Read Dii Lúg 17 Bible Online

Lúg 17 - Dii bible

Lúg 17

¹Yesu o̧d waa duulí woo vu̵: “Moo yȩ́ńne, hȩn zo"ı̵́ vú̵ń yaa dɨlı̵́, a̧máa zó̧ó̧ wú̵ń ví̧i̧ nán hȩn zo"ı̵́ɨ.

²Maa ka vú̵ń taddu̵ naag hȩn nané vəgə́, ndaa gbɔgɔ zu̵u̵ mam gbo̧o̧lȩ́ má nɔ, tée du̵u̵du̵ á̧ḿ, moo kan zo' náásá̧ŋ́ waa yɛ tóó dɔd ya hȩn ɓı̵́ddı̵́.

³I gággú̵. Dam ka kɔ́ hȩn ɓı̵́d tée, a̧m séewu̵ za̧a̧ná. Ka si̧' tée, mɔ́ kéé moo woo gbɔ la.

⁴Kóó ka kɔ́m hȩn ɓı̵́d zá̧ga̧ dágá do' gúndɛm si̧', ka duu faa fíí ya do' gúndɛm á̧ḿ, ka o̧m: ‘Mí si̧' sú̵'ú̵’ tée, a̧m kéé moo woo gbɔ la ú̵.”

⁵Waa ba'ad ı̵́ 'yɛ́lı̵́ Yesu woo vu̵ o̧ddu̵: “A̧m maa vɔ́ vɔ́ 'yɛ́ zó̧ó̧ vóó móólȩ́ gbo̧o̧ ba'a.”

⁶Ɨ́ 'yɛ́lı̵́ Yesu hí̧i̧d vu̵: “Zó̧ó̧ 'yɛ́lı̵́ víí a dɨ waaná' kɔ́ ı̵́ yȩ́ń sambɨɨm wɔgɔ si̧', ka víń o̧d la' máŋ́gɔlɔŋ yȩ: ‘A̧m buguy kan fó̧ó̧ móó, mɔ́ la ndag zágád sa̧a̧m mammé.’ Tée kan kid ví tɔ́ggú̵.

⁷“Sa̧a̧m víílí máa, tóó tée nán tóó dɨ kan gba'a ka ɓúudu̵ hág, tóó tée, ka tu̵ddu̵ hȩn buulí má nɔ. Gba'a yȩ ka fíí ya babbı̵́ tée, ı̵́ buulí woo wú̵ń o̧ddu̵: ‘A̧m yaa vaŋná, mɔ́ mbaa ya hȩn lálı̵́lı̵́’ áa?

⁸Áá'a, a̧máa wú̵ń o̧ddu̵: ‘A̧m mbɔ́g hȩn lálı̵́, mɔ́ dɔ́ sa̧a̧m ba'ad, mɔ́ pa̧n ya hȩn lálı̵́, mí lá, mí zɔ hȩn 'waa tée, mɔ́ń lá ı̵́ móó, mɔ́ń zɔ.’ Ɨ́ yo̧go̧ pɛ́láa?

⁹Tée wú̵ń dȩn gba'a woo nag, moo ka kiddu̵ tɔ́g yȩ á̧a̧? Pɛ́lı̵́ sá̧ḿ.

¹⁰Ví á̧ḿ, i kɔ́ hȩn Tayɨɨ ka o̧d ví yȩ 'waa tée, víń o̧: ‘Ɨ́ vóó vɔ́ gba'a vu̵ yu̵. Vɔ́ kɔ́ də́ń hȩn ka maa vɔ́ kɔ́lı̵́ má nɔ.’ ”

¹¹Yesu ka dɨ laalı̵́ Yerúsalemmé máa, ya̧a̧ duu sa̧a̧m hág Samaríi, kan Gáliléelı̵́.

¹²Ka dɨ dɔ́lı̵́ kaa tóólı̵́ máa, nán ho̧o̧ naa tóó vu̵ wa̧nɓó' vu̵ yaa, vu̵ hí̧í̧ bi kan kannɔ ú̵. Vu̵ dii ɗiilí na'a,

¹³vu̵ o̧ moo dɔg yúba, vu̵ o̧: “Yesu ba' naa, i ho̧ gíḿ gaad vɔ́ ú̵.”

¹⁴Yesu ka ho̧ vu̵ máa, o̧d vu̵: “I laa nán hȩn ha"ı̵́ voolı̵́, ví tú'ud vu̵ fó̧ó̧ víí nu.” Sey ku̵u̵ dɨ laalı̵́ hi̧naalȩ́ máa, fó̧ó̧ voo yu̵d.

¹⁵Nán dágá voolı̵́ sa̧a̧mé ka ho̧ ho̧o̧ woo ka 'wáa sú̵'ú̵ máa, fíí ya moo moo dɔg yúba, na' Tayɨɨ.

¹⁶Kə̧ə̧da Yesu tíŋ́, dȩnnɔ nag. Nán yȩ ká woo nán Samaríii.

¹⁷Ma Yesu o̧: “Ho̧o̧ ka̧' nán wa̧nɓó' vu̵ yu̵ náa? Nán kɛ́gdágá vu̵ dɨ voo tɛ́lá?

¹⁸Nán tóó vu̵ taan bi ya na'an Tayɨɨ né, séý nán gáá yɛ naa?”

¹⁹Pig woo Yesu o̧d baa pee: “A̧m lúú dɔggú̵, mɔ́ laa la ú̵. Zó̧ó̧ 'yɛ́lı̵́ móó səm sú̵'ú̵.”

²⁰Nán farísa vu̵ vi Yesu gbaŋ waalı̵́ Tayɨɨ woo ban yaa zag ndɛnná? Ma Yesu hí̧i̧d vu̵: “Gbaŋ waalı̵́ Tayɨɨ woo wú̵ń yaan kɔ́ ı̵́ hȩn nán ku̵u̵ ho̧n kan nɔ́ɔ́ wɔgɔ né.

²¹Vú̵ń o̧n: ‘Wu̵ yɛ nɔ’, tóó tée: ‘Wu̵ zu nu’ né, moo gbaŋ waalı̵́ Tayɨɨ woo dɨ sa̧a̧m víílí.”

²²Pig woo máa Yesu o̧d waa duulí woo vu̵: “Zá̧ga̧ tóó wú̵ń yaa dɨlı̵́, ı̵́ míí Tayɨɨ ka ba'an ya yɛ, víń hí̧í̧ bi ho̧ fíiní míí zá̧ga̧ dágá aga ú̵, a̧máa víń ho̧n mí ní.

²³Vú̵ń o̧d ví: ‘Dɨ zulí’, tóó tée: ‘Dɨ yɛlı̵́.’ Tée i laa wu̵lı̵́ sá, i kɛ ɗug duu vu̵ sá á̧ḿ.

²⁴Moo zá̧ga̧ míílí̧ tée, ı̵́ míí Tayɨɨ ka ba'an ya yɛ, míń yaa kɔ́ ı̵́ mam ka yȩ́d nɔ́ɔ́ máa wɔgɔ, tú ka' tóólı̵́ há̧á̧ ya̧ la ka' tóó.

²⁵A̧máa séý míń dəŋ nuŋ hȩn ndɔ́gɔné gbo̧o̧ ba'a pȩ́ń. Zig nán 'ya̧'a̧ yɛ vú̵ń man.

²⁶“Bá' a̧n yaa tée, hȩn woo wú̵ń mbaa kɔ́ ı̵́ sey Núúhu̧ woolı̵́ máa wɔgɔ.

²⁷Nán vu̵ lá hȩn, vu̵ zɔ hȩn vu̵, vu̵ éé kȩ́ȩ́, vu̵ pú̵ waa vu̵ lig, há̧á̧ ya̧ zá̧ga̧ Núúhu̧ ka dɔ́ nɛ́ŋ́ŋı̵́ máa. Pig woo mam gbo̧o̧ naŋ tud nán vu̵ 'waapád.

²⁸“Hȩn woo wú̵ń kɔ́y kɔ́ ı̵́ sey Lód woolı̵́ wɔgɔ á̧ḿ. Nán vu̵ lá hȩn, vu̵ zɔ hȩn vu̵, vu̵ hɨ hȩn vu̵, vu̵ gí hȩn vu̵, vu̵ ndag la' vu̵, vu̵ yo̧o̧ hȩn vu̵.

²⁹A̧máa zá̧ga̧ Lód ka vúd kaa Súúdumalȩ́ máa, vee naŋ zu̵u̵ be"ı̵́ kan 'yɛgɛ vu̵ pilí na'a, tud vu̵ 'waapád.

³⁰Ɨ́ míí Tayɨɨ ka ba'an ya yɛ, zá̧ga̧ yaalı̵́ míí wú̵ń kɔ́y ı̵́ yo̧go̧ á̧ḿ.

³¹Zá̧ga̧ woo nán a dɨ dɔ́mmé tée, a dɔ́ la hȩn woo ɓɛlı̵́ lig tíŋ́ sá. Nán ka dɨ babbı̵́ á̧ḿ, a fíí la kíi woolı̵́ sá.

³²I duu taa kȩ́ȩ́ Lód woo nɔ.

³³Nán a soo bi səd fó̧ó̧ bii nu tée, wú̵ń tid vágád woo ú̵. A̧máa nán a tid vágád woo tée, wú̵ń duu nuŋŋɔ ó̧.

³⁴Mí o̧d ví, vid woo nán vú̵ń ud fó̧ó̧ idú píg dágá. Maleeka míí vú̵ń ɓɛ dágá lúun, vú̵ń kéé ı̵́ tóó gbɔ.

³⁵Wakȩ́ȩ́ idú vú̵ń sú̵g naŋ hȩn ya dágá, maleeka míí vú̵ń ɓɛ dágá lúun, vú̵ń kéé ı̵́ tóó gbɔ. [

³⁶Wayée idú vú̵ń dɨ babbı̵́. Maleeka míí vú̵ń ɓɛ dágá lúun, vú̵ń kéé ı̵́ tóó gbɔ.]”

³⁷Sey waa duulí Yesu woo ku̵u̵ ki moo yȩ máa, vu̵ vigi: “Ba' vóó, wú̵ń kɔ́y yaga tɛ́lá?” Yesu hí̧i̧d vu̵: “Ya hȩn nɔm ku̵u̵ du̵u̵lı̵́ máa, gbu̵u̵g vu̵ sú̵g wu̵lı̵́.”