Read Dii Lúg 18 Bible Online

Lúg 18 - Dii bible

Lúg 18

¹Yesu zíd vu̵ ya̧g tóó bi tú'ud vu̵ u̵u̵ o̧d Tayɨɨ moo mbaan wu̵lı̵́, u̵u̵ ta̧a̧ sá.

²O̧: “Nán moo sə̧"ȩ́ tóó ká dɨ kaa tóólı̵́. Ndɔgɔn Tayɨɨ né, ho̧ nán 'waapád vu̵ hȩn leená.

³Ma wakȩ́ȩ́ yɛd tóó ká dɨ kaa dágá yȩlȩ́ á̧ḿ, baa laa nán moo sə̧"ȩ́ yȩ woolı̵́, baa o̧ddu̵: ‘A̧m to̧'o̧n vɔ́ moo kan nán maag míí yɛ ú̵!’

⁴A̧máa nán moo sə̧"ȩ́ pee sɛ́n né, há̧á̧ ɗii la wu̵lı̵́. Pig woolı̵́ máa, o̧ zó̧ó̧ woolı̵́: ‘Kóó a̧n ndɔgɔn Tayɨɨ né, a̧n ho̧ nán vu̵ hȩn leená si̧',

⁵wakȩ́ȩ́ yɛd yȩ sȩgȩn 'yɛ́nné. Míń to̧'o̧n vu̵ moo voo yȩ ó̧, moo kan baa yaa bá' 'waapád, kan fígin ka míń ta̧a̧ ó̧.’ ”

⁶Ɨ́ 'yɛ́lı̵́ Yesu duu moo ha': “I ki moo ı̵́ moo sə̧"ȩ́ ɓı̵́d yȩ ka moo yȩ nɔ.

⁷Nán Tayɨɨ ka yee vu̵, ku̵u̵ baa ká̧ńnɔ zá̧ga̧ kan vid á̧ḿ máa, wú̵ń to̧'o̧n vu̵ moo vaŋná náa?

⁸Mí o̧d ví, wú̵ń to̧'o̧n vu̵ moo vaŋná. A̧máa ı̵́ míí Tayɨɨ ka ba'an ya yɛ, a̧n yaa tée, míń nuŋ nán ku̵u̵ 'yɛ́ zó̧ó̧ Tayɨɨ woolı̵́ máa vu̵ hágá yɛlı̵́ áa?”

⁹Nán tóó vu̵ taa ba binnɔ kɔ́ hȩn hí̧í̧lí̧ Tayɨɨ woo, a̧máa vu̵ ho̧ daga vu̵ kɔ́ ı̵́ hȩn lee wɔgɔ. Ma Yesu zíd vu̵ ya̧g yɛ, o̧:

¹⁰“Nán tóó vu̵ idú vu̵ dɔg lig hȩn ha"ı̵́lı̵́, bi o̧d Tayɨɨ mooɨ. Nán dágá máa, nán farísaɨ. Ɨ́ tóó máa, nán lámba su̵ggı̵́ɨ.

¹¹Nán farísa pee dii woo ya kə́d, o̧d Tayɨɨ: ‘Tayɨɨ, mí dȩm nag moo mí man kan nán tóó vu̵ né. Tóó vu̵ vbid hȩn, tóó vu̵ kɔ́ hȩn ɓı̵́d, tóó vu̵ kɔ́ ɓáa. Mí mbaan kɔ́ ı̵́ nán lámba su̵ggı̵́ yȩ wɔgɔ né á̧ḿ.

¹²Mí baa kȩȩ hȩn lálı̵́ bá' i'idú alad 'waapád. Káń nuŋ hȩn wa̧nɓó' tée, mí gɛ dágá pú̵m.’

¹³A̧máa nán lámba su̵ggı̵́ pee dii ya zulí, kuun dɔg nɔ́ɔ́ yúba né sá̧ḿ, kágán nag zó̧ó̧lȩ́ gíḿná, o̧: ‘Tayɨɨ, a̧m ho̧ gíḿ gaanɔ́. Mí nán hȩn ɓı̵́d kɔ́lı̵́ɨ.’ ”

¹⁴Yesu ka zí ya̧g 'waa sú̵'ú̵ máa, duu o̧d vu̵: “Mí o̧d ví, nán lámba su̵ggı̵́ yȩ ka sí zu̵u̵ woolı̵́ kíilí máa, Tayɨɨ kéé hȩn ɓı̵́d woo gbɔ sú̵'ú̵. A̧máa vu̵ to̧n kan ı̵́ tóó yȩ né. Moo kóó nɔ́nná a na' yúú tée, Tayɨɨ wú̵ń tiiwu̵ hȩn leená. Nán a 'yɛ́ fó̧ó̧ woo hȩn lee tée, Tayɨɨ wú̵ń tiiwu̵ nán gbo̧o̧ ó̧.”

¹⁵Nán vu̵ pa̧ŋ náásá̧ŋ́ waa vu̵ yaan Yesu woolı̵́, kan waa pə̧́ə̧d vu̵ á̧ḿ, moo a za' vu̵ ú̵. A̧máa sey waa duulí woo ku̵u̵ ho̧ vu̵ máa, vu̵ sée vu̵.

¹⁶A̧máa Yesu bee náásá̧ŋ́ waa vu̵, o̧d waa duulí woo vu̵: “I gbɔ náásá̧ŋ́ waa vu̵ u̵u̵ yaa míílí̧ la ú̵, i há' vu̵ sá, moo gbaŋ waalı̵́ Tayɨɨ woo mbaad nán ku̵u̵ man kan vu̵ má nɔ.

¹⁷Mí o̧d ví moo yȩ́ńne, náásá̧ŋ́ waa vu̵ fȩȩ moo gbaŋ waalı̵́ Tayɨɨ woo vaŋná, a̧máa ı̵́ nii u̵u̵ fȩȩn ı̵́ yo̧go̧ né tée, vú̵ń dɔ́n wu̵lı̵́ né sá̧ḿ.”

¹⁸Ɨ́ nii Yúúda tóó vi Yesu o̧: “Akaw to̧o̧, míń kɔ́ née pȩ́ń míń nuŋ vágád ı̵́ káákáálá?”

¹⁹Ma Yesu hí̧i̧du̵: “Moo ȩn mɔ́ been nán to̧o̧lá? Nán to̧o̧ tóó pɛ́lı̵́, séý wu̵ Tayɨɨɨ dágá 'nɛ́ŋ́.

²⁰Mɔ́ gaa dooká Tayɨɨ woo vu̵ ú̵: ‘A̧m kɔ́ ɓáa sá. A̧m nɔɔ nɔm sá. A̧m kɔ́ líw sá. A̧m gəd dam vu̵ moo sá. A̧m na' ba' móó kan na' móó ó̧.’ ”

²¹Nán pee duu o̧: “Mí duu hȩn yȩ vu̵ 'waapád diga káń dəŋ saa kɔ́lı̵́ máalȩ́.”

²²Yesu ka ki ná' máa, duu o̧ddu̵: “Kéem hȩn tóó dɨlı̵́; a̧m la gí hȩn móó 'waapád, mɔ́ yȩ'ȩ nán gíḿ vu̵, tée mɔ́ń nuŋ hȩn naa tóó Tayɨɨ woolı̵́, pig woo tée mɔ́ ya duun.”

²³Sey nán naa pee ka ki moo yȩ máa, zó̧ó̧ woo ví̧i̧, moo ká nán naaɨ.

²⁴Yesu ka ho̧ zó̧ó̧ ka ví̧i̧ baa pee máa, o̧: “Təə ú̵, nán naa u̵u̵ dɔ́ gbaŋ waalı̵́ Tayɨɨ woolı̵́ tɛ́ nɔ.

²⁵Hȩn təəlı̵́ tóó dɨlı̵́ á̧ḿ; wu̵ bal[13] a pu̧u̧ nɔ́ɔ́ ba'taalı̵́ má nɔ. A̧máa hȩn ka təə mba máa dɨlı̵́; wu̵ nán naa a hí̧í̧ bi dɔ́ gbaŋ waalı̵́ Tayɨɨ woolı̵́ tɛ́ nɔ.”

²⁶Nán ku̵u̵ ki moo yȩ máa, vu̵ o̧: “A ı̵́ yo̧go̧ tée, nóo wú̵ń sə́ddá?”

²⁷Yesu hí̧i̧d vu̵ o̧: “Hȩn ku̵u̵ mba nánán vu̵ kɛb máa, vu̵ mban voo Tayɨɨ né.”

²⁸Piɛ́r o̧ddu̵: “Ɨ́ vóó, vɔ́ gbɔ hȩn vóó vu̵, vɔ́ duum sú̵'ú̵.”

²⁹Yesu duu o̧d vu̵: “Mí o̧d ví moo yȩ́ńne, nán a gbɔ kíi woo, kan kȩ́ȩ́, kan daga waa vu̵, kan ı̵́ ha̧a̧lȩ́ woo vu̵, kan waa woo vu̵, moo gbaŋ waalı̵́ Tayɨɨ woo tée,

³⁰wú̵ń duu nuŋ vu̵ do' ɓu̵u̵lı̵́ na'a hágá yɛlı̵́, wú̵ń nuŋ vágád káákáá gbaŋ waalı̵́ Tayɨɨ woolı̵́ ú̵ á̧ḿ.”

³¹Yesu ɓɛ waa duulí woo vu̵ wa̧nɓó' zu̵u̵ idú yaan woolı̵́, o̧d vu̵: “I ho̧ sı̵́ɨ! Ba dɨ ví dɔggı̵́ Yerúsalemmé yɔ. Hȩn anábi ku̵u̵ bíńda yúú míílí̧ máa, wú̵ń kɔ́y wu̵lı̵́. Ɨ́ míí Tayɨɨ ka ba'an ya yɛ,

³²vú̵ń dɔn nag nán gaa Tayɨɨ sá voolı̵́, vú̵ń kɔ́n ba̧a̧m, vú̵ń vun fó̧ó̧ kan du̵g, vú̵ń tú̵'u̵n su̵d fó̧lȩ́,

³³vú̵ń gbɔ́n kan loo, tée vú̵ń nɔɔn. A̧máa bá' idú, ta̧a̧nɔ́ woo tée, míń níḿ nɔmmé.”

³⁴A̧máa vu̵ kin moo yȩ né sá̧ḿ, moo yȩ mbaad vu̵ moo yú̵ggı̵́ mɛ́ń. Vu̵ gaan hȩn ka hí̧í̧ bi o̧n vu̵ yȩ né sá̧ḿ.

³⁵Sey Yesu ka ya̧ la dáŋ́ kaa Yeríkolı̵́ máa, nán yə̧m tóó mbaa ya̧g hi̧naalȩ́, baa ɓá' hȩn.

³⁶Sey ka ki dúú ku̵u̵ dɨ daa ya̧a̧lȩ́ máa, vi: “Ɓəə ȩná?”

³⁷Vu̵ hí̧i̧du̵: “Yesu nán Naazaréd wu̵ ya̧a̧.”

³⁸Ka ki ná' máa, moo moo dɔg yúba o̧: “Yesu, Daavíd waa, i ho̧ gíḿ gaanɔ́.”

³⁹Nán ku̵u̵ ɓə́ə́ tíŋ́ máa, vu̵ séewu̵, vu̵ o̧ddu̵ ba a mbaa simná, a̧máa nán yə̧m pee duu moo moo gbo̧o̧ mɛ́ń: “Daavíd waa, i ho̧ gíḿ gaanɔ́.”

⁴⁰Yesu dii, o̧d vu̵: “I pa̧nnɔ ya ú̵.” Ka séé ya bə́' máa, Yesu vigi:

⁴¹“Mɔ́ hí̧í̧ a̧n kɔ́d bi ȩná?” Ma hí̧i̧du̵: “Ɨ́ 'yɛ́lı̵́ míí, ka míń ho̧ nɔ́ɔ́e.”

⁴²Yesu duu o̧ddu̵: “A̧m ho̧ nɔ́ɔ́ la ú̵. Zó̧ó̧ 'yɛ́lı̵́ móó səm sú̵'ú̵.”

⁴³Vaŋná, nán pee daa há̧á̧ ho̧ nɔ́ɔ́, lúú duu Yesu, na' Tayɨɨ. Nán 'waapád vu̵ ho̧ hȩn yȩ, ma vu̵ dəm Tayɨɨ á̧ḿ.