Read Dii Lúg 19 Bible Online

Lúg 19 - Dii bible

Lúg 19

¹Sey Yesu ka dɔ́ kaa Yeríkolı̵́, ka dɨ daa ya̧a̧lȩ́ máa,

²i ho̧ sú̵m, nán tóó ká du̵u̵lı̵́, yéé woo Zakée, ká ı̵́ nii nán lámba su̵ggı̵́ voo nɔ. Ká nán naaɨ á̧ḿ.

³Soo hi̧naa bi ho̧ Yesu máa ba nɔ́nná, a̧máa nugun hi̧naa né, moo ká nán fəəɨ. Dúú vu̵ biggu̵ Yesu ho̧lȩ́ á̧ḿ.

⁴Kɛ ɗug la sə̧' tíŋ́, ɗáá gummí, moo bi ho̧ Yesu ú̵, moo wú̵ń dɨ ya̧a̧lȩ́ duu la' do̧o̧ yȩlȩ́.

⁵Sey Yesu ka ya̧ yaga máa, luu dɔg nɔ́ɔ́ yúba, o̧ddu̵: “Zakée, a̧m sí zu̵u̵ vaŋná, moo míń la sí ɓəə móólȩ́.”

⁶Ma sí zu̵u̵ vaŋná, fȩȩ Yesu kan zó̧ó̧ dȩ"ȩ́.

⁷Nán 'waapád ku̵u̵ ho̧ hȩn yȩ ná' máa, vu̵ ŋguu moo, vu̵ o̧: “Nán yȩ dɨ sílí kíi nán hȩn ɓı̵́d kɔ́lı̵́ yȩ woolı̵́.”

⁸A̧máa Zakée dii tíŋ́ ı̵́ 'yɛ́lı̵́ Yesu woolı̵́, o̧ddu̵: “Ɨ́ 'yɛ́lı̵́ míí, i ki lá ví! Míń yȩ'ȩn hȩn naa míí vu̵ sa̧a̧mé, míń pú̵ nán gíḿ vu̵ ka' tóó. Tow ká a̧n sóo nán tóó, a̧n vbiddu̵ hȩnnɔ́ tée, míń vȩ' pú̵gu̵ do' ndaddú̵.”

⁹Ma Yesu o̧ddu̵: “Kíi yɛ sə́d sı̵́ ɓəə ú̵, moo nán yȩ Ibrahí̧í̧ma aa yéeɨ á̧ḿ.

¹⁰Ɨ́ míí Tayɨɨ ka ba'an ya yɛ, mí yaa nán ka ti máa wu̵ soolı̵́ bi səddu̵ ú̵.”

¹¹Nán ku̵u̵ ki moo yȩ máa, Yesu duu ha'ad vu̵ ya̧g zílí tóó. Sey woo ká dɨ bə́' kan Yerúsalem. Ma nán vu̵ taa zaa Yesu ban waa sı̵́ gbaŋŋó.

¹²Ma Yesu o̧d vu̵: “Gbaŋ waa tóó laa hág tóólı̵́ ɗiilí na'a, moo ba u̵u̵ la 'yɛ́ bi gbanaa tée, bi fíí ya.

¹³Tíŋ́ lúúlí woo máa, béé nán ba'ad woo vu̵ wa̧nɓó', pú̵ vu̵ booro tȩmɛre tȩmɛre, o̧d vu̵: ‘I kɔ́n ba'ad wu̵lı̵́, mí fíí ya dɨlı̵́.’

¹⁴A̧máa daga waa kaa vu̵ máńnɔ, vu̵ ba' ba'ad duunɔ, vu̵ o̧: ‘Vɔ́ hí̧í̧ nán yȩ a waa gbanaa yúú vóólı̵́ sá.’

¹⁵“Sey ka nuŋ gbanaa sú̵'ú̵ máa, fíí ya, o̧ ba u̵u̵ beed bi nán ba'ad ba kii pú̵ vu̵ sɨɨde máa vu̵ yu̵, moo bi gaa hȩn ba ku̵u̵ kɔ́ń kan sɨɨde bii má nɔ.

¹⁶Ma nán dágá dəŋ séé ya, o̧: ‘Ɨ́ 'yɛ́lı̵́ míí, sɨɨde víí booro tȩmɛre pee duu ha' tóó booro uzinɛɛre yɔ.’

¹⁷Gbanaa pee o̧ddu̵: ‘Du̵u̵ ú̵. Mɔ́ nán ba'ad du̵u̵ɨ. Mɔ́ kɔ́ hȩn yȩ́ń yúú hȩn waaná"ȩ́ sú̵'ú̵, míń 'yɛ́m mɔ́ń waa gbaŋ yúú kaa gbaŋ wa̧nɓó"ı̵́.’

¹⁸Nán idú woo ya o̧: ‘Ɨ́ 'yɛ́lı̵́ míí, sɨɨde víí booro tȩmɛre pee duu ha' tóó tȩmɛre nɔ́nɔ́ yɔ.’

¹⁹Gbanaa pee duu o̧ddu̵: ‘Mɔ́ á̧ḿ, míń 'yɛ́m mɔ́ń waa gbaŋ yúú kaa gbaŋ nɔ́nɔ́lȩ́.’

²⁰Nán ba'ad ı̵́ tóó duu ya o̧: ‘Ɨ́ 'yɛ́lı̵́ míí, sɨɨde víí booro tȩmɛre pee wu̵ yɛ nɔ. Mí go̧o̧ yu̵g sa̧a̧m seelı̵́,

²¹moo mí ndɔg ví ú. Moo víí təə ú̵. Ya kíí 'yɛ́n hȩn wu̵lı̵́ né máa, ví ká̧ŋ́ fá̧á̧lȩ́ȩ. Ví su̵g hȩn ya kíí ban hȩn wu̵lı̵́ né máa á̧ḿ.’

²²“Baa lig woo ka ki ná' máa, o̧ddu̵: ‘Nán ba'ad ɓı̵́d, míń sə̧'ə̧m moo kɔ́ ı̵́ káḿ o̧ kan ya̧g móó yȩ wɔgɔ. Moo mɔ́ gaa moo míí ba təə ú̵, ba míń fá̧á̧ hȩn ya káń 'yɛ́n hȩn wu̵lı̵́ né máalȩ́, ba míń su̵g hȩn ya káń ban hȩn wu̵lı̵́ né máalȩ́ á̧ḿ.

²³Moo ȩn mɔ́ 'yɛ́n sɨɨde míí nán sɨɨde tu̵lı̵́ woolı̵́ nélá? Ka míń fíí ya nuŋ kan mam woo á̧ḿ.’

²⁴Ma o̧d nán ku̵u̵ mbaa wu̵lı̵́ máa vu̵: ‘I vbid sɨɨde booro tȩmɛre nag woolı̵́ yȩ pú̵ la nán ı̵́ ka dɨ kan uzinɛɛre yȩ nɔ.’

²⁵A̧máa vu̵ hí̧i̧du̵: ‘Ɨ́ 'yɛ́lı̵́ vóó, ı̵́ yȩ dɨ kan booro uzinɛɛre náa?’

²⁶Gbanaa pee ka ki moo yȩ máa, hí̧i̧d vu̵: ‘Mí o̧d ví, kóó nɔ́nná ka dɨ kan hȩn tée, vú̵ń ha'adu̵ tóó wu̵lı̵́ ú̵, a̧máa nán ı̵́ a 'yɛ́n hȩn né tée, vú̵ń vbiddu̵ hȩn ı̵́ a 'yɛ́ máa á̧ḿ.

²⁷A̧máa nán maag míí ku̵u̵ sɛ́n mí gbanaa waalı̵́ yúú voolı̵́ né máa, i pa̧ŋ vu̵ ya, ví sə̧'ə̧ vu̵ nɔɔ zu̵u̵ nɔ́ɔ́ míílí̧ yɛ nɔ.’ ”

²⁸Sey Yesu ka moo moo yȩ 'waa máa, daa ɓə́əd waa duulí woo vu̵ tíŋ́ moo dɔggı̵́ Yerúsalemmé.

²⁹Sey ku̵u̵ ya̧ dáŋ́ kaa Bɛdfááze, kan Bɛtaníilí̧, dáŋ́ gu̵u̵ la' kúḿmí máa, Yesu ba' waa duulí woo tóó vu̵ idú,

³⁰o̧: “I laa kaa tíŋ́ víílí yȩlȩ́. Kíí dɨ dɔ́lı̵́ la wu̵lı̵́ tée, víń nuŋ wamnde waa tóó tay mbaa du̵u̵lı̵́. Nán tóó ɗáanɔ lá see né. I buuwu̵ pa̧n ya ú̵.

³¹Nán tóó ka vi ví: ‘Moo ȩn ví buuwu̵lá?’, tée i hí̧i̧du̵: ‘Ɨ́ 'yɛ́lı̵́ hí̧í̧wo̧ ó̧.’ ”

³²Waa ba'ad pee vu̵ lúú, vu̵ la nuŋ hȩn yȩ kɔ́ ı̵́ Yesu ká o̧d vu̵ wɔgɔ.

³³Ku̵u̵ dɨ wamnde waa pee buuní máa, ı̵́ wamnde aga vu̵ vi vu̵: “Moo ȩn ví buuwu̵lá?”

³⁴Ma vu̵ hí̧í̧: “Ɨ́ 'yɛ́lı̵́ hí̧í̧wo̧ ó̧.”

³⁵Vu̵ pa̧ŋŋɔ laan Yesu woolı̵́, vu̵ wáádu̵ sa̧a̧m kúsúgumí, vu̵ ha' Yesu yúú woolı̵́.

³⁶Ka dɨ 'yȩmné máa, dúú vu̵ hú̵ú̵ sa̧a̧m voo vu̵ hi̧naalȩ́.[14]

³⁷Sey Yesu ka ya̧ bə́' ya sílí gu̵u̵ la' kúḿmí, moo dɔ́lı̵́ la Yerúsalemmé máa, dúú waa duulí woo vu̵ 'waapád zó̧ó̧ dȩ' vu̵, vu̵ bé' Tayɨɨ na"ȩ́ kan yɛ́g dɔg yúba yúú hȩn sa̧ga̧ ku̵u̵ ho̧ yȩlȩ́ 'waapád.

³⁸Vu̵ o̧: “Ɨ́ 'yɛ́lı̵́ Tayɨɨ a bagam hȩnne, ı̵́ móó gbanii káḿ yaa kan yɛ́g woo yȩ nɔ. Tayɨɨ pú̵ hȩn zó̧ó̧ ká̧'a̧d sú̵'ú̵. Ba na' ví Tayɨɨ be"ı̵́.”

³⁹Nán farísa tóó vu̵ sa̧a̧m dúú yȩ voolı̵́ vu̵ o̧ddu̵: “Akaw, a̧m sée waa duulí móó vu̵ la ú̵.”

⁴⁰A̧máa Yesu hí̧i̧d vu̵: “Mí o̧d ví, u̵u̵ mbaa simná si̧', 'yɛgɛ yɛ vú̵ń lɛ́ggú̵.”

⁴¹Yesu ka séé la dáŋ́ Yerúsalemmé, ka ho̧go̧ máa, ká̧ŋ́,

⁴²kɔ́: “Áaa, mɔ́ gaan hȩn ka dɨn mɔ́ ká̧'a̧d pú̵lı̵́ ɓəə yɛ né! A̧máa 'ya̧'a̧ yɛ hȩn woo yú̵g nɔ́ɔ́ móólȩ́ sú̵'ú̵.

⁴³Zá̧ga̧ tóó wú̵ń yaa dɨlı̵́, nán maag móó vú̵ń gbɔ kan mɔ́, vú̵ń tú̵'u̵ ya 'waapád, vú̵ń dɔ́ má'a ví.

⁴⁴Vú̵ń sɔgɔd ví kan nán víí vu̵ á̧ḿ. Vú̵ń gbɔn 'yɛgɛ tóó wú̵ń mbaan yúú daga woolı̵́ né, moo ví gaan zá̧ga̧ Tayɨɨ ka yaan ví giiní yȩ né.”

⁴⁵Pig woolı̵́ máa, Yesu dɔ́ la na'am gbo̧o̧ lig hȩn ha"ı̵́lı̵́, bé' nán hȩn gílí vu̵ nɛ́né,

⁴⁶o̧d vu̵: “Tayɨɨ o̧ debtere woolı̵́: ‘Lig míí yɛ wú̵ń mbaa lig u̵u̵ o̧d Tayɨɨ moo wu̵lı̵́ má nɔ,’ a̧máa ı̵́ víí ví tiiwu̵ víí lig líw voo nɔ!”

⁴⁷Yesu baa tú' moo zá̧ga̧ 'waapád na'am gbo̧o̧ lig hȩn ha"ı̵́lı̵́. Gbanaa hȩn ha"ı̵́ vu̵ kan nán moo Tayɨɨ tú"í vu̵ kan ı̵́ nii hág vu̵, vu̵ soo hi̧naa bi nɔɔwo̧ ó̧,

⁴⁸a̧máa vu̵ gaan hȩn tóó u̵u̵ kɔ́n né, moo nán 'waapád vu̵u̵ baa dɨ moo woo kilí.