Read Dii Lúg 20 Bible Online

Lúg 20 - Dii bible

Lúg 20

¹Bá' tóólı̵́ máa, Yesu tú'ud nán vu̵ moo na'am gbo̧o̧ lig hȩn ha"ı̵́lı̵́, pa moo to̧o̧ 'maŋ, ma gbanaa hȩn ha"ı̵́ vu̵ kan nán moo Tayɨɨ tú"í vu̵ sú̵g kan ı̵́ nii Yúúda vu̵, vu̵ yaa woolı̵́,

²vu̵ vigi: “A̧m o̧d vɔ́ ú̵, mɔ́ kɔ́ hȩn yȩ vu̵ kan néélȩ́ woo ȩná? Mɔ́ nuŋŋɔ nóo woolı̵́lá?”

³Ma Yesu hí̧i̧d vu̵ o̧: “Mí á̧ḿ, mí hí̧í̧ bi vi ví moo tóó nɔ. I o̧nnɔ́,

⁴Yoohá̧na nuŋ néélȩ́ mam Tayɨɨ wooné tɛ́lá? Tayɨɨ wooláa? Tóó tée nánán vooláa?”

⁵A̧máa vu̵ fan moo ya voolı̵́, vu̵ o̧: “Aa hí̧í̧ ví: ‘Tayɨɨ wu̵ pú̵gu̵’ tée, wú̵ń vi ba ví: ‘Moo ȩn ví fȩȩn moo Yoohá̧na woo nélá?’

⁶A̧máa aa hí̧í̧ ví: ‘Nánán vu̵u̵ pú̵gu̵’ tée, zig yɛ vu̵ 'waapád vú̵ń gbóo ba ví nɔɔ kan 'yɛgɛ, moo vu̵ taa Yoohá̧na ba anábiɨ.”

⁷Ma vu̵ hí̧i̧d Yesu: “Vɔ́ gaan ya ka nugu ní.”

⁸Yesu duu o̧d vu̵: “Ȩȩhȩ́ȩ, mí á̧ḿ, míń tú'un ví nán káń nugun néélȩ́ woolı̵́ yɛ né.”

⁹Yesu duu bé'ed dúú vu̵ moo moolȩ́ kan ya̧g zílí, o̧: “Nán tóó baa bab la' lálı̵́ woo, vu̵ táń ya̧g kan ı̵́ tu̵lı̵́ woo vu̵, ma daa laa gáá, səə wu̵lı̵́ ɗiilí na'a.

¹⁰Sey la' líid to̧"ȩ́ ka ya̧ sú̵'ú̵ máa, ba' la nán ba'ad woo dágá, nán bab tu̵lı̵́ pee voolı̵́, moo ba u̵u̵ pú̵ bi la' líid ka' ı̵́ bii nu. Vaŋná nán bab tu̵lı̵́ pee vu̵ gbɔ́gɔ, vu̵ nɛŋŋɔ gbɔ la nag leená.

¹¹Duu ba' nán ba'ad tóó. Ɨ́ woo, vu̵ gbɔ́gɔ, vu̵ kɔ́ddu̵ hȩn sȩ́ḿ, vu̵ nɛŋŋɔ gbɔ la nag leená.

¹²Duu ba' fó̧ó̧ ta̧a̧nɔ́ woo. Vu̵ du̵gu̵ ndɔ́g, vu̵ nɛŋŋɔ gbɔ la.

¹³“Pig woo máa, ı̵́ bab aga o̧: ‘Míń kɔ́ nɛ́nná? Míń ba' waa hí̧í̧lí̧ míí yɛ nɔ, ya tóó tée, vú̵ń gu̵g kiddu̵ tɔ́ggú̵.’

¹⁴Nán bab tu̵lı̵́ pee ku̵u̵ kuu nɔ́ɔ́ ho̧go̧ la ná' máa, vu̵ ó̧ń ya voolı̵́: ‘Wu̵ ı̵́ hȩn gaga ɓɛlı̵́ sú̵u̵, ba nɔɔwo̧ ví tée, hȩn gaga woo wú̵ń tii baa ví.’

¹⁵Vu̵ nɛŋŋɔ vud babbı̵́, vu̵ nɔɔwo̧. Yee tée, ı̵́ bab aga wú̵ń kɔ́ vu̵ nɛ́nná?

¹⁶Wú̵ń yaa, wú̵ń tud nán bab tu̵lı̵́ yȩ vu̵, wú̵ń ɓɛ bab pú̵ nán tóó u̵u̵ tu̵d bi ú.” Sey nán ku̵u̵ ki moo yȩ máa, vu̵ o̧: “Tayɨɨ a há"ú̵.”

¹⁷A̧máa Yesu tə́g vu̵, o̧: “Ví ki hȩn debtere ka o̧ yȩ áa? ‘'Yɛgɛ nán hȩn yo̧o̧lȩ́ ku̵u̵ ma gbɔ máa, wu̵ duu tii 'yɛgɛ ndam.

¹⁸‘Nán a wá̧á̧ yúú 'yɛgɛ yȩlȩ́ tée, wú̵ń só̧ó̧b lúlúúlúg kəd. A pɛd nán tóó daggı̵́ tée, wú̵ń nagayó̧.’ ”

¹⁹Nán moo Tayɨɨ tú"í vu̵ kan gbanaa hȩn ha"ı̵́ vu̵, vu̵ soo hi̧naa moo bi ma' Yesu ya̧g woolı̵́, a̧máa vu̵ ndɔg dúú vu̵ yu̵. Aga vu̵ gaa ba zíd biw ya̧g yȩ nɔ.

²⁰Vu̵ pí̧í̧ Yesu, vu̵ ba' nán tóó vu̵ laa woolı̵́ kɔ́ ı̵́ ku̵u̵ bi kɔ́ hȩn hí̧í̧lí̧ Tayɨɨ woo nɔ zu wɔgɔ. Vu̵ hí̧í̧ bi pí̧í̧ Yesu moo ya̧gá̧. Ya̧g a sɔ́ddu̵ tée, bi doowu̵ nán gbo̧o̧ voolı̵́, kan guvɛrnə́ər woolı̵́ á̧ḿ.

²¹Nán yȩ vu̵ vigi: “Akaw, vɔ́ gaa mɔ́ moo moo yȩ́ńná, mɔ́ tú' hȩn yȩ́ń á̧ḿ. Mɔ́ səgən nán vu̵ né, a̧máa mɔ́ dɨ hi̧naa Tayɨɨ woo tú"í yȩ́ńná.

²²Yee máa moo palı̵́ baa ví o̧ nɛ́nná? Aa sú̵ú̵ ví lámba pú̵ gbanii nán Róma voo áa? Tée du̵u̵ áa, kóó du̵u̵ náa?”

²³A̧máa Yesu ka gaa kɛb voo yȩ máa, o̧d vu̵:

²⁴“I tú'un ya sɨɨde lámba sú̵ú̵lı̵́ sú̵ nɔ. Fóto yɛ, fóto nóo woolá? Nóo bíńda hȩn yɛlá?” Vu̵ hí̧i̧du̵: “Gbanii woo nɔ.”

²⁵Ma Yesu duu o̧d vu̵: “Ȩȩhȩ́ȩ, hȩn ı̵́ ka gbanii woo tée, i vȩ' pú̵gu̵, a̧máa hȩn ı̵́ ka Tayɨɨ woo tée, i pú̵ sı̵́ Tayɨɨɨ née!”

²⁶Yesu moo moo sɔn nɔ́ɔ́ nánán voolı̵́ né. Ya̧g hí̧í̧lí̧ woo yȩ la' vu̵ la fid, ma vu̵ mbaa sı̵́ voo simná.

²⁷Nán sadukée vu̵ o̧ nímní nɔmmé ban pɛ́lı̵́, ma tóó vu̵ yaa Yesu woolı̵́, vu̵ vigi moo yɛ,

²⁸vu̵ o̧: “Akaw, Múúsa ká bíńda ba ví o̧: ‘Nán tóó ka nɔɔ gbɔ kȩ́ȩ́, waa ka pɛ́lı̵́ tée, daa sá̧ŋ́ a éé kȩ́ȩ́ woo, moo a ha̧a̧d daa nii waaɨ.’

²⁹Ma waa tóó ká vu̵ dɨ gúndɛm, na' voo dágá. Ɨ́ nii voo éé kȩ́ȩ́, ha̧a̧n waa né, nɔɔ gbɔgɔ.

³⁰Gbɔd daa sá̧ŋ́ ı̵́ ka dugu máa kȩ́ȩ́. Ma duu kɔ́ ı̵́ yo̧go̧ á̧ḿ.

³¹Ɨ́ ta̧a̧nɔ́ woo duu kɔ́ ı̵́ yo̧go̧. Ya voo 'waapád gúndɛm á̧ḿ vu̵ kɔ́ ı̵́ yo̧go̧, a̧máa waa pɛ́lı̵́, vu̵ nɔɔ 'waa sú̵'ú̵.

³²Pig woolı̵́ máa wakȩ́ȩ́ pee nɔɔ á̧ḿ.

³³Ma zá̧ga̧ nímní nɔmmélȩ́ tée, wakȩ́ȩ́ yȩ wú̵ń mbaa kȩ́ȩ́ nóo woo dágálá? Moo ya voo gúndɛm á̧ḿ, ká vu̵ ééwu̵ sú̵'ú̵!”

³⁴Ma Yesu hí̧i̧d vu̵: “Nánán hágá yɛ vu̵u̵ één,

³⁵a̧máa nán u̵u̵ níḿ nɔmmé, u̵u̵ maa dɔ́lı̵́ gbaŋ waalı̵́ Tayɨɨ woolı̵́ máa, vú̵ń duu éen sı̵́ né,

³⁶moo vú̵ń duu nɔɔn sı̵́ né á̧ḿ. Ku̵u̵ níḿ nɔmmé yȩ, vú̵ń mbaa kɔ́ ı̵́ maleeka vu̵ wɔgɔ, vu̵ sı̵́ waa Tayɨɨ woo vu̵ yu̵.

³⁷Debtere Múúsa woo ká o̧d vu̵ du̵u̵lı̵́ na'a nán nɔm ba vú̵ń níḿ nɔmmé ú̵. Sey Múúsa ká mbaa dáŋ́ kúdugu waalı̵́ máa, bee ı̵́ 'yɛ́lı̵́ ‘Tayɨɨ Ibrahí̧í̧ma woo, kan Iizág woo, kan Yaakúbu voo nɔ.’ ”

³⁸Yesu duu o̧d vu̵: “Tayɨɨ máa, Tayɨɨ ı̵́ nɔm voo nɔ pɛ́lı̵́, a̧máa ı̵́ nán zá̧a̧d voo nɔ. Tayɨɨ ho̧ vu̵ voo zá̧a̧dná.”

³⁹Nán moo Tayɨɨ tú"í tóó ku̵u̵ ki máa, vu̵ o̧ddu̵: “Akaw, moo móó to̧o̧ ó̧.”

⁴⁰Ma vu̵ ndɔggu̵ sı̵́ moo vilí.

⁴¹Pig woo máa, Yesu vi vu̵: “Dəŋ née nán vu̵ o̧ ı̵́ nán sənné ba Daavíd aa yéeɨlá?

⁴²Daavíd aga ká o̧ debtere yéélı̵́: ‘Tayɨɨ ı̵́ 'yɛ́lı̵́ o̧d ı̵́ 'yɛ́lı̵́ míí: A̧m ya mbaa nag nán míílí̧,

⁴³há̧á̧ mí 'yɛ́ ı̵́ maag móó vu̵ u̵u̵ mbaa hȩn doo 'ná'ané móó pȩ́ń.’

⁴⁴“Daavíd ká beewu̵ ba ı̵́ 'yɛ́lı̵́ bii, ma dəŋ née ı̵́ nán sənné mbaa aa yéelá?”

⁴⁵Sey nán 'waapád ku̵u̵ dɨ moo Yesu woo kilí máa, o̧d waa duulí woo vu̵:

⁴⁶“I gág kan nán moo Tayɨɨ tú"í tóó vu̵ ú̵. Vu̵ hí̧í̧ 'yȩ́mné kan sa̧a̧m gbo̧o̧ voo. Vu̵ hí̧í̧ nán u̵u̵ baa vá' bi lummí du̵u̵lı̵́ na'a. Vu̵ hí̧í̧ ya mbaalı̵́ ı̵́ nii voo lig sú̵ggı̵́lı̵́, kan ya mbaalı̵́ ı̵́ nii voo ya hȩn lálı̵́lı̵́ á̧ḿ.

⁴⁷Vu̵ vbid hȩn kíi wakȩ́ȩ́ yɛd voolı̵́ vu̵ 'waa. Vu̵ o̧d Tayɨɨ moo gən vaŋ né, moo nán u̵u̵ ho̧ bi ú. Vú̵ń nuŋ hȩn si̧'i̧ní gbo̧o̧ȩ.”