́ á̧ḿ! Yee míń kɔ́ nɛ́nná?

⁴Dɨ ı̵́ yo̧go̧; u̵u̵ vun ba'ad tée, mí gaa hȩn a̧n kɔ́ pȩ́ń, nán u̵u̵ fȩȩn kíi voolı̵́ máa sú̵'ú̵.’

⁵Bee nán ɓoo baa lig woo tóó vu̵ dágá dágá, dəŋ vi tóó: ‘Baa lig míí duum dɨ nɛ́nná?’

⁶Nán yȩ hí̧i̧du̵: ‘Ŋgóŋ́góŋ́ kúḿ tȩmɛre.’ Ma duu o̧ddu̵: ‘A̧m ɓɛ ɗerwəl ɓoo móó vaŋná, mɔ́ bíńda vo' nɔ́nɔ́ wu̵lı̵́.’

⁷“Pig woo duu vi nán tóó: ‘Ɨ́ móó máa, baa lig míí duum dɨ nɛ́nná?’ Ma hí̧i̧du̵: ‘Tú̵d ŋgóŋ́góŋ́ gbo̧o̧ tȩmɛre.’ Ma ı̵́ hȩn tu̵lı̵́ pee duu o̧ddu̵: ‘A̧m ɓɛ ɗerwəl ɓoo móó yɔ, mɔ́ bíńda vo' ka'andaddú̵.’

⁸“Baa lig pee dəm nán hȩn tu̵lı̵́ ɓı̵́d yȩ, moo ka kɔ́ kɛb yȩ nɔ. Moo nán hágá yɛlı̵́ vu̵ dɨ kɛb kɔ́lı̵́ sa̧a̧m voolı̵́ mba nán moo fȩȩlȩ́ vu̵ á̧ḿ.”

⁹Yesu duu moo ha': “I ɓɛ hȩn naa ɓı̵́d víí hágá yɛlı̵́ kɔ́ń dag gboo wu̵lı̵́, moo sey a 'wáa ví tée, vú̵ń fȩȩ ví ya mbaalı̵́ ı̵́ káákáálı̵́.

¹⁰Nán a kɔ́ hȩn yȩ́ń yúú hȩn waaná"ȩ́ tée, wú̵ń kɔ́ hȩn yȩ́ń yúú hȩn gbo̧o̧lȩ́ á̧ḿ. Nán a kɔ́ hȩn kə̧ə̧g yúú hȩn waalı̵́ tée, wú̵ń kɔ́ hȩn kə̧ə̧g yúú hȩn gbo̧o̧lȩ́ á̧ḿ.

¹¹Tow i kɔ́n hȩn yȩ́ń yúú hȩn naa ɓı̵́d hágá yɛlı̵́ né tée, nóo wú̵ń pú̵ ví hȩn naa ı̵́ də́ń kəd máalá̧?

¹²Tow i kɔ́n hȩn yȩ́ń yúú hȩn dey voolı̵́ né tée, nóo wú̵ń pú̵ ví hȩn dáń ı̵́ víílá?

¹³Nánán dágá duun gbanaa ya idú ní sá̧ḿ, moo tóó tée wú̵ń máń nán dágá, a̧máa wú̵ń hí̧í̧ ı̵́ tóó. Tóó tée wú̵ń ka nán tóó duu, wú̵ń ɓéé tóó. Víń dɨ kan néélȩ́ duun Tayɨɨ kan hȩn naa á̧ḿ né.”

¹⁴Nán farísa vu̵ sú̵ zó̧ó̧ mbaa ná'. Sey ku̵u̵ ki moo yȩ vu̵ máa, vu̵ kɔ́d Yesu ba̧a̧m.

¹⁵Ma Yesu o̧d vu̵: “Ɨ́ víí ví hí̧í̧ nánán u̵u̵ taa ba bin kɔ́ hȩn hí̧í̧lí̧ Tayɨɨ woo nɔ, a̧máa Tayɨɨ gaa zó̧ó̧ víí sú̵'ú̵. Moo hȩn ka mbaa hȩn gbo̧o̧ nɔ́ɔ́ nánán voolı̵́ máa, wu̵ hȩn zó̧ó̧ fá̧á̧lȩ́ Tayɨɨ woo.

¹⁶Debtere Múúsa woo kan ı̵́ anábi voo vu̵ dɨ mbaalı̵́ há̧á̧ ya̧ sey Yoohá̧na ı̵́ mam Tayɨɨ wooné woolı̵́. Ma Yoohá̧na dəŋ pa moo to̧o̧ 'maŋ, o̧ gbaŋ waalı̵́ Tayɨɨ woo ba ya̧ sú̵'ú̵. Ma nán 'waapád vu̵ sȩn fó̧ó̧ bi dɔ́ wu̵lı̵́.

¹⁷Be' kan hág vú̵ń 'wáa vaŋná, a̧máa hȩn dȩȩlȩ́ waa ɗíḿbilíid moo Tayɨɨ woolı̵́ yȩ wú̵ń 'wáa né kəd.

¹⁸Kóó nɔ́nná a hı̵́'ı̵́n kan kȩ́ȩ́ woo, a éé tóó tée, kɔ́ ɓáaɨ. Wakȩ́ȩ́ tóó wə̧ə̧ a nɛŋ gbɔgɔ pȩ́ń, nán tóó a ééwu̵ tée, wayée yȩ kɔ́ ɓáaɨ á̧ḿ.”

¹⁹Yesu duu o̧d vu̵: “Nán naa tóó ká dɨlı̵́, dɔ́ sa̧a̧m sɔ́g woo ka néé na'a má nɔ. Mbaa kan zó̧ó̧ dȩ"ȩ́ zá̧ga̧ 'waapád kan hȩn lálı̵́ to̧o̧ vu̵.

²⁰Nán gíḿ tóó ká dɨlı̵́, yéé woo Laazáar. Fó̧ó̧ woo 'waapád maa ndɔ́g mɛ́ń, ud mbaa ya̧g dɔ́m nán naa pee woolı̵́.

²¹Hí̧í̧ bi ha̧' kan nan púpúd waa a pee ya hȩn lálı̵́ nán naa pee woolı̵́ má nɔ. A̧máa ya̧'a̧d vu̵ ya nɛ'ɛdu̵ ndɔ́g á̧ḿ.

²²Nán gíḿ pee nɔɔ, maleeka vu̵ ya gaŋŋɔ dɔgɔn dáŋ́ Ibrahí̧í̧ma woolı̵́ nagá. Nán naa pee nɔɔ á̧ḿ, vu̵ dɔddu̵.

²³Nán naa pee ka mbaa ya nɔmmé ya hȩn ndɔ́gɔnélȩ́ máa, ho̧ la Ibrahí̧í̧ma ɗiilí na'a, Laazáar dɨ mbaalı̵́ dáŋ́ woolı̵́.

²⁴Nán naa pee moo moo dɔg yúba o̧: ‘Ba'á Ibrahí̧í̧ma, i ho̧ gíḿ gaanɔ́. I ba' Laazáar, a ya dɔd nag vbaŋ waa woo mammé 'yɛ́n zu̵u̵ ya̧gá̧, zó̧ó̧ a ka̧'a̧nɔ́, moo mí dɨ kan hȩn ndɔ́gɔné vee yɛlı̵́ du̵u̵n də́ń né.’

²⁵A̧máa Ibrahí̧í̧ma ka ki máa, hí̧i̧du̵: ‘Waa míí, a̧m taa la ú̵. Sey zá̧a̧d móólȩ́ máa, ká mɔ́ nuŋ hȩn du̵u̵ sú̵'ú̵, a̧máa Laazáar ká nuŋ woo hȩn ndɔ́gɔné ma. 'Ya̧'a̧ yɛ máa, Laazáar nuŋ woo zó̧ó̧ ká̧'a̧d yɛlı̵́, ma mɔ́ nuŋ móó hȩn ndɔ́gɔné yȩ.

²⁶Hȩn tóó dɨlı̵́ á̧ḿ. Haag gbo̧o̧ dɨ sa̧a̧m baa vílí. Kóó nán u̵u̵ lúú yɛlı̵́ laa víílí si̧', vú̵ń ya̧n né. Nán tóó u̵u̵ lúú víílí zulí yaa vóólı̵́ yɛlı̵́, vú̵ń ya̧n né á̧ḿ.’

²⁷Ma baa pee duu o̧: ‘Ba'á, mí ɓá' ví, i ba' Laazáar a laa kíi ba' míí woolı̵́.

²⁸Dan sá̧ŋ́ vu̵ du̵u̵lı̵́ nɔ́nɔ́. A la gagad vu̵ ú̵, moo ka vu̵n yaa ya hȩn ndɔ́gɔné yɛlı̵́ á̧ḿ.’

²⁹Ibrahí̧í̧ma duu hí̧i̧du̵: ‘Dam sá̧ŋ́ vu̵ dɨ kan debtere Múúsa woo kan ı̵́ anábi voo vu̵ á̧ḿ. Ʉu̵ fȩȩ moo voo ú̵.’

³⁰A̧máa baa pee duu faa o̧: ‘Maa né, ba'á. A̧máa nán tóó a níḿ nɔmmé laa voolı̵́ pȩ́ń tée, vú̵ń tii zó̧ó̧.’

³¹A̧máa Ibrahí̧í̧ma ka ki moo yȩ máa, duu hí̧i̧du̵: ‘Ʉu̵ fȩȩn moo Múúsa voo kan moo anábi voo vu̵ né tée, kóó nán a níḿ ya nɔmmé si̧', vú̵ń fȩȩn moo woo né á̧ḿ.’ ”